قازاقستاندا كەدەيلىك شەگى ەڭ تومەنگى كۇنكورىس دەڭگەيىنە دەيىن ۇلعايتىلۋى مۇمكىن

None
None
نۇر-سۇلتان. قازاقپارات - پارلامەنت ءماجىلىسىنىڭ دەپۋتاتى گۇلشارا ءابدىقالىقوۆا كەدەيلىك شەگىن ودان ءارى ەڭ تومەنگى كۇنكورىس دەڭگەيىنە دەيىن ۇلعايتۋ تۋرالى ايتتى، دەپ حابارلايدى قازاقپارات ءتىلشىسى.

«بۇگىنگى تاڭدا قازاقستاندا كەدەيلىكتى باعالاۋدىڭ دەڭگەيى - ەڭ تومەنگى كۇنكورىستىڭ 70 پايىزى (20789 تەڭگە). حالىقارالىق ساراپشىلار كەدەيلىك شەگىنىڭ وڭتايلى دەڭگەيى ەڭ تومەنگى كۇنكورىس دەڭگەيى بولىپ تابىلاتىنىن اتاپ ءوتتى. ءبىزدىڭ ويىمىزشا، كەدەيلىك شەگىن ودان ءارى ەڭ تومەنگى كۇنكورىس دەڭگەيىنە دەيىن ۇلعايتۋدى قامتاماسىز ەتۋگە مۇمكىندىك بەرەتىن تەڭدەستىرىلگەن قارجى-ەكونوميكالىق مودەل قۇرۋ مەملەكەتتىك ورگانداردىڭ وزەكتى مىندەتتەرىنىڭ ءبىرى بولۋعا ءتيىس. بۇل رەتتە ەڭ تومەنگى كۇنكورىس شاماسىنىڭ ءوزى حالىقتىڭ ناقتى ساتىپ الۋ قابىلەتىنە سايكەس كەلۋگە جانە ادامنىڭ بارىنشا از قاجەتتىلىكتەرىنە جاۋاپ بەرۋگە ءتيىس. بۇل جۇمىس باستالىپ كەتتى. وسى جىلدىڭ 1 -ساۋىرىنەن باستاپ اتاۋلى الەۋمەتتىك كومەك كورسەتۋ ولشەمشارتى ەڭ تومەنگى كۇنكورىستىڭ 50 دەن 70 پايىزىنا دەيىن ۇلعايتىلعانىن، ال تابىسى از وتباسىنان شىققان ءاربىر بالاعا الەۋمەتتىك كومەكتىڭ كەپىلدى مولشەرى بەلگىلەنگەندىگىن بىلەسىزدەر»، - دەدى گ. ءابدىقالىقوۆا ماجىلىستەگى ۇكىمەت ساعاتىندا.

وسى ورايدا، ول بۇل قادام اتاۋلى كومەكتىڭ مولشەرىن 2,5 ەسە ارتتىرۋعا مۇمكىندىك بەردى.

سونىمەن قاتار، دەپۋتات تابىسى از ازاماتتاردى قولداۋ سالاسىندا ورىن العان كەمشىلىكتەرگە توقتالدى.

«ءبىر قاراعاندا ءبارى جاقسى سياقتى. الايدا تابىسى از ازاماتتاردى قولداۋ شارالارىن ىسكە اسىرۋ جاڭا فورماتتاعى اتاۋلى كومەكتىڭ تيىمدىلىگىن تومەندەتەتىن ءبىرقاتار ەلەۋلى كەمشىلىكتەردى انىقتادى. ءبىرىنشى كەزەكتە، مەملەكەتتىك ورگاندار وقيعالاردىڭ بۇلاي وربۋىنە دايىن ەمەس بولىپ شىقتى. جۇيەلى جۇمىستىڭ بولماۋى سالدارىنان جاعىمسىز اسپەكتىلەرگە تاپ بولدىق. بۇل - جۇمىس ىزدەۋ ءۋاجىنىڭ ازايۋى، الەۋمەتتىك قامسىزداندىرۋدى ۇزاق ۋاقىت پايدالانۋ نيەتى، الەۋمەتتىك كومەكتى كوبىرەك الۋ ماقساتىندا وتباسى مارتەبەسىن نەمەسە تۇرعىلىقتى جەرىن فورمالدى تۇردە وزگەرتۋ.

جەرگىلىكتى جەرلەردە اكىمدىكتەر تابىسى از ازاماتتاردىڭ پروبلەمالارىن شەشۋگە كەلگەندە ومىرلىك قيىن جاعدايعا اكەپ سوققان سەبەپتەرگە تەرەڭ ۇڭىلمەيدى. مينيستر ءوز سوزىندە اتاپ وتكەندەي، اتالعان جاعدايدى شەشۋ ءۇشىن شارالار قابىلدانىپ، الەۋمەتتىك كومەككە مۇقتاجدىقتى ايقىنداۋ، ۋچاسكەلىك كوميسسيالاردىڭ ءرولىن كۇشەيتۋ ولشەمشارتتارى بەكىتىلدى.

وتباسىن جەكەدارا الىپ ءجۇرۋ تەتىگى وتباسىن الەۋمەتتىك قولداۋدىڭ جاڭا فورماتىنىڭ ءتۇيىندى ەلەمەنتى بولۋعا ءتيىس»، - دەدى دەپۋتات.

اۆتور: رۋسلان عابباسوۆ

سوڭعى جاڭالىقتار