قازاقستاننان مالايزيا مەن تۇركياعا قاتىنايتىن اۋە رەيستەرىنىڭ سانى ارتادى

نۇر-سۇلتان. قازاقپارات - تۇركيامەن اۋە قاتىناسى تۋرالى كەلىسىمگە قول جەتكىزىلدى. بۇل تۋرالى قازاقپارات ازاماتتىق اۆياتسيا كوميتەتىنە سىلتەمە جاساپ حابارلايدى.

«مەملەكەت باسشىسىنىڭ تاپسىرماسىمەن ەنگىزىلگەن «اشىق اسپان» رەجيمى اياسىندا تۇركيا اۋە كومپانيالارىنا قازاقستاننىڭ 11 اۋەجايىنا (نۇر-سۇلتان، الماتى، شىمكەنت، اقتاۋ، قاراعاندى، وسكەمەن، پاۆلودار، كوكشەتاۋ، تاراز، پەتروپاۆل، سەمەي) 5-«اۋە ەركىندىگىن» پايدالانۋ مۇمكىندىگىمەن رەيستەر سانىنا شەكتەۋلەردى الىپ تاستاۋدى كوزدەيتىن تۇراقتى ۇشۋلاردى ورىنداۋعا مۇمكىندىك بەرىلدى»، - دەلىنگەن كوميتەت حابارلاماسىندا.

تۇركيا تاراپى نۇر-سۇلتانعا، الماتىعا اۋە قاتىناسىن كەڭەيتۋدى قولدايدى جانە اقتاۋ مەن قوستانايعا تۇراقتى رەيستەر اشۋدى جوسپارلاپ وتىر، سونىمەن قاتار سالىنىپ جاتقان اۋەجاي پايدالانۋعا بەرىلگەننەن كەيىن ىستانبۇل-تۇركىستان باعىتى بويىنشا رەيستەردى اشۋعا العاشقى شەتەلدىك اۋە كومپانيالاردىڭ ءبىرى بولىپ قىزىعۋشىلىعىن راستادى. كەزدەسۋ قورىتىندىسى بويىنشا تاراپتار اۋە قاتىناسى سالاسىندا ءوزارا ءتيىمدى ىنتىماقتاستىقتى جالعاستىرۋعا شەشىم قابىلدادى.

سونداي-اق، قازاقستان مەن مالايزيا اراسىندا اۋە قاتىناسى كەڭەيەدى. CAN 2019 اياسىندا قازاقستاندىق دەلەگاتسيا مالايزيانىڭ اۆياتسيالىق بيلىكتەرىمەن كەلىسسوزدەر جۇرگىزدى.

«مالايزيا اۋە كومپانيالارىنا قازاقستاننىڭ 11 اۋەجايىنا (نۇر-سۇلتان، الماتى، شىمكەنت، اقتاۋ، قاراعاندى، وسكەمەن، پاۆلودار، كوكشەتاۋ، تاراز، پەتروپاۆل، سەمەي) 5- ءشى «اۋە ەركىندىگىن» پايدالانۋ مۇمكىندىگىمەن رەيستەر سانىنا شەكتەۋلەردى الىپ تاستاۋدى كوزدەيتىن تۇراقتى ۇشۋلاردى ورىنداۋعا مۇمكىندىك بەرىلدى»، - دەدى كوميتەتتىڭ باسپا ءسوز قىزمەتى.

ەسكە سالساق، ق ر پرەزيدەنتى تىكەلەي حالىقارالىق اۋە رەيستەرىنىڭ سانىن ارتتىرۋ قاجەتتىگى تۋرالى تاپسىرما بەرگەن بولاتىن.