الماتىدا اكادەميك ءرابيعا سىزدىقتىڭ كوپ تومدىق شىعارمالارى تانىستىرىلدى

الماتى. قازاقپارات- الماتىدا بەلگىلى تۇركىتانۋشى، پروفەسسور ءرابيعا سىزدىقتىڭ كوپتومدىق شىعارمالارىنىڭ تۇساۋى كەسىلدى، دەپ حابارلايدى قازاقپارات ءتىلشىسى.

ۇلتتىق عىلىم اكادەمياسىنىڭ اكادەميگى، فيلولوگيا عىلىمىنىڭ دوكتورى، پروفەسسور، تۇركيا «Dil Kurumu» لينگۆيستيكالىق اكادەمياسىنىڭ قۇرمەتتى مۇشەسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى، قر مەملەكەتتىك سىيلىعىنىڭ، شوقان ءۋاليحانوۆ اتىنداعى سىيلىقتىڭ، I دارەجەلى «بارىس» وردەنىنىڭ يەگەرى ءرابيعا سىزدىق بيىل 95 جاسقا تولدى.

وسى مەرەيتويعا وراي الماتىداعى ۇلتتىق كىتاپحانادا عالىمنىڭ 14 تومنان تۇراتىن شىعارمالارى تانىستىرىلدى.

اكادەميكتىڭ ءتىلتانىمدىق ەڭبەكتەرى - لاتىن گرافيكاسىنا نەگىزدەلگەن جاڭا ۇلتتىق الىپبيگە كوشۋ رەفورماسىنىڭ عىلىمي- تەوريالىق، عىلىمي- ادىستەمەلىك جۇمىستارىنىڭ وزەگى، ىرگەتاسى. مەملەكەت باسشىسى قاسىم- جومارت توقايەۆ قازاقستان حالقىنا جولداۋىندا «قازاق ءتىلى ۇلتارالىق قاتىناس تىلىنە اينالۋى» تيىستىگى تۋرالى ايتىپ وتكەن تاپسىرماسىنىڭ ورىندالۋىنا ءرابيعا سىزدىق ەڭبەكتەرىنىڭ قوسار ۇلەسى ەلەۋلى.

«ءرابيعا اپاي 1970-1980 -جىلدارى يدەولوگيا ءالى قاتاڭ، ياعني تۇركولوگيا، ءتىل تاريحىمەن شۇعىلدانۋعا بولمايتىن كەزدە بايتۇرسىنوۆ تانۋدىڭ، اباي تانۋدىڭ نەگىزىن قالادى. اباي تانۋدىڭ ۇلكەن سوزدىگىن شىعاردى. قوجا احمەت ياساۋي جونىندە دە ىرگەلى ەڭبەكتەر جازىپ، ياساۋي تانۋدىڭ نەگىزىن سوناۋ 1980 -جىلدارى قالادى. ول كەزدە دىنگە تىيىم سالىنعان تۇس بولاتىن. 14 تومنان تۇراتىن ەڭبەگىن جيناق ەتىپ شىعارۋ جۇمىسى بىرنەشە جىل بۇرىن باستالعان ەدى. الداعى ۋاقىتتا باسقا دا ەڭبەكتەرى شەتىنەن قوسىلا بەرەدى. ءار عالىمنىڭ قولجازبالارى، ءار كەزدە جازعان ەڭبەكتەرى كوپ. دەگەنمەن، ەڭبەكتەرىنىڭ باسىم كوپشىلىگى وسى تاڭدامالى جيناققا ەنىپ وتىر. ءرابيعا اپايىمىز قازىر ۇلكەن ارىستارىمىزدىڭ كوزى بولىپ ەسەپتەلەدى. ونى انا ءتىلىمىزدىڭ - اناسى دەپ ايتامىز»، - دەيدى ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك.

شارا ق ر ءبىلىم جانە عىلىم مينيسترلىگىنىڭ عىلىم كوميتەتى جانە ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ۇيىمداستىرۋىمەن ءوتتى.

اۆتور الما مۇقانوۆا