تۇركىستاندا ساۋلەتى ەرەكشە ەڭسەلى مەشىت بوي كوتەرەدى
تۇركىستان قالاسىنا كىرەبەرىستە الەمدەگى وزىق تاجىريبەلەردى ۇشتاستىرعان ەڭسەلى مەشىت بوي كوتەرەدى. ۇكىمەت باسشىسى اسقار مامين تۇركىستان وبلىسىنا ساپارى بارىسىندا وبلىس اكىمى ءومىرزاق شوكەيەۆپەن بىرگە وزبەكستان وكىلدەرىنىڭ قاتىسۋىمەن يسلام ورتالىعىنىڭ ىرگەتاسىن قالادى. ساۋلەتى ەرەكشە يسلام ورتالىعىنىڭ ىشكى جانە سىرتقى بەزەندىرىلۋى شىعىستىق ناقىشتا جۇرگىزىلمەك. مەشىت الداعى 2020 -جىلى اشىلادى.
«تاۋەلسىزدىك كۇنى قارساڭىندا قولعا الىنعان جاڭا جوبا جان- جاقتى زەردەلەنگەن. الەم ەلدەرىندەگى وزىق تاجىريبەلەر دە ەسكەرىلگەن. مەشىت ىرگەسىنىڭ بەرىك بولۋى ءۇشىن وزىندىك تەحنولوگيا ازىرلەندى. تۇركى الەمىنىڭ رۋحاني تەمىرقازىعى، قاسيەتتى تۇركىستان قالاسىندا سالىناتىن جاڭا عيبادات ورنىندا 5 مىڭ جاماعات ءبىر مەزگىلدە ساجدەگە باس تيگىزىپ، قۇلشىلىق ەتە الادى. مەشىت قۇرىلىسى زامان تالابىنا ساي وزىق ۇلگىدە جۇرگىزىلمەك. يسلام ورتالىعىنىڭ جالپى اۋماعى - 20000 شارشى مەتر» دەلىنگەن حابارلامادا.
«بۇل - باۋىرلاس ەكى ەل اراسىندا جۇزەگە اسىرىلىپ جاتقان يگىلىگى مول، ورتاق جوبا. ءدىني عيمارات ۇلى جىبەك جولى بويى مەن كونە شاھارعا كەلەتىن تۋريستەردىڭ قىزىعۋشىلىعىن ارتتىراتىن تاعى ءبىر ۇلكەن نىسانى بولادى. جالپى، قازاقستان مەن وزبەكستان قارىم- قاتىناسىنىڭ الەۋەتى زور. ىنتىماقتاستىعىمىز كۇننەن- كۇنگە نىعايىپ، ەكى ەل اراسىن جاقىنداستىرا بەرەتىنىنە سەنىمدىمىن. اللانىڭ راقىمى ءۇشىن جاسالعان جۇمىستىڭ ءدۇيىم ەلگە پايداسى دا مول بولسىن. بىرەگەي جوباعا قولداۋ كورسەتكەن وزبەكستان رەسپۋبليكاسىنىڭ پرەزيدەنتى شاۆكات ميرزيەۆكە ريزاشىلىعىمدى بىلدىرەمىن» ، - دەپ تىلەكتەستىگىن ءبىلدىردى تۇركىستان وبلىسىنىڭ اكىمى ءومىرزاق شوكەيەۆ.
وزبەكستان رەسپۋبليكاسى رەسمي وكىلدەرىنىڭ مالىمەتىنشە، اۋقىمدى جوباعا قۇرىلىس پەن ساۋلەت سالاسىنىڭ ەڭ ۇزدىك مايتالماندارى اتسالىسادى.
مەشىتتە مۇسىلماندىق جورالاردى جاسايتىن ورىندار، كونگرەسس- حولل، نەكە سارايى، 400 ورىندىق مەدرەسە، كىتاپحانا، اسحانا سالىنادى.