ق ر پرەزيدەنتى: قازاقستاندا جۇمىس ىستەيتىن نەمىس كومپانيالارى ءۇشىن قوسىمشا نارىققا شىعۋعا مۇمكىندىك اشىلادى
مەملەكەت باسشىسى جيىندا سويلەگەن سوزىندە تۇڭعىش پرەزيدەنت نۇرسۇلتان نازاربايەۆتىڭ باستاماسىمەن قۇرىلعان بەرلين ەۋرازيالىق كلۋبى ءوز ماڭىزدىلىعىن دالەلدەگەنىن اتاپ ءوتتى.
«اتالعان ديالوگ الاڭى قازاقستان مەن گەرمانيا، قازاقستان مەن ەۋروپا قاتىناستارىنىڭ الەۋمەتتىك- ساياسي جانە ەكونوميكالىق ماسەلەلەرىن كەڭ اۋقىمدا تالقىلاۋعا زور مۇمكىندىك بەرەدى. بۇل - ەلىمىزدىڭ ەۋروپاداعى العاشقى جوباسى. جاھاندىق تۇراقسىزدىق جاعدايىندا مۇنداي ينستيتۋتتىڭ ءرولى ارتا تۇسەدى دەپ سانايمىز» ، - دەدى مەملەكەت باسشىسى.
پرەزيدەنتتىڭ پىكىرىنشە، سوڭعى ءۇش جىل ىشىندە الەمدەگى گەوساياسي، گەوەكونوميكالىق احۋال ەلەۋلى وزگەرىستەرگە ۇشىرادى. سانكتسيالار مەن ساۋدا- ساتتىق شەكتەۋلەر ءداستۇرلى ديپلوماتيالىق قۇرالداردى ءجيى الماستىرا باستادى.
«الەمدىك ەكونوميكا ەلدەر مەن وڭىرلەردىڭ دامۋىندا ديسپروپورتسيا، تەحنولوگيالىق تەڭسىزدىك، قارجى جۇيەسىندەگى السىزدىك سياقتى «سوزىلمالى دەرتكە» تاپ بولۋدا. وسىنداي كۇردەلى جاعدايدا ەلىمىزدىڭ سىرتقى ەكونوميكالىق جانە ساۋدا ساياساتى اشىق، پراگماتيۆتى جانە قاراپايىم. قازاقستان ءارتۇرلى بىرلەستىكتەرمەن، ەلدەرمەن جانە كومپانيالارمەن ءوزارا ءتيىمدى ىنتىماقتاستىق ورناتۋ ءۇشىن اشىق بولىپ قالا بەرەدى» ، - دەدى قاسىم- جومارت توقايەۆ.
مەملەكەت باسشىسى قازاقستاننىڭ سىرتقى ساياساتتاعى باسىمدىقتارىنا توقتالىپ، ەۋروپا وداعىمەن قارىم- قاتىناستارعا باسا ءمان بەرەتىنىن ايتتى.
«ءبىز ەۋروپادا بولىپ جاتقان وقيعالاردى مۇقيات قاداعالاپ وتىرامىز، ەۋروپا كوشباسشىلارىمەن تۇراقتى تۇردە سىندارلى ديالوگ ورناتتىق. قازاقستان ەۋروپا وداعىنىڭ ورتالىق ازيا وڭىرىنە قاتىستى جاڭا ۇستانىمدارىنا قولداۋ كورسەتە بەرەدى. ءبىزدىڭ ەۋروپامەن ىقپالداستىعىمىز، نەگىزىنەن، گەرمانيامەن اراداعى ەكونوميكالىق، تاريحي، مادەني بايلانىستار بويىنشا ەرەكشەلەنەدى» ، - دەپ اتاپ ءوتتى قاسىم- جومارت توقايەۆ.
مەملەكەت باسشىسى فورۋم قاتىسۋشىلارىنىڭ نازارىن قازاقستاننىڭ قارقىندى ءوسىپ كەلە جاتقان ينۆەستيتسيالىق الەۋەتىنە اۋداردى.
«ءبىزدىڭ كورشى ەلدەرمەن تىعىز ينتەگراتسيامىز ىرگەلەس نارىقتارعا شىعۋعا قولايلى جاعداي جاسايدى. بۇگىندە 500 ميلليوننان استام ادام بىزبەن شەكارالاس كورشى ەلدەردە تۇرادى. ەۋرازيالىق ەكونوميكالىق وداق اياسىندا ەڭبەك قوزعالىسى، قارجىلىق قىزمەت كورسەتۋ، كاپيتال جانە ساۋدا سەكىلدى ءتورت ەركىندىك بويىنشا باسىمدىققا يە بولعىمىز كەلەدى. ورتالىق ازياداعى جاقىن كورشىلەرىمىزبەن تىعىز ىنتىماقتاستىعىمىزدى جالعاستىرا بەرەمىز. سوندىقتان قازاقستاندا جۇمىس ىستەپ جاتقان نەمىس كومپانيالارى ءۇشىن قوسىمشا نارىققا شىعۋعا مۇمكىندىك اشىلادى» ، - دەدى قاسىم- جومارت توقايەۆ.
پرەزيدەنتتىڭ ايتۋىنشا، ۇكىمەت اۋىل شارۋاشىلىعىنا، جاڭا تەحنولوگيالار مەن سيفرلىق قىزمەتتەر كورسەتۋ سالالارىنا نەمىس ينۆەستيتسياسىن تارتۋ ىسىنە قولداۋ كورسەتۋگە ءازىر.
«ءبىز «سيفرلىق قازاقستان» ارنايى مەملەكەتتىك باعدارلاماسىن قابىلدادىق. گەرمانياداعى فراۋنگوفەر ينستيتۋتى وسى ستراتەگيالىق باعدارلامانى ازىرلەۋگە قاتىستى. وڭىرىمىزدەگى بارلىق ستارتاپتارعا قولداۋ كورسەتۋ ماقساتىندا استانا- حاب جانە IT- ۋنيۆەرسيتەت اشتىق. 3 جىلدان كەيىن ەلىمىزدىڭ IT سالاسىندا دارىندىلار پۋلى قالىپتاسادى دەپ ۇمىتتەنەمىز. جالپى، ءبىز سيفرلاندىرۋ سالاسىندا ۇكىمەتتىك قۇرىلىمدار دەڭگەيىندە دە، جەكە كومپانيالار دەڭگەيىندە دە ىنتىماقتاستىق ورناتۋعا دايىنبىز» ، - دەدى قازاقستان پرەزيدەنتى.
قاسىم- جومارت توقايەۆ گەرمانيانى قازاقستاننىڭ ستراتەگيالىق سەرىكتەسى ەكەنىن تاعى دا اتاپ ءوتىپ، ەلىمىزدەگى نەمىس بيزنەسىنە ءتيىستى جاعداي جاسايتىنىن ايتتى.
«ءبىز سىزدەرگە بارىنشا جەڭىلدىكتەر جاساۋعا دايىنبىز. سونىڭ ىشىندە ارنايى ەكونوميكالىق ايماقتاردا سالىقتان بوساتۋ، ينفراقۇرىلىم ۇسىنۋ جانە باسقا دا جەڭىلدىكتەر بار. مەن «قازاقينۆەست» پەن قازاقستاننىڭ تىكەلەي ينۆەستيتسيالار قورىنا گەرمانيا ينۆەستورلارىمەن ىنتىماقتاستىق جاسايتىن ارنايى وفيس اشۋ جونىندە تاپسىرما بەردىم» ، - دەدى مەملەكەت باسشىسى.
گەرمانيا بيزنەسىنىڭ ەلىمىزدەگى جوبالارىن ىسكە اسىرۋعا «بايتەرەك» حولدينگى مەن قازاقستان دامۋ بانكى قولداۋ كورسەتەتىن بولادى.
«بۇل ەلىمىزدىڭ ينۆەستيتسيالىق جۇيەسى ءۇشىن جاڭا شارا بولىپ سانالادى. ءبىز بۇعان دەيىن ەشقانداي ەلگە مۇنداي جاعداي جاساعان ەمەسپىز. وسى باستاما دۇرىس ۇيىمداستىرىلعان جاعدايدا ۇكىمەت پەن ينۆەستورلار مۇنى ءتيىمدى جۇمىس ىستەيتىن تەتىككە اينالدىرادى دەپ سەنەمىن» ، - دەدى قاسىم- جومارت توقايەۆ.
بەرليندەگى АХІСА كونگرەسس- ورتالىعىندا وتكەن ءىس- شاراعا گ ف ر ۇكىمەتىنىڭ جوعارى لاۋازىمدى قىزمەتكەرلەرى، ساراپشىلار، جۋرناليستەر جانە نەمىس بيزنەسىنىڭ 250 دەن استام وكىلى قاتىستى.
