+7 (701) 759 90 19
17 °С : نۇر-سۇلتان
15 °С : الماتى
USD 405.69 EUR 455.51
RUB 5.72 CNY 57.42
جاڭالىقتار

ەلوردا كوشەلەرىنىڭ بىرىنە ءابىش كەكىلباي ۇلىنىڭ ەسىمى بەرىلدى

6 جەلتوقسان 12:41
:ءبولىسۋ
ەلوردا كوشەلەرىنىڭ بىرىنە ءابىش كەكىلباي ۇلىنىڭ ەسىمى بەرىلدى

نۇر-سۇلتان. قازاقپارات - ەلوردادا اتى اڭىزعا، تىرىسىندە ابىزعا اينالعان ءابىش كەكىلباي ۇلىنىڭ بۇگىن تۋعان كۇنى.

ءتىرى بولسا قازاقستاننىڭ حالىق جازۋشىسى، مەملەكەت جانە قوعام قايراتكەرى بۇگىن 80 جاسقا تولار ەدى، دەپ حابارلايدى قازاقپارات ءتىلشىسى.

جازۋشىنىڭ ەسىمىنە كوشە بەرۋ سالتاناتىنا مەملەكەتتىك حاتشى قىرىمبەك كوشەربايەۆ پەن نۇر-سۇلتان قالاسىنىڭ اكىمى التاي كولگىنوۆ قاتىستى. كوشە استانانىڭ سول جاعالاۋىندا ەكسپو اۋماعىنا جاقىن ماڭدا ورنالاسقان. ماڭگىلىك ەل كوشەسىمەن قيىلىسادى.

«بۇگىنگى كۇن - ۇلكەن قۋانىشتى ءسات دەپ ويلايمىن. ويتكەنى، تۇڭعىش پرەزيدەنتىمىز - ەلباسىنىڭ ۇسىنىسىمەن وسى ەۋرازيانىڭ تورىندە سارىارقانىڭ توسىندە جاڭا استانامىز سالىندى. ەلباسى كوتەرگەن وسى باستاماسىنا تىلەگىن قوسىپ، شىن جۇرەگىمەن نيەتىن ءبىلدىرىپ، قولداۋ كورسەتكەن ءابىش اعانىڭ اتىندا كوشە اشىلىپ جاتىر. ءبىز اللا تاعالاعا «ابەكەڭدى الىپ كەتتىڭ» دەپ وكپە ايتا المايمىز. قازاقتا وسىنداي ۇلى ابىز ادام بولعانى ءۇشىن راحمەت ايتايىق. ەكى عاسىردىڭ توعىسىندا، تاۋەلسىزدىكتىڭ ەلەڭ-الاڭ كەزەڭىندە تۇڭعىش پرەزيدەنتىمىز نۇرسۇلتان ءابىش ۇلى، ءابىش كەكىلباي ۇلى سەكىلدى ۇلى تۇلعالاردىڭ بولۋى - ءبىزدىڭ قازاققا اللانىڭ كورسەتكەن قولداۋى، جاقسىلىعى دەپ ەسەپتەيمىز. داڭعىلدىڭ بويىندا جۇرەتىن وسكەلەڭ ۇرپاق ءابىش كەكىلباي ۇلىنىڭ كىم ەكەنىن، وسى نۇر-سۇلتان قالاسىنىڭ نە ءۇشىن سالىنعانىن ەسكەرىپ، تاۋەلسىزدىگىمىزدى باياندى ەتۋگە ۇلەستەرىن قوسا بەرسىن دەپ تىلەيمىز»، - دەدى جيىن بارىسىندا قىرىمبەك كوشەربايەۆ.

مەملەكەتتىك حاتشى ءوز سوزىندە سالتاناتتى شاراعا كەلگەن جازۋشىنىڭ جارى كلارا جۇماباي قىزىن قۇتتىقتادى.

ءوز كەزەگىندە نۇر-سۇلتان قالاسىنىڭ اكىمى التاي كولگىنوۆ ەلوردا كوشەلەرىنىڭ بىرىنە ءابىش كەكىلباي ۇلىنىڭ ەسىمى بەرىلۋىن تاريحي وقيعاعا تەڭەدى.

«ەلباسىنىڭ قاسىندا جىلدار بويى سەرىك بولا ءجۇرىپ، قازاق ەلىن ماڭگىلىك ەل ەتۋگە ۇلكەن ەڭبەك ەتكەن اعامىز ماڭگى ەسىمىزدە بولارى ءسوزسىز. ءابىش اعامىزعا بۇگىن اس بەرىلىپ، كەشكە ەسكە الۋ كەشى وتەدى. بۇل - مەملەكەتىمىزدىڭ مادەنيەت قايراتكەرلەرىنە، جازۋشىلارعا، قازاق ەلىنىڭ بىرلىگىن كوتەرىپ جۇرگەن ازاماتتارعا دەگەن ۇلكەن قۇرمەت. سوندىقتان، بۇگىنگى ءىس-شارا بارشامىزعا قۇتتى بولسىن»، - دەدى قالا باسشىسى.

ايتا كەتسەك، ءابىش كەكىلباي ۇلى 1939-جىلى 6- جەلتوقسان كۇنى ماڭعىستاۋ وبلىسى ماڭعىستاۋ اۋدانى (بۇرىنعى گۋريەۆ وبلىسى) وڭدى اۋىلىنىڭ مىرزايىر دەگەن جەرىندە تۋعان. ارعى اتاسى جاڭاي ۇلى قوجانازار قازاقتار كوشىن ماڭعىستاۋعا باستاپ كەلگەن توپتان.

ءابىش كەكىلباي ۇلىنىڭ العاشقى ولەڭدەر جيناعى «التىن شۋاق» 1962-جىلى، «ءبىر شوكىم بۇلت» 1965-جىلى جارىق كوردى. اۋىل ومىرىنەن جازىلعان پوۆەست، اڭگىمەلەر جيناعى «دالا باللادالارى» — ءابىش كەكىلباي ۇلىنىڭ كەڭ تىنىستى ەپيك، سۋرەتكەرلىك بولاشاعىن تانىتادى. 1974-جىلى «داۋىرمەن بەتپە-بەت» سىن ماقالالار جيناعى، «ءبىر ۋىس توپىراق»، 1979-جىلى «تىراۋ تىراۋ تىرنالار»، ماڭعىستاۋ تۇبەگىنىڭ وتكەنى، بۇگىنى، بولاشاعى تۋرالى «ۇيقىداعى ارۋدىڭ ويانۋى» تاريحي تانىمدىق بايان، 1982-جىلى «شىڭىراۋ» پوۆەستەر جيناعى، 1992- 93-جىلدارى تاڭدامالى ەكى تومدىق، 1995-جىلى «زامانمەن سۇحبات» 1998-جىلى «ازاتتىقتىڭ اق تاڭى»، پۋبليتسيستيكالىق ماقالالارى، تولعامدارى، 1999-جىلى 12 تومدىق شىعارمالار جيناعى جارىققا شىقتى.

ءابىش كەكىلباي ۇلىنىڭ «ۇركەر» (1981)، «ەلەڭ-الاڭ» (1984) روماندارى قازاق ادەبيەتىنىڭ ۇلكەن تابىسى رەتىندە باعالانىپ، قازاق س س ر مەملەكەتتىك سىيلىعىن الدى.

2001-جىلى شىققان «تالايعى تاراز»، 2002-جىلى شىققان «شاندوز» تاريحي تاقىرىپتى عىلىمي دايەكپەن، دەرەكپەن تۇسىنىكتى ۇعىمدى ەتىپ جەتكىزۋدىڭ جاڭا باعىت-باعدارىن بەلگىلەپ بەردى. 2009-جىلى «سىر دەستە» دەپ اتالاتىن اۆتوردىڭ كوپ جىلدىق وي-تولعاۋلارى، ەسسە، ەستەلىك، سويلەگەن سوزدەرىنىڭ 5 تومدىق جيناعى جارىققا شىقتى. ءابىش كەكىلباي ۇلىنىڭ كوپتەگەن شىعارمالارى ت م د حالىقتارى مەن شەتەل تىلدەرىنە اۋدارىلعان. ول قاز س س ر مەملەكەتتىك سىيلىعىنىڭ 1986، قازاقستان رەسپۋبليكاسى پرەزيدەنتىنىڭ بەيبىتشىلىك جانە رۋحاني كەلىسىم سىيلىعىنىڭ 1995، «وتان» وردەنىمەن 1999، تۇركى ەلدەرى قاۋىمداستىعىنىڭ شەشىمىمەن «تۇركى دۇنيەسىنە سىڭىرگەن ەڭبەگى ءۇشىن سىيلىعىن» الادى. 2003-جىلى «قازاقستاننىڭ تۇڭعىش پرەزيدەنتى نۇرسۇلتان نازاربايەۆ» وردەنىمەن ماراپاتتالدى.

ءابىش كەكىلباي ۇلى 2015-جىلى جەلتوقساندا ومىردەن وزدى.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات