+7 (701) 759 90 19
16 °С : نۇر-سۇلتان
15 °С : الماتى
USD 405.69 EUR 455.51
RUB 5.72 CNY 57.42
جاڭالىقتار

تەاتر ونەرى جونىندەگى كوركەمدىك كەڭەستىڭ رەسپۋبليكالىق وتىرىسى ءوتتى

6 جەلتوقسان 10:03
:ءبولىسۋ
تەاتر ونەرى جونىندەگى كوركەمدىك كەڭەستىڭ رەسپۋبليكالىق وتىرىسى ءوتتى

نۇر-سۇلتان. قازاقپارات - نۇر-سۇلتان قالاسىنداعى ۇلتتىق اكادەميالىق كىتاپحانادا مادەنيەت جانە سپورت مينيسترلىگى جانىنداعى كوركەمدىك كەڭەستىڭ وتىرىسى ءوتتى، دەپ حابارلايدى قازاقپارات.

ءىس-شاراعا قازاقستان رەسپۋبليكاسى مادەنيەت جانە سپورت ۆيتسە-ءمينيسترى نۇرعيسا داۋەشوۆ، قازاقستان تەاترلار اسسوتسياتسياسىنىڭ پرەزيدەنتى اسانالى ءاشىموۆ، قازاقستان تەاتر قايراتكەرلەرى وداعىنىڭ ءتوراعاسى تۇڭعىشباي جامانقۇلوۆ، مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا، ەلىمىزدىڭ بارلىق وڭىرىنەن كەلگەن 50 دەن استام تەاتردىڭ باسشىلارى، كوركەمدىك جەتەكشىلەرى، زيالى قاۋىم وكىلدەرى قاتىستى.

جيىندا قازىرگى دراماتۋرگيانىڭ جاي- كۇيى، جەرگىلىكتى جەرلەردەگى حالىق تەاترلارىنىڭ احۋالى، تەاتر ماماندارىنىڭ بىلىكتىلىگىن ارتتىرۋ كۋرستارىن جانداندىرۋ، جوو مامان دايارلاۋ، كوركەمدىك كەڭەستىڭ تالقىلاۋىنا ۇسىنىلعان پەسالاردى ساراپتاۋ، تەاتر ونەرى سالاسىنا قاتىستى ءارتۇرلى ماسەلە تالقىلاندى. سونىمەن قاتار، باسقوسۋعا جينالعاندار بيىل ماۋسىم ايىندا مەملەكەتتىك ساتىپ الۋ تۋرالى زاڭعا ەنگىزىلگەن وزگەرىستەر جايىندا دا ۇسىنىستارىن ايتتى.

وسى رەتتە قازاقستان تەاترلار اسسوتسياتسياسىنىڭ پرەزيدەنتى اسانالى ءاشىموۆ بۇگىنگى وتىرىستا قىزۋ تالقىلانعان تاقىرىپتاردىڭ كوپشىلىگى بۇرىننان بەرى بار ەكەنىن، الايدا شەشىمىن تاپپاي كەلە جاتقاندىعىنا توقتالدى.

«دەگەنمەن، ماسەلەلەر بار ەكەن دەپ، قول قۋسىرىپ وتىرعان دا جارامايدى. ماسەلەن، 7-8 جىلدىڭ كولەمىندە تەاتر ساحناسىندا بەلگىلى ءبىر وبراز قالىپتاستىرعان اكتەر شىققان جوق. ءبارى تەك بەلگىلى ءبىر ءرولدى سومداۋدان ارى اسا الماي ءجۇر. ەگەر قوعامدىق قۇبىلىس تۋعىزىپ، كورەرمەن كوڭىلىنەن شىعاتىن تۋىندىلار سانى ارتسا قولداۋسىز قالمايدى»، - دەدى ول.

قازاقستان تەاتر قايراتكەرلەرى وداعىنىڭ ءتوراعاسى تۇڭعىشباي جامانقۇلوۆ وسىدان 15 كۇن بۇرىن قازاقستان تەاتر قايراتكەرلەرى وداعىنىڭ اتىنان ەلىمىزدەگى بارلىق تەاترلاردىڭ جاي-كۇيى مەن سالاداعى ماسەلەلەردىڭ سىرت قالماۋىن ايتىپ، مەملەكەتتىك حاتشىعا حات جولداعانىن جەتكىزدى.

«سونىمەن قاتار، ءبىز حاتتا تەاتر قىزمەتكەرلەرىنە جان-جاقتى قولداۋ كورسەتۋ كەرەكتىگىن، «قازاقستاننىڭ حالىق ءارتىسى»، «قازاقستاننىڭ ەڭبەك سىڭىرگەن ءارتىسى» دەگەن اتاقتاردى قايتارۋدى كوتەردىك. قازىر ءار ايماق ءوزىنىڭ فەستيۆالىن وتكىزە سالاتىن بولدى. تۇپتەپ كەلگەندە بۇل جاقسى ءۇردىس ەمەس. جالپى فەستيۆالدەر اياسىن كەڭەيتىپ، ساحنالاناتىن قويىلىمدار تەاتر قايراتكەرلەرى وداعى مەن قازاقستان تەاترلار اسسوتسياتسياسىنىڭ سۇزگىسىنەن ءوتىپ وتىرۋى كەرەك. ال وسى قوعامدىق ۇيىمدار مينيسترلىكپەن قويان-قولتىق جۇمىس ىستەگەندە عانا دراماتۋرگيانى دامىتا الامىز»، - دەدى ول.

ق. قۋانىشبايەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ديرەكتورى اسحات ماەميروۆ قازىر تەاتر سالاسىندا مەنەدجمەنتتى دامىتۋ كەرەكتىگىن تىلگە تيەك ەتتى.

«مەنەدجمەنت دەگەندە، ەۋروپا تەاترلارىنىڭ كورەرمەنمەن قالاي تىعىز قارىم-قاتىناس ورناتقانىن مىسالعا الۋعا بولادى. وسىلايشا، ونەر وردالارى جاناما تابىس كوزىن تاۋىپ، ءتۇيىندى جايتتەردى وزدەرى شەشەر ەدى»، - دەدى ا. ماەميروۆ.

جيىندى قورىتىندىلاي كەلە، مادەنيەت جانە سپورت ۆيتسە-ءمينيسترى اشىق ءارى ەركىن ديالوگ بولعانىن اتاپ ءوتتى.

«بۇگىن كوتەرىلگەن تاقىرىپتاردىڭ بارلىعى حاتتاماعا ءتۇسىرىلدى. ەندى وسى بويىنشا ءتيىستى ورگاندار جۇمىس ىستەيتىن بولادى. كەلەسى جيىندى كۇتىپ وتىرماي تەز ارادا ءىستىڭ شەشىمىن تابۋدى قامتاماسىز ەتۋ ماڭىزدى»، - دەدى نۇرعيسا داۋەشوۆ.

اۆتور: مارلان جيەمباي


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات