+7 (701) 759 90 19
-9 °С : نۇر-سۇلتان
-1 °С : الماتى
USD 385.55 EUR 426.57
RUB 6.05 CNY 54.77
جاڭالىقتار

ەلوردادا «ەڭبەك جولى» بايقاۋىنىڭ جەڭىمپازدارى ماراپاتتالدى

4 جەلتوقسان 19:55
:ءبولىسۋ
ەلوردادا «ەڭبەك جولى» بايقاۋىنىڭ جەڭىمپازدارى ماراپاتتالدى

نۇر-سۇلتان. قازاقپارات - ەلوردادا اۋلەتتەر مەن ءوندىرىس جۇمىسكەرلەرى اراسىندا جىل سايىن وتەتىن رەسپۋبليكالىق «ەڭبەك جولى» بايقاۋىنىڭ جەڭىمپازدارىن سالتاناتتى تۇردە ماراپاتتاۋ ءراسىمى ءوتتى، دەپ حابارلايدى قازاقپارات ءتىلشىسى.

تاۋەلسىزدىك سارايىندا وتكەن شاراعا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ، ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، ق ر پارلامەنتىنىڭ دەپۋتاتتارى، «اتامەكەن» ۇ ك پ- نىڭ، جۇمىسكەرلەر مەن جۇمىس بەرۋشىلەر رەسپۋبليكالىق بىرلەستىكتەرىنىڭ، جەرگىلىكتى اتقارۋشى ورگانداردىڭ وكىلدەرىمەن قوسا ەڭبەك ارداگەرلەرى جانە كونكۋرستىڭ وڭىرلىك كەزەڭىنىڭ لاۋرەاتتارى قاتىستى. شارا باسىندا بەردىبەك ساپاربايەۆ مەتسەناتتار مەن كاسىپكەرلەرگە «شاپاعات» مەدالىن، ق ر پرەزيدەنتى مەن پرەمەر-ءمينيسترىنىڭ اتىنان العىس حاتتاردى تابىس ەتسە، ق ر پارلامەنتى ءماجىلىسى الەۋمەتتىك-مادەني دامۋ كوميتەتىنىڭ ءتورايىمى گۇلشارا ءابدىحالىقوۆا ارداگەرلەرگە «ەڭبەك ارداگەرى» مەدالىن تابىس ەتتى.


«ادامدى ادام ەتكەن ەڭبەك. سوندىقتان، ءبىز مىنا وتىرعان ەڭبەككەرلەرگە باسىمىزدى يەمىز، زور العىسىمىزدى ايتامىز. مەملەكەتىمىزدىڭ تۇڭعىش پرەزيدەنتى نۇرسۇلتان نازاربايەۆ ايتقانداي، قازاقستاندىقتاردىڭ ءومىرىنىڭ جاقسارۋى، جاعدايلارىنىڭ تۇزەلۋى - ەڭبەككە بايلانىستى. سول سەبەپتى، مەملەكەت ءتيىستى جاعداي جاسايدى. «ەڭبەك» باعدارلاماسىنىڭ ەڭ نەگىزگى مىندەتى دە - قازاقستاندىقتاردىڭ ەڭبەك ەتىپ، وتباسىن اسىراۋعا، قازاقستاننىڭ ەكونوميكاسىن جاقسارتۋعا جاعداي جاساۋ»، - دەدى شارا بارىسىندا بەردىبەك ساپاربايەۆ.


ق ر ەڭبەك جانە حالىقتى الەۋمەتتىك قورعاۋ مينيسترلىگى اتالمىش شارانى جۇمىسشىلاردى كەڭىنەن تانىمال ەتۋ ماقساتىندا وتكىزىپ كەلەدى. بايقاۋ «ۇزدىك ەڭبەك اۋلەتى»، «جۇمىس ىستەيتىن جاستاردىڭ ۇزدىك تالىمگەرى» جانە «ءوندىرىستىڭ ۇزدىك جاس جۇمىسكەرى» اتتى ءۇش نوميناتسيادان تۇرادى. ۇمىتكەرلەردەن ءوتىنىم قابىلداۋ بيىل 1- ماۋسىمدا باستالعان. كونكۋرستىڭ وڭىرلىك كەزەڭىندە ءبىرىنشى نوميناتسيا بويىنشا – 90، ەكىنشى نوميناتسيا بويىنشا 144 جانە ءۇشىنشى نوميناتسيا بويىنشا – 154، بارلىعى 388 ادام باق سىنادى.


كونكۋرستىڭ رەسپۋبليكالىق كەزەڭىندە مينيسترىلك سايتىندا وتكىزىلگەن ونلاين داۋىس بەرۋ بارىسىندا «ۇزدىك ەڭبەك اۋلەتى» نوميناتسياسى بويىنشا 23 351، «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا 90156 جانە «ءوندىرىستىڭ ۇزدىك جاس جۇمىسكەرى» نوميناتسياسى بويىنشا 65822، بارلىعى 179329 داۋىس تۇسكەن.

وتانداستارىمىزدى كاسىبي جەتىستىكتەرگە ىنتالاندىرۋ جانە جاڭا ەڭبەك ديناستيالارىن قالىپتاستىرۋ ماقساتىندا بيىل مينيسترلىك سىيلىقتاردىڭ سانىن كوبەيتۋ تۋرالى شەشىم قابىلدادى. ەگەر وتكەن جىلدارى سىيلىقتار تەك نوميناتسيالار بويىنشا بەرىلگەن بولسا، بيىلدان باستاپ جەڭىمپازدار - 1,2 جانە 3 ورىن ءۇشىن ماراپاتتالاتىن بولدى.

«ۇزدىك ەڭبەك اۋلەتى» نوميناتسياسىندا ەلوردالىق ەڭسەبايەۆتار اۋلەتى ءبىرىنشى ورىنعا، شىعىس قازاقستان وبلىسىنان كەلگەن ساعاديەۆتەر اۋلەتى ەكىنشى ورىنعا، ال اتىراۋلىق جۇماعاليەۆتەردىڭ ۇستازدار اۋلەتى ءۇشىنشى ورىنعا يە بولدى. «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا اقمولا وبلىسىنىڭ ت ب ب (تەحنيكالىق باقىلاۋ ءبولىمىنىڭ) باقىلاۋشىسى مايرا يسايەۆا جەڭىسكە جەتسە، شىمكەنت قالاسىنىڭ سەمەنت ءوندىرۋ جونىندەگى ينجەنەر-تەحنولوگى ەسكەندىر رۇستەموۆ ەكىنشى ورىن الدى. قاراعاندى وبلىسىنىڭ اۋا ءبولۋ قوندىرعىلارىنىڭ اپپاراتشىسى داۋلەت ەجيبايەۆ ءۇشىنشى ورىندى قاناعات تۇتتى.

«ۇزدىك جاس ءوندىرىس جۇمىسكەرى» نوميناتسياسىندا سولتۇستىك قازاقستان وبلىسىنان كەلگەن جالپى پراكتيكا دارىگەرى يۋليا شيەۆچەنكو ۇزدىك اتانسا، قوستاناي وبلىسىنىڭ لوگيستيكا جانە قويما ساقتاۋ شەبەرى ۆلاديمير سامودۋروۆ ەكىنشى ورىنعا تۇراقتادى. ال پاۆلودار وبلىسىنان كەلگەن تەحنولوگيالىق ناسوس ءماشينيستى اسقار نۇرعاليەۆقا ءۇشىنشى ورىن بۇيىردى.

بايقاۋ جەڭىمپازدارى 1- ورىن ءۇشىن - 1 ميلليون تەڭگە، 2- ورىن ءۇشىن - 500 مىڭ تەڭگە جانە 3- ورىن ءۇشىن - 200 مىڭ تەڭگە كولەمىندە اقشالاي سەرتيفيكاتتارمەن ماراپاتتالدى.

سونىمەن قاتار، «كورەرمەندەر كوزايىمى» سىيلىعىنىڭ جەڭىمپازدارى دا انىقتالدى. وسىلايشا، «ۇزدىك ەڭبەك اۋلەتى» نوميناتسياسىندا اقتوبە وبلىسىنان كەلگەن ءىزباسوۆتاردىڭ مەتاللۋرگتەر اۋلەتى جەڭىسكە جەتىپ، «جۇمىس ىستەيتىن جاستاردىڭ ۇزدىك تالىمگەرى» نوميناتسياسى - باتىس قازاقستاندىق ۇستاز بايان كابيەۆاعا بۇيىردى. ال «ءوندىرىستىڭ ۇزدىك جاس جۇمىسكەرى» نوميناتسياسىندا جامبىل وبلىسىنىڭ ەلەكتريك-ينجەنەرى قۋانىش شىنىبەكوۆ توپ جاردى. اتالعانداردىڭ بارلىعى باعالى سىيلىقتارمەن ماراپاتتالدى.

«ەڭبەك جولى» بايقاۋىنىڭ جەڭىمپازدارىن قۇتتىقتاي وتىرىپ، ءبىرجان نۇرىمبەتوۆ مەملەكەتتىڭ جاڭعىرۋى مەن قوعامنىڭ دامۋىنداعى ەڭبەك ادامدارىنىڭ ماڭىزدى ءرولىن اتاپ ءوتتى.

«بۇل قۋانىشتى كۇنى وزدەرىنىڭ كۇندەلىكتى ەڭبەگىمەن قازىرگى قازاقستاننىڭ تاۋەلسىزدىگى مەن قالىپتاسۋىنىڭ كۋاگەرلەرى بولىپ قانا قويماي، نەگىزىن قالاعان ەڭبەك ارداگەرلەرى مەن ەڭبەك اۋلەتتەرىنىڭ باعا جەتپەس ۇلەسىن اتاپ وتكىم كەلەدى. سىزدەر شىنايى تالىمگەرلىك ينستيتۋتىنىڭ رۋحىن كوتەرىپ جۇرسىزدەر جانە جاستارعا وزدەرىڭىزدىڭ كاسىبي جانە ادامگەرشىلىك تاجىريبەلەرڭىزدى جەتكىزىپ، ولاردىڭ ەڭبەككە، جۇمىس ماماندىقتارىنا دەگەن سۇيىسپەنشىلىگىن ارتتىراسىزدار»، - دەدى ول.


باستى سوزدەر: بيلئك جانة ساياسات,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات