ۇستەل ويىندارىنىڭ ميعا پايداسى قانداي؟
ورتالىق جۇيكە جۇيەسى ەستە ساقتاۋ، وقۋ، جازۋ، ءتۇسىنۋ، قابىلداۋ، ۋاقىت كەڭىستىگىن سەزىنۋ سەكىلدى كوگنيتيۆتى قىزمەتكە جاۋاپ بەرەدى. ال بۇل جۇيە جۇمىسىنىڭ بۇزىلۋىنىڭ الدىن الۋ ءۇشىن ۇستەل ويىندارىن كوپ ويناۋ قاجەت. جاس كەزىندە شاحمات، ءتىپتى، كارتا سەكىلدى ويىندارعا اۋەس بولعانداردىڭ قارتايعان كەزدە العىرلىعى ساقتالىپ، ەستە ساقتاۋ قابىلەتىنىڭ قىزمەتى ناشارلامايدى. ەدينبۋرگ ۋنيۆەرسيتەتىنىڭ عالىمدارى ارنايى جۇرگىزگەن زەرتتەۋدىڭ ناتيجەسىندە وسىنداي قورىتىندىعا كەلگەن. زەرتتەۋگە جاس شاماسى 70 تەردەگى قارتتار قاتىسقان. زەرتتەۋ جۇمىستارى وسىدان 9 جىل بۇرىن باستالعان. 70 جاستاعى مىڭعا جۋىق ادامنىڭ جاڭا اقپاراتتى وڭدەۋ، شەشىم قابىلداۋ مەن ويلاۋ جىلدامدىعى تەكسەرىلگەن. ولار ءاربىر ءۇش جىل سايىن تەستتەن ءوتىپ وتىرعان. سوڭعى زەرتتەۋ كەزىندە قاتىسۋشىلاردان كارتا، شاحمات، لوتونى قانشالىقتى ءجيى ويناپ، كروسسۆورد شەشكەنى تۋرالى سۇراعان. عالىمدار زەرتتەۋگە قاتىسۋشىلاردىڭ 11 جاسىندا وتكەن زەردە تەستىنىڭ ناتيجەسىن نازارعا الا وتىرىپ ولاردىڭ ءومىر سالتىنا، ءبىلىم الۋىنا، قوعامداعى ستاتۋسىنا جانە دەنە شىنىقتىرۋعا قانشالىقتى ۋاقىت بولگەنىن سالىستىرعان.
ناتيجەسىندە جاس كەزىنەن باستاپ ۇستەل ويىندارىنا اۋەس بولعاندار قارتايعان كەزدە ەستە ساقتاۋ قابىلەتى مەن شەشىم قابىلداۋى الدەقايدا جاقسى ساقتالعان. بۇعان قاراپ ينتەللەكتۋالدى ويىنداردىڭ ادامنىڭ ورتالىق جۇيكە جۇيەسى جاۋاپ بەرەتىن كوگنيتيۆتى قىزمەتكە قالاي اسەر ەتەتىنىن بايقاۋعا بولادى. دەگەنمەن ۇستەل ويىندارىن باستاۋدىڭ ەرتە- كەشى جوق. قارت كىسىلەرگە دە ۋاقىت وزدىرماي ۇستەل ويىنىمەن دوس بولۋعا كەڭەس بەرەدى. سونداي- اق زەرتتەۋ بويىنشا ۇستەل ويىندارىنىڭ ەرەجەلەرى بىرنەشە ادامنىڭ قاتىسۋىن تالاپ ەتەدى. ولار ۇنەمى جاقىن قارىم- قاتىناستا بولىپ، ءبىر- بىرىمەن ارالاسىپ، ويىن ارقىلى تاجىريبە الماسادى. ال بۇگىنگى تاڭدا ءبىز ءبىر ۇستەلدە دوستارىمىزبەن نەمەسە جاقىندارىمىزبەن بىرگە جينالساق تا، نازارىمىز سماتفوندا بولادى ەكەن. بۇل ۇستەل ويىندارى ماڭىزدى قارىم- قاتىناس داعدىلارىن يگەرۋگە، قاتىناستى جاقسارتۋعا كومەكتەسەدى دەگەن ءسوز.
Massaget.kz