قاسىم-جومارت توقايەۆ: قوس بيلىك، تاندەم جوق - زاڭدى سايلانعان پرەزيدەنت بار
سۇحبات بارىسىندا قازاقستان پرەزيدەنتى ءتىلشىنىڭ ەلىمىزدەگى قوس بيلىك توڭىرەگىندەگى الىپ-قاشپا قاۋەسەتكە ناقتى جاۋابىن بەردى.
«رەسەيدەگى بيلىكتى بەرۋگە قاتىستى ايتۋ مەن ءۇشىن قيىن. سەبەبى ول باسقا مەملەكەت. قازاقستانعا قاتىستى ايتار بولسام، بۇل جەردە وزىنشە بولەك ساياسي يننوۆاتسيا ورىن الدى. نۇرسۇلتان نازاربايەۆ - زور قۇرمەتكە لايىقتى ادام، ۇلت كوشباسشىسى، قازاقستان رەسپۋبليكاسىنىڭ نەگىزىن قۇراۋشى. مەن زاڭدى سايلانعان پرەزيدەنت، مەملەكەت باسشىسى، جوعارعى باس قولباسشى سانالامىن. ءبىزدىڭ ارامىزدا ەشقانداي قاراما-قارسىلىق (كەيدە باسپا ءسوز بۇل تاقىرىپتا قاۋەسەتتى كوپىرتۋگە قۇمار) جوق. ءبىر-بىرىمىزبەن اقىلداسىپ وتىراتىندىعىمىزدى، ءتىپتى كەيدە مەن ونىڭ كەڭەسىن سۇرايتىندىعىمدى دا جاسىرمايمىن. بۇل جەردە قوس بيلىك، تاندەم جوق - زاڭدى سايلانعان پرەزيدەنت بار»، - دەدى قاسىم-جومارت توقايەۆ.
سونداي-اق، پرەزيدەنت سۇحبات بارىسىندا گەرمانياعا مەملەكەتتىك ساپارى بارىسىندا 2 ميلليارد دوللاردىڭ كەلىسىمىنە ءۇمىت ارتاتىنىن جەتكىزدى.
«قازاقستان ءۇشىن گەرمانيا نەگىزگى ەۋروپالىق سەرىكتەس سانالادى. گەرمانيانىڭ ورتالىق ازيامەن ساۋدا-ساتتىعىنىڭ 86 پايىزى قازاقستانعا تيەسىلى. ساپار بارىسىندا بولجامدى باعالاۋعا سايكەس شامامەن 2 ميلليارد دوللار بولاتىن كەلىسىمدەر مەن مەموراندۋمدار توپتاماسىنا قول قويىلادى دەپ ۇمىتتەنەمىن. جالپى، قازاقستاننىڭ ەۋروپالىق وداقپەن قارىم-قاتىناسى تەك قانا وڭ. 2018-جىلى قازاقستاننىڭ ە و- مەن ساۋدا-ساتتىعىنىڭ كولەمى 37 ميلليارد دوللاردان اسىپ جىعىلدى. بۇل ەلىمىزدىڭ بارلىق سىرتقى ساۋدا اينالىمىنىڭ جارتىسىنا تەڭ. ءبىزدىڭ ەكونوميكامىزداعى گەرمان ينۆەستيتسياسىنىڭ 80 پايىزدان استامى شيكىزاتتىق ەمەس سەكتورعا سالىنعان. بۇل وتە ماڭىزدى»، - دەدى مەملەكەت باسشىسى.
قازاقستان پرەزيدەنتى گەرمانيا بۇگىندە ماشينا جاساۋ، رەسۋرستىق ماتەريالداردى قايتا وڭدەۋ سىندى سالالاردا كوشباسشى بولىپ وتىرعاندىعىنا نازار اۋدارتادى.
«سوندىقتان ءبىز ىنتىماقتاستىققا مۇددەلىمىز. دەمەك، بارلىق قىزىقتى سالالار نەمىستىڭ الەۋەتتى ينۆەستورلارىنا ۇسىنىلاتىن بولادى. بۇعان قوسا، ءبىز ولارعا ارنايى شارتتار، ءوزىمىزدىڭ ونداعان ارنايى ەكونوميكالىق ايماعىمىزدان الاڭ ۇسىنامىز»، - دەدى قاسىم-جومارت توقايەۆ.