ەلوردادا داريعا نازاربايەۆانىڭ قاتىسۋىمەن قايىرىمدىلىق فەستيۆالى ءوتىپ جاتىر
بيىلعى فەستيۆالدى «دەگدار» گۋمانيتارلىق قورى جانە «قازاق كونسەرت» مەملەكەتتىك كونسەرتتىك ۇيىمى بىرلەسىپ وتكىزىپ وتىر.
داريعا نازاربايەۆانىڭ باستاماسىمەن جۇزەگە اسىپ جاتقان قايىرىمدىلىق جوبانىڭ ماقساتى - بالالار ءۇيىنىڭ تاربيەلەنۋشىلەرىنە ماتەريالدىق كومەك كورسەتىپ، بالالاردىڭ رۋحاني الەمىن بايىتۋ. فەستيۆال اياسىندا اۋىلدىق ەلدى مەكەندەردە ورنالاسقان ءتورت بالالار ۇيىنە قارجى جينالىپ، قايىرىمدىلىق كومەك كورسەتىلەدى. ولاردىڭ قاتارىندا اقمولا وبلىسىنىڭ اقكول اۋدانى ۋريۋپينكا اۋىلىنداعى «بالاباقشا - مەكتەپ - ينتەرنات» ارنايى كەشەنى، ش ق و ءبىلىم باسقارماسىنا قاراستى 8№ بالالار ءۇيى، قاراعاندى وبلىسى وساكاروۆكا اۋدانىنداعى جەتىم بالالار مەن اتا-انا قامقورلىعىنسىز قالعان بالالارعا ارنالعان مەكتەپ-ينتەرناتى، قوستاناي وبلىسى اكىمدىگى دەنساۋلىق ساقتاۋ باسقارماسىنىڭ ورتالىق نەرۆ جۇيەسى ورگانيكالىق زاقىمدانعان جانە پسيحيكاسى بۇزىلعان بالالارعا ارنالعان رۋدنىي مامانداندىرىلعان سابيلەر ءۇيى كىرىپ وتىر.
«بىلتىرعى فەستيۆال اياسىندا 52 ميلليون تەڭگە قاراجات جينالىپ، 209 بالاعا كومەك كورسەتىلدى. جينالعان قاراجات ەسەبىنەن اۋىلدى جەردە ورنالاسقان 4 بالالار ۇيىنە كومەك بەرىلدى. ال بيىلعى فەستيۆال بارىسىندا 315 بۇلدىرشىنگە جاردەم كورسەتىلەدى. بۇعان قوسا، تاعى 4 بالالار ءۇيىن ساپالى ءارى قاجەتتى قۇرال-جابدىقتارمەن قامتۋ جوسپارلانعان. قاجەتتى قاراجات ءالى دە جينالۋدا. ەلىمىزدىڭ كەز كەلگەن ۇيىمى مەن ازاماتى وسى يگى ىسكە ءوز ۇلەسىن قوسا الادى، - دەپ مالىمدەدى «دەگدار» گۋمانيتارلىق قورىنىڭ ديرەكتورى لاۋرا احمەتوۆا.
فەستيۆال ۋريۋپين اۋىلىنىڭ بالالار ءۇيى تاربيەلەنۋشىلەرىنە ارنالعان «Open space» ءىس-شاراسىمەن اشىلدى. «Open space» ەلىمىزدىڭ ەڭ ءىرى ونەر وشاعى - «قازاقستان» ورتالىق كونسەرت زالىندا ءوتتى. بالالار «ەرەكشە اكتەرلەر تەاترىنىڭ» قويىلىمىن، كەسكىندەمە ونەرى، قىش ونەرى جانە زاماناۋي بيلەر بويىنشا شەبەرلىك-كلاسستارىن تاماشالاپ، روبوتوتەحنيكا ۇيىرمەلەرىن، ۆيرتۋالدى جانە حيميا لابوراتوريالارىن كوردى. بۇعان قوسا، بالالار انيماتورلارمەن بىرگە قىزىقتى ويىندارعا قاتىستى. ءىس-شارا بارىسىندا بۇلدىرشىندەر كوپتەن بەرى ارمانداپ جۇرگەن سىيلىقتاردى الدى. بالالارمەن بۇل قۋانىشتى ءساتتى بولىسكەن داريعا نازاربايەۆا سىيلىقتاردى ءوز قولىمەن تابىستادى.
«مەن بۇگىن سىزدەرمەن كەزدەسىپ، باقىتتى جۇزدەرىڭىزدى كورگەنىمە قۋانىشتىمىن. بۇگىنگى ۇيىرمەلەرگە قاتىسقان بالالاردىڭ تالانتتى، بىلىمگە جانە زاماناۋي عىلىمدارعا قانشالىقتى قۇشتار ەكەندىگىن كوردىك. مەن سىزدەرگە بولاشاعى جارقىن، ماقساتى ايقىن تۇلعا رەتىندە ءوسىپ، بارلىق اسقاق ارماندارىڭىزدىڭ ورىندالۋىن تىلەيمىن. سىزدەردىڭ اينالىڭىزدا ءومىرىن بالا قامقورلىعىنا ارناپ، سىزدەرگە كۇندەلىكتى باقىت شۋاعىن سىيلاپ جۇرگەن كوپتەگەن جاقسى، مەيىرىمدى ادامدار بار. مەن ءارقاشان بالالاردىڭ قاسىنان تابىلاتىن تاربيەشىلەر مەن پەداگوگتارعا زور العىس بىلدىرەمىن»، - دەدى داريعا نازاربايەۆا.
فەستيۆال 7- جەلتوقسان كۇنى «قازاقستان» ورتالىق كونسەرت زالىندا وتەتىن ۇلكەن قايىرىمدىلىق كونسەرتكە ۇلاسپاق. كونسەرت داريعا نازاربايەۆا، مەدەت چوتابايەۆ، مەيىر باينەش، ءالفيا كارىموۆا، ازات مالىك، ازامات جەلتىركوزوۆ، «FORTE TRIO» مەملەكەتتىك تريوسى، «استانا وپەرا» تەاترىنىڭ حورى مەن سيمفونيالىق وركەسترىنىڭ قاتىسۋىمەن وتەدى. مەرەكەلىك كونسەرتتىڭ باعدارلاماسىنا تانىمال وپەرەتتالار مەن ميۋزيكلدەردىڭ اريالارى ەنگەن.
