مەكتەپ وقۋشىسى بانك كليەنتتەرىنە ىڭعايلى موبيلدى قوسىمشا جاسادى
ءوز جوباسىن جۇزەگە اسىرۋ ءۇشىن ليۋبوۆقا ۇيىمداستىرۋشىلار تاراپىنان 1000000 تەڭگەلىك سەرتيفيكات بەرىلدى.
حاكاتونعا قاتىسۋعا 550 دەن استام ءوتىنىم كەلىپ تۇسسە، ونىڭ 200 دەن استامى عانا ىرىكتەۋدەن وتكەن. رەسپۋبليكالىق بايقاۋدىڭ فينالى 29- قاراشا مەن 1- جەلتوقسان ارالىعىندا «قازاقستاننىڭ تۇرعىن ءۇي قۇرىلىس جيناق بانكىنىڭ» ۇيىمداستىرۋىمەن، «بايتەرەك» ۇلتتىق باسقارۋشى حولدينگى مەن «QazTech Ventures» كومپانياسىنىڭ قولداۋىمەن الماتى قالاسىندا ءوتتى.
«بايقاۋدىڭ باستى ماقساتى - جوبا ازىرلەۋشىلەر مەن بيزنەس-ينۆەستورلار اراسىنداعى الشاقتىقتى جويۋ» دەيدى ۇيىمداستىرۋشىلار. ولار حاكاتون قاتىسۋشىلارىنا بانك كليەنتتەرىنىڭ ۇيدەن شىقپاي-اق، قىزمەتتى ونلاين الۋىنىڭ باعدارلامالىق جاساقتاماسىن ويلاپ تابۋدى ۇسىندى. قاتىسۋشىلاردىڭ ۇسىنعان شەشىمدەرى ءتيىمدى، قاراپايىم جولمەن جۇزەگە اساتىن جانە كليەنتتەر ءۇشىن تۇسىنىكتى بولۋى ءتيىس دەگەن تالاپ قويىلعان.
ليۋبوۆ دۋدچەنكو جوبا بويىنشا سەرىكتەستەرى يلياس احمەتوۆ جانە ەسەنتاي قۇرمانبايەۆپەن بىرگە بانك ءۇشىن سالىمشى بونۋستارىن جيناپ، ءوزىنىڭ ۆيرتۋالدى ءۇيىن قۇراستىرا الاتىن ءموبيلدى قوسىمشا ازىرلەپ شىعارعان.
«بۇل بانك كليەنتتەرى سالىمىنىڭ قارقىنىن ارتتىرۋعا كومەكتەسەدى. سونىمەن قاتار، بۇل قوسىمشادا جەكە كۋالىكتى سكانەرلەۋدىڭ ارنايى فۋنكتسياسى بار. ونىڭ كومەگىمەن بانكتەگى كەزەكتى قىسقارتۋعا بولادى، سەبەبى ساۋالناما تولتىرۋ جانە كليەنتتەردىڭ مالىمەتتەرىن دەرەكتەر بازاسىنا جىبەرۋ اۆتوماتتى تۇردە جۇرگىزىلەدى»، - دەيدى ليۋبوۆ.