قاراعاندىدا قانداستار اراسىندا باسكەتبولدان حالىقارالىق تۋرنير ءوتتى
ق ر تۇڭعىش پرەزيدەنتى كۇنى قارساڭىندا ۇيىمداستىرىلعان حالىقارالىق سپورتتىق ءىس-شاراعا بارلىعى 18 كوماندا قاتىستى. ونىڭ التاۋى — ارداگەرلەر كومانداسى.
جاستارمەن ارداگەرلەردىڭ ويىنى ەكى بولەك ءوتتى. ارداگەرلەردىڭ ىشىندە 1- ورىنعا نۇر-سۇلتان قالاسىنىڭ كومانداسى شىعىپ، 100 مىڭ تەڭگە جەڭىپ الدى. 2- ورىندى قاراعاندى قالاسىنىڭ «وقجەتبەس» كومانداسى يەلەنىپ، 70 مىڭ تەڭگە ۇتىپ الدى. الماتى قالاسىنىڭ كومانداسى ءۇشىنشى ورىن ەنشىلەپ، 50 مىڭ تەڭگەمەن ماراپاتتالدى.
سونىمەن قاتار، جاستارىمىزدىڭ اراسىندا وتكەن ءدۇبىرلى دودادا شاحتينسك قالاسىنىڭ «دوستار team» كومانداسى ۇزدىك ويىن كورسەتىپ، كۋبوك، التىن مەدالمەن قوسا 100 مىڭ تەڭگەنى قانجىعاسىنا بايلادى. 2- ورىندا پاۆلودار قالاسىنان كەلگەن «دوستار» كومانداسى، ولار كىشى كۋبوك جانە كۇمىس مەدال، سونداي-اق 70 مىڭ تەڭگەنى ەنشىلەدى. نۇر-سۇلتان قالاسىنان كەلگەن «نۇر باسكەت» كومانداسى ءۇشىنشى ورىندى يەلەنىپ، كىشى كۋبوك، قولا مەدال جانە 50 مىڭ تەڭگەنى ەنشىلەدى. جانە دە سپورتتىق شاراعا قاتىسقان بارلىق كوماندالارعا اقشالاي قارجى مەن ماراپاتتار تابىستالدى.
قاراعاندى قالاسىنىڭ «دوستار team» كومانداسىنىڭ ويىنشىسى امانجول تىلەۋبەك ۇلى باسكەتبولدان وتكىزىلگەن ءىس شارا بۇعان دەيىن الماتى، نۇر-سۇلتان قالالارىندا وتكىزىلگەنىن جانە دە بۇل جارىس الدىڭعى وتكەن جارىستاردان قاراعاندا الدەقايدا اۋقىمى كەڭەيتىلىپ جوعارى دەڭگەيدە وتكىزىلىپ جاتقانىن ايتا كەتتى.
بۇل جارىستىڭ وتۋىنە قاراعاندىنىڭ بارشا جانى جومارت، كوڭىلى ءمارت ازاماتتارى اتسالىسىپ، قارجىلاي كومەك كورسەتتى.
تۋرنيردىڭ اياسىندا قانداستارىمىزدىڭ اتامەكەنگە كەلىپ وقۋىنا ۇلكەن ۇلەس قوسقان، حالقىنا ەڭبەگى سىڭگەن، جاقىندا ومىردەن وتكەن اقتىشقان ەركىن ۇلىنىڭ اتىنداعى ماراپات جانە اقشالاي سىيلىق ستۋدەنتتەر اراسىندا جوعارى دەڭگەيدە ويىن كورسەتكەنى ءۇشىن قاراعاندى مەملەكەتتىك ۋنيۆەرسيتەتىنىڭ ستۋدەنتى اردابەك مەرەكەبەك ۇلىنا تابىستالدى.