ءماجىلىس پەداگوگ مارتەبەسى تۋرالى زاڭ جوباسىن ەكىنشى وقىلىمدا ماقۇلدادى

None
None
نۇر- سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «پەداگوگ مارتەبەسى تۋرالى» زاڭ جوباسى ەكىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

«زاڭ جوباسى پەداگوگ قىزمەتىنىڭ وزەكتى الەۋمەتتىك جانە كاسىبي ماسەلەلەرىن شەشۋگە، پەداگوگتارعا جۇكتەمەنى ازايتۋعا، ولاردى كوپتەگەن تەكسەرۋلەردەن، سونداي- اق ولارعا ءتان ەمەس فۋنكسيالاردان قورعاۋعا، جۇمىس ىستەپ جۇرگەن پەداگوگتار ءۇشىن ىنتالاندىرۋ شارالارىن بەلگىلەۋگە، جاستاردى ماماندىققا تارتۋعا باعىتتالعان»، - دەدى دەپۋتات ءابدىماناپ بەكتۇرعانوۆ.

وسى ورايدا ول دەپۋتاتتىق كورپۋس ەنگىزگەن باستى تۇزەتۋلەرگە توقتالدى.

«2021 -جىلعى 1 - قىركۇيەكتەن باستاپ ورتا ءبىلىم بەرۋ ۇيىمدارى پەداگوگتارى ءۇشىن نورماتيۆتىك وقۋ جۇكتەمەسىن 18-دەن 16 ساعاتقا تومەندەتۋ جونىندەگى نورما بەكىتىلىپ وتىر. ءبىلىم بەرۋ سالاسىنداعى وكىلەتتى ورگان ايقىندايتىن تىزبە بويىنشا ءبىلىم الۋشىلار مەن تاربيەلەنۋشىلەر اراسىندا حالىقارالىق وليمپيادالاردىڭ، كونكۋرستار مەن سپورتتىق جارىستاردىڭ جەڭىمپازدارىن دايىنداعان پاداگوگقا ءتيىستى مەملەكەتتىك ءبىلىم بەرۋىنىڭ قىزمەتى تۇرعىسىندا ۇنەمدەۋ ەسەبىنەن ءۇش لاۋازىمدىق ايلىق اقى مولشەرىندە ءبىر جولعى جولعى سىياقىنىڭ تولەنۋىن كوزدەيتىن نورما ەنگىزىلەدى»، - دەدى ءا. بەكتۇرعانوۆ.

ونىڭ سوزىنە قاراعاندا، «قازاقستاننىڭ ەڭبەك سىڭىرگەن ۇستازى» قۇرمەتتى اتاعىمەن ماراپاتتالعان پەداگوگقا  1000 ەسەلەنگەن ايلىق ەسەپتىك كورسەتكىش مولشەرىندە ءبىر جولعى تولەم بەلگىلەنەدى.

مادەنيەت جانە سپورت سالاسىنداعى مەملەكەتتىك ءبىلىم بەرۋ ۇيىمدارىنىڭ جانە اسكەري وقۋ ورىندارىنىڭ مۇعالىمدەرىنە ماگيستر دارەجەسى ءۇشىن 10 ەسەلەنگەن ايلىق ەسەپتىك كورسەتكىش مولشەرىندە قوسىمشا اقى ەنگىزىلەدى.

«اۋىلدىق جەرلەردە جۇمىس ىستەيتىن پەداگوگتارعا جەكە تۇرعىن ءۇي قۇرىلىسى ءۇشىن جەر ۋچاسكەلەرىن باسىم تارتىپپەن بەرۋگە كەپىلدىك بەلگىلەنەدى»، - دەدى دەپۋتات.

سونىمەن قاتار، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەداگوگ مارتەبەسى، وقۋشى مەن مۇعالىمگە جۇكتەمەنى تومەندەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا ەكىنشى وقىلىمدا ماقۇلداندى. قۇجات پارلامەنت سەناتىنىڭ قاراۋىنا جىبەرىلەدى.

زاڭ جوباسىن قاراۋ بارىسىندا دەپۋتاتتىق كورپۋس ءبىرقاتار تۇزەتۋلەر ەنگىزدى.

«مەكتەپ جانە كوللەدج پەداگوگتارى تولتىرۋعا مىندەتتى قاعازداردىڭ تىزبەسىن ازىرلەۋ مەن بەكىتۋ جونىندەگى ءبىلىم بەرۋ سالاسىنداعى وكىلەتتى ورگاننىڭ قۇزىرەتى بەلگىلەنەدى. جوعارى وقۋ ورىندارىنىڭ پەداگوگتارىنان باسقا بارلىق پەداگوگتارعا اسكەري قىزمەتكە شاقىرۋدى كەيىنگە قالدىرۋ جونىندە نورما قاراستىرىلدى. بۇرىن كەيىنگە قالدىرۋ تەك اۋىلدىق جەردە جۇمىس ىستەيتىن پەداگوگتارعا كوزدەلگەن ەدى»، - دەدى ءابدىماناپ بەكتۇرعانوۆ.

اۆتور: رۋسلان عابباسوۆ

سوڭعى جاڭالىقتار