قازاقستانداعى جول قاۋىپسىزدىگىنە كىم جاۋاپتى؟

نۇر-سۇلتان. قازاقپارات - قىستىڭ العاشقى كۇندەرىنەن باستاپ ەلىمىزدەگى جول قوزعالىسى قيىنداي ءتۇستى. اسىرەسە قالالار مەن اۋىلداردى جالعاپ جاتقان ارالىق ءا دەگەننەن قارعا تولىپ، ارتى كوكتايعاققا اينالىپ جاتىر. مۇنداي جاعدايدا قوزعالىس قاۋىپسىزدىگىنە كىم جاۋاپتى؟

قاۋىپتىڭ الدىن الۋ شارالارى قالاي جۇرەدى؟

«نۇر- سۇلتان -  پاۆلودار» تاس جولى. جانتۇرشىگەرلىك جول اپاتتارى ءجيى تىركەلەتىن اۋماق. بىرەر جىل بۇرىن مەملەكەتتىك باعدارلاما بويىنشا ويقى- شويقى جەرلەرى تەگىستەلىپ، جولدىڭ جيەكتەرى كەڭەيتىلگەن بولاتىن. ءسويتىپ، قوس قالانى جالعاپ جاتقان ارالىق ءا دەگەننەن حالىقارالىق تالاپقا ساي اۆتوبانعا اينالىپ شىعا كەلدى. ءبىراق، بۇل ونىڭ بويىنداعى اپات سانى ازايدى دەگەندى بىلدىرمەيدى. بىزدە وسىنداي رەسپۋبليكالىق جولداردىڭ كۇتىمى مەن قاۋىپسىزدىگىن قاداعالايتىن ارنايى قىزمەتتەر بار. ولاردىڭ جۇمىسى اسىرەسە وسىنداي قار جاۋىپ، كۇن سۋىتقاندا قيىنداي تۇسەدى.

ماسەلەن، «نۇر- سۇلتان -  ەرەيمەنتاۋ -  شىدەرتى» ارالىعى اسا قاۋىپتى دەيدى. ويتكەنى تىم جازىق جەردە ورنالاسقان. سايكەسىنشە قار جىلدام جينالىپ، بوران اينالانى كورسەتپەي تاستايدى. وسىنداي كەلەڭسىزدىكتەردى ەسكەرگەن ماماندار بيىل 14 مىڭ توننا تۇز بەن 60 شارشى مەتر قۇم دايىنداپ قويىپتى. ايتۋلارىنشا، الداعى كوكتەمگە دەيىن جەتۋى كەرەك.

قاناعات مۇسايەۆ، جۇرگىزۋشى:

 - قىسى- جازى جولدى اشىپ ءبىتىرۋىمىز كەرەك. تازالىق ءبىزدىڭ موينىمىزدا. جولدى تازالايمىز. ەلگە جۇمىس ىستەيمىز عوي. جول قىزمەتىنىڭ تەحنيكالىق بازاسى جىل سايىن قولدان كەلگەنشە جاڭارتىلىپ تۇرادى. بيىلدىڭ وزىندە وسىلاي ونداعان تراكتور، اۆتوگرەيدەر جانە جۇك تيەيتىن كولىك ساتىپ الىنعان. ءبىراق، توتەنشە جاعداي كەزىندە تەحنيكانىڭ دايىندىعىنان بۇرىن، مامانداردىڭ ەپتىلىگى شەشۋشى ءرولدى اتقارادى. ويتكەنى، ولار وقيعا ورنىنا ەڭ ءبىرىنشى بولىپ جەتەدى.

 ايدىن ءابدىراحمانوۆ، «قازاق اۆتوجول» ج ش س باسقارماسىنىڭ باسشىسى:

 - تابيعاتتىڭ توسىن مىنەزىنە ءارقاشان دايىن بولۋعا تىرىسامىز. اسىرەسە، اۋا رايى كۇرت قۇبىلىپ، جاۋىنشاشىن مولشەرى ارتقان جاعدايدا ءبىزدىڭ ماماندار كۇشەيتىلگەن رەجيمدە جۇمىس جاسايدى. بۇعان قوسا، كورشى وبلىستاردا توتەنشە جاعداي بولىپ جاتسا قول ۇشىن بەرىپ، قوسىمشا كۇش پەن ارنايى تەحنيكالار جونەلتەمىز.

 سالا ماماندارى رەسپۋبليكالىق جانە ايماقتىڭ ماڭىزى بار تاس جولداردا كۇنى- ءتۇنى كەزەكشىلىك ەتەدى. قاۋىپتىڭ الدىن الۋعا تىرىسادى. قيىندىققا تاپ بولعاندارعا كومەكتەسەدى. ساقتانعاندى ساقتايدى دەگەن بار عوي. سوندىقتان بارلىق جاۋاپكەرشىلىك ەڭ الدىمەن ادامدار ءوز موينىنا جۇكتەلەتىنىن العا تارتادى. اسىرەسە الىس جولعا شىعاردا ارنايى حابارلاماردى ەسكەرىپ، تاۋەكەلگە باس تىگە بەرمەۋ كەرەك دەيدى.

www.24.kz