كوڭىلدى ءارى سەزىمگە تولى بولادى - ديماش ماسكەۋدەگى ەكىنشى كونسەرتىنە شاقىردى

الماتى. قازاقپارات - قازاقستاندىق ءانشى ديماش قۇدايبەرگەن ماسكەۋدە ەكىنشى كونسەرت بەرەدى، دەپ حابارلايدى قازاقپارات ءتىلشىسى.

بۇل تۋرالى ول ءوزىنىڭ Instagram جەلىسىندەگى پاراقشاسىندا جازدى.

«قىمباتتى دوستار! سىزدەردى قۋانا-قۋانا ماسكەۋدە، 2020 -جىلى 9 -ناۋرىزدا «مەگاسپورت» ارەناسىندا وتەتىن ءوزىمنىڭ كونسەرتىمە شاقىرامىن. بۇل كوڭىلدى، كرەاتيۆتى جانە سەزىمگە تولى بولادى! سىزدەردى كوكتەمنىڭ العاشقى مەرەكەلىك كۇندەرى ماسكەۋدە بولاتىن ءوزىمنىڭ شوۋىما شاقىرامىن. بيلەتتەر رەسەي بويىنشا تۋرنەدەگى بيلەتتەردى رەسمي ساتۋمەن اينالىساتىن ارىپتەس - www.icetickets.ru» سايتىندا»، - دەلىنگەن ءانشىنىڭ جازباسىندا.

بۇدان باسقا ديماش ەكىنشى كونسەرتىنىڭ سانسىز تىڭدارماندارىنىڭ سۇرانىسى بويىنشا وتەتىندىگىن اتاي كەتكەن.

ەسكە سالا كەتسەك، ماسكەۋدە 22 -ناۋرىزدا كرەمل سارايىندا ديماش قۇدايبەرگەننىڭ ءبىرىنشى جەكە كونسەرتى وتكەن ەدى. وعان ءانشىنىڭ شىعارماشىلىعىنا شىنايى بەرىلگەن الەمنىڭ 50 دەن استام ەلىنەن جانكۇيەرلەر كەلگەن بولاتىن.

سونداي-اق ديماش بۇدان بۇرىن 25 -ناۋرىز كۇنى پراگانىڭ «Tipsport-Arena» - سىندا وتەتىن چەحياداعى العاشقى جەكە كونسەرتىنە دە شاقىرعان ەدى.