تۇرىك عالىمىنىڭ ەلباسى تۋرالى جازعان كىتابىنىڭ تۇساۋى كەسىلدى
جيىندى حالىقارالىق تۇركى اكادەمياسى قازاقستان حالقى اسسامبلەياسىمەن بىرلەسىپ وتكىزىپ وتىر. شاراعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، قازاقستان حالقى اسسامبلەياسى ءتوراعاسىنىڭ ورىنباسارى جانسەيىت تۇيمەبايەۆ، ەلىمىزدەگى ءبىرقاتار ەلدىڭ ەلشىلەرى، پارلامەنت سەناتى مەن ءماجىلىسىنىڭ دەپۋتتارى، ديپلوماتيالىق ميسسيا، عىلىمي مەكەمەلەر مەن ءبىلىم وردالارىنىڭ باسشىلارى، مەملەكەت جانە قوعام قايراتكەرلەرى، تانىمال عالىمدار مەن زيالى قاۋىم وكىلدەرى قاتىستى.
«كوپتەگەن ەلدەرگە قاراساق، بەلگىلى ءبىر كەزەڭدەر ورلەۋ دە، قۇلدىراۋ دا بارىن تاريحتان كورەمىز. ءار مەملەكەتتىڭ بولاشاعى بىلىكتى كوشباسشىسىنا تىكەلەي بايلانىستى. بۇل تۇرعىدا قازاقستان باقىتتى مەملەكەت. كەڭەس وداعى ىدىراعان 1991 -جىلى رەسپۋبليكالار ءوز كۇندەرىن وزدەرى كورە باستادى. ەلباسى ەكونوميست، ساياساتكەر، مادەنيەتتانۋشى، رۋحاني باسشى ەسەبىندە بارلىق جۇكتى قاتار كوتەرە ءبىلدى. كورشى مەملەكەتتەرمەن سالىستىرساق، ءبىزدىڭ ەلدىڭ كوپ جەتىستىككە جەتۋىن - تاريحي فاكت دەپ ايتۋعا بولادى» ، - دەدى جيىن بارىسىندا جانسەيىت تۇيمەبايەۆ.
باسقوسۋدا بەلگىلى تۇركيالىق پۋبليتسيست، پروفەسسور كۋرشاد زورلۋنىڭ ەلباسى نۇرسۇلتان نازاربايەۆتىڭ كەمەڭگەرلىگى مەن ليدەرلىك قىرىن تەرەڭ زەردەلەگەن «نازاربايەۆ كوشباسشىلىعى: ۇلى دالانىڭ ورلەۋى» اتتى كىتابىنىڭ تۇساۋى كەسىلدى.
«قازاقستان مەن تۇركيا ەلىنىڭ «بىرلىك بولماي، تىرلىك بولماس» دەگەن ورتاق ءسوزى بار. سوندىقتان، جاڭا ءداۋىردىڭ جۇيەسى قازاقستان مەن تۇركيانىڭ ءبىر- بىرىمەن تىعىز بايلانىسىپ، جاقىنداسۋىن تالاپ ەتەدى. تۇرىك جۇرتى سىزدەردىڭ قىسقا ۋاقىت ىشىندە قول جەتكىزگەن جەتىستىكتەرىڭىزگە سۇيسىنە قارايدى. قىسقا ۋاقىت ىشىندە دامىعان ەلدەردىڭ قاتارىنا باسقاندارىڭىزدى ماقتان تۇتۋدا. قازاقستان تاۋەلسىزدىك العاننان كەيىن تۇركيادا قازاق تىلىندە سويلەيتىن ادامدار كوبەيدى. ەلباسى نۇرسۇلتان نازاربايەۆتى قازىرگى تاڭدا بۇكىل تۇرىك حالقى بىلەدى. ءبىز قازاقستاننىڭ دامۋىن - ۇلى دالانىڭ وركەندەۋى دەپ بىلەمىز» ، - دەدى كۋرشاد زورلۋ.
اۆتور كىتاپتى جازىپ شىعۋعا 10 جىلعا جۋىق ۋاقىتى كەتكەنىن ايتىپ ءوتتى. تىڭ تۋىندى 5 مىڭ دانامەن جارىققا شىعىپ وتىر.
«كىتاپتى جازۋعا نۇرسۇلتان نازاربايەۆتىڭ ءوز ەڭبەكتەرىن پايدالاندىم. ءوزىم ساياساتتانۋشى عالىم بولسام دا، بۇل كىتاپتى جازۋ وڭايعا تۇسكەن جوق. دەگەنمەن ويعا العان دۇنيە ومىرگە كەلدى. العاشقى نۇسقاسى قازاق تىلىندە جارىق كوردى. الداعى ۋاقىتتا وزگە تىلدەردە دە باسىلىپ شىعادى» ، - دەيدى اۆتور.
