س ق و تۇرعىنى قىرعاۋىل ءوسىرىپ، اڭشىلىق تۋريزمدى دامىتپاق

پەتروپاۆل. قازاقپارات - سولتۇستىك قازاقستان وبلىسى تايىنشا اۋدانىنىڭ تۇرعىنى اندرەي گلادكوۆ جابايى قۇستار فەرماسىن اشىپ، وڭىردە اڭشىلىق تۋريزمدى دامىتۋعا ۇلەسىن قوسپاق. تىڭ كاسىپتى قولعا العان فەرمەردى قازاقپارات ءتىلشىسى سوزگە تارتتى.

- جابايى قۇستار فەرماسىن اشۋعا نە سەبەپ بولدى؟

- وبلىستا جوق، ەلىمىزدە ىلۋدە ءبىر كەزدەسەتىن كاسىپپەن اينالىسقىم كەلدى. جالپى كاسىپكەرلىككە 2012 -جىلى بەت بۇردىم. سول جىلى ليزينگكە «گازەل» كولىگىن الىپ، جۇك تاسىمالىمەن اينالىسا باستادىم. العاشىندا جاقسى تابىس تاپتىم، كەيىن نارىقتا باسەكەلەستەرىم كوبەيدى. جۇمىس ىستەۋ قيىنداي ءتۇستى. سول كەزدە جاڭا بيزنەس- يدەيا تۋرالى ويلاي باستادىم. ەكى جىل باسىمدى قاتىردىم. ويتكەنى جاڭا كاسىپپەن تابىس تاۋىپ قانا قويماي، ودان ءلاززات العىم كەلدى. وسىلاي وي ۇستىندە جۇرگەنىمدە ماعان ءبىر جاقسى تانىسىم قىرعاۋىل جۇبىن سىيعا تارتتى. باسىندا ءمان بەرمەدىم. كەيىن بۇل قۇستارعا قىزىعۋشىلىعىم وياندى. ارنايى ادەبيەتتەر وقىدىم، ينتەرنەتتى اقتارىپ، قاجەتتى ماعلۇمات الدىم. وسىلايشا جابايى قۇستار فەرماسىن اشۋ يدەياسى تۋدى.

- قانداي جابايى قۇستار وسىرەسىزدەر؟

- ازىرشە قىرعاۋىل ۇستايمىز. بۇگىن فەرمادا 250-300 شاقتى قۇس بار. قورا- قوپسىمىز دايىن. جالپى بۇل كاسىپتە ەڭ قيىنى قۇستارعا ىڭعايلى ۆولەر سالۋ. ءبىر قۇسقا 2 شارشى مەتر جەر قاجەت. سونداي- اق، قىرعاۋىل اتالىعى 4-5 انالىعىمەن بولەك ۇستاۋ كەرەك. ۆولەرىنە دە قويىلاتىن تالاپتارى كوپ. جالپى قىرعاۋىلدىڭ سانىن باستاپقىدا مىڭعا جەتكىزىپ، كەيىن ءىسىمىز وڭعا باسسا 2-3 مىڭ قىرعاۋىل ۇستاماقشىمىن.

- قىرعاۋىل قۇسىن كۇتىپ- باپتاۋدىڭ ەرەكشەلىگى نەدە؟

- قىرعاۋىلدىڭ بىرنەشە ءتۇرى بار. مەندەگى تۇقىمى اڭشىلىق جانە رۋمىندىق دەپ اتالادى. ولاردىڭ سالماعى باسقالارىنا قاراعاندا ۇلكەن. ءارى ادەمى، قاۋىرسىنىنىڭ بوياۋى قانىق كەلەدى. اتالىق سالماعى 1,8 كەلىگە دەيىن بارادى. سونداي- اق، اسا قاتتى كۇتىمدى قاجەت ەتپەيدى. قىس بويى دالادا ۆولەردە تۇرادى. ولارعا قاتتى اياز تۇك ەمەس، تەك جەلدىڭ وتىندە جانە سۋدا تۇرماسا بولعانى. ءتۇرلى اۋرۋلارعا يممۋنيتەتى جوعارى. تاماقتى دا تالعامايدى. كوكونىس، جەمىس بەرەمىز. ءداندى داقىلداردى ءتۇرلى دارۋمەندەرمەن ارالاستىرىپ قورەكتەندىرەمىز. ءشوپ، ءتىپتى تارتىلعان ەت تە بەرەمىز، جاقسى جەيدى. تاماعى دۇرىس بولسا تەز جەتىلەدى. ءارى جاقسى جۇمىرتقالايدى، جىلىنا 50 گە جۋىق جۇمىرتقا سالادى.

- قۇستاردى قاي جاقتان ساتىپ اكەلدىڭىز؟

- ەرەسەكتەرىن اقمولا وبلىسىنان اكەلدىم. ال جۇمىرتقالارىن وسى ءوزىمىزدىڭ وبلىستا ساتىپ الدىم. «باستاۋ» مەملەكەتتىك باعدارلاماسىنىڭ تۇلەگىمىن. وسى جوبامدى قورعاپ، سول جەردە بەرگەن گرانتقا ينكۋباتور اكەلدىم. قىرعاۋىل جۇمىرتقالارىن سول اپپاراتتىڭ كومەگىمەن باستىرىپ شىعاردىم.

- قىرعاۋىل ەتىنىڭ ەمدىك قاسيەتى بارىن بارلىعىن بىلەمىز. ەتىنە سۇرانىس بار ما؟

- قىرعاۋىلدىڭ ەتى تاۋىقتىكىنە ۇقساس بولعانىمەن، ول سياقتى قۇرعاق ەمەس، ءدامدى. گيپواللەرگەندى ەت. قۇرامىندا 13 ءتۇرلى دارۋمەن، ادام اعزاسىنا قاجەت بارلىق مينەرالدى زاتتار بار. ءقازىر ەتىن ساتامىز. كەلىسى 2,5 مىڭ تەڭگە. ءبىراق، جاڭادان اشىلىپ جاتقاندىقتان كليەنتتەرىمىز كوپ ەمەس. ۇيلەرىندە ءوسىرۋ ءۇشىن الاتىندار بار. بولاشاقتا مەيرامحانالارمەن بايلانىس ورناتپاقشىمىز. كەلىسسوزدەر جۇرگىزىپ جاتىرمىز، ءارى ەتتى ۇلكەن مولشەردە جەتكىزۋگە ءبىزدىڭ ازىرشە قاۋقارىمىز جەتكىلىكسىز.

- باسىمدىقتى ەت وندىرىسىنە بەرمەكشىسىزدەر مە؟

- قازىر رەسەيدە اڭشىلىق قۇرۋعا ارنالعان دەمالىس ورىندارىنا قىزىعۋشىلىق جوعارى. اڭ اۋلاۋعا قۇمار جاندار بىزدە دە جەتەرلىك. اڭشىلىق شارۋاشىلىقتارىمەن بىرگە بولاشاقتا قىرعاۋىلعا اڭعا شىعۋدى ۇيىمداستىرعىم كەلەدى. ءبىزدىڭ اۋداندا بۇل جوبانى جۇزەگە اسىرۋعا بولادى. وڭىرگە تۋريستەردى تارتۋعا قولايلى، سول رەسەيدىڭ اڭشىلارى دا بىزگە كوپتەپ كەلەر ەدى. قاي ىستە بولماسىن ەڭ قيىنى باستاۋ عوي. ارمانىمدى جۇزەگە اسىرۋعا، جاڭا كاسىپتى باستاۋعا قولداۋ كورسەتكەن وتباسىما ريزاشىلىعىم شەكسىز. ولاردىڭ سەنىمى، قولداۋى ماعان كۇش بەرەدى.

- اڭگىمەڭىزگە راحمەت!