حالىققا قىزمەت كورسەتۋ: ءبىر عانا ءوتىنىش بەرىپ، بىرنەشە قىزمەتتى بىردەن الۋعا بولادى

نۇر-سۇلتان. قازاقپارات – ق ر پارلامەنتى ءماجىلىسىنىڭ دەپۋتاتى مايرا ايسينا حالىققا قىزمەت كورسەتۋ ورتالىقتارىنىڭ جاڭا قىزمەت كورسەتۋ تاسىلدەرىن ءتۇسىندىردى، دەپ حابارلايدى قازاقپارات ءتىلشىسى.

جاڭا وزگەرىستەر «ق ر كەيبىر زاڭنامالىق اكتىلەرىنە مەملەكەتتىك قىزمەتتەر كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىندا كورسەتىلگەن.

«مەملەكەتتىك قىزمەت كورسەتۋ سالاسىنداعى باستى جاڭالىقتاردىڭ ءبىرى - حالىققا قىزمەت كورسەتۋ ورتالىقتارىنىڭ «ءبىر تەرەزەدەن» «ءبىر ءوتىنىش» قاعيداتىنا كوشۋى. بۇل «كومپوزيتتىك» قىزمەت كورسەتۋ ءتاسىلى دەپ اتالادى. ياعني ازاماتتار ءبىر وتىنىشپەن بىرنەشە ىلەسپە قىزمەتتى كەشەندى تۇردە الا الادى. مىسالى، مۇگەدەك بالاسى بار اتا- انالار بالاسىنا مەديتسينالىق قىزمەت نەمەسە مەملەكەتتەن بەرىلەتىن ءدارى- دارمەك الۋ ءۇشىن 6 ءتۇرلى ارىز جازادى ەكەن. ەندىگى ۋاقىتتا ونىڭ سانى قىسقارىپ، ءبىر ءوتىنىش ارقىلى بىرنەشە قىزمەتتى ءبىر مەزەتتە الۋ مۇمكىندىگى بار» ، - دەدى دەپۋتات ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، بۇل جاڭا ءتاسىل ەلىمىزدىڭ بارلىق ح ق و- لارىندا پيلوتتىق رەجىمدە سىناقتان وتكەن.

«سونداي-اق، جاڭا وزگەرىستەر قاتارىندا مەملەكەتتىك قىزمەتتەردى پرواكتيۆتى تۇردە كورسەتۋ قاراستىرىلعان. ياعني، حقو ازاماتتىڭ ءوتىنىش بەرۋىن كۇتپەي-اق، قىزمەتتەردى ءوزى ۇسىنادى. مىسالى، ءسابي دۇنيەگە كەلگەندە ونى ەسەپكە الۋ، تۋۋ تۋرالى كۋالىك بەرۋ، بالاعا بەرىلەتىن جاردەماقىعا ءوتىنىش جانە نارەستەنى تۇرعىلىقتى مەكەنجايى بويىنشا تىركەۋ سەكىلدى قىزمەتتەر اۆتوماتتى تۇردە ءبىر مەزەتتە ۇسىنىلادى. بۇل قىزمەت بۇگىندە 120 مىڭ اناعا كورسەتىلدى»، - دەدى م. ايسينا.

ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ دەرەكتەرىنە سايكەس، بۇگىندە ەلىمىزدە 124 مەملەكەتتىك قىزمەت وڭتايلاندىرىلدى. ورتا ەسەپپەن ءاربىر مەملەكەتتىك قىزمەتتىڭ كورسەتىلۋ مەرزىمى 9 كۇنگە دەيىن قىسقارتىلدى. 

سونىمەن بىرگە، 90 نان استام قۇجات قىسقارتىلىپ، 82 مەملەكەتتىك قىزمەت كومپوزيتتى تۇردە بەرىلمەك.

ايتا كەتەيىك، 2019 -جىلدىڭ 7 -قاراشاسىندا پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەتتەر كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى. زاڭ جوباسى قازاقستان رەسپۋبليكاسىنىڭ مەملەكەتتىك كورسەتىلەتىن قىزمەتتەر سالاسىنداعى زاڭناماسىن جەتىلدىرۋ ماقساتىندا ازىرلەندى.

اۆتور: ايجان سەرىكجان قىزى