قىز بالاسى نەشە جاسىندا تۇرمىسقا شىعۋى كەرەك؟
نۇر-سۇلتان قازاقپارات - قازىرگى تاڭدا جايلى ادام بويىنان سىن مەن ءمىن ىزدەيتىن قانشاما جاس ازاماتتار جار ىزدەپ، شاڭىراق كوتەرۋگە اسىقپايدى.
قىزمەت جولىندا ءىسى تابىستى بولىپ، «وڭ بوساعادا» وتىرعان ارۋلارىمىزدىڭ دا سانى از ەمەس. بىرەۋ «جاقسى قىز جوق» دەسە، ەكىنشى جاق «جاقسى جىگىت» جوق دەپ جارىسادى. 25 جاستان اسقان سوڭ قىز دا، ۇل دا ادامنىڭ جامان جاعىن كورۋگە بەيىم كەلەدى. ءمىنسىز ادام بولمايتىنى بەلگىلى، الايدا ءومىر زاڭدىلىقتارىنان قاشپاي، باقىتتى عۇمىر كەشۋگە ۇمتىلۋ كەرەك.
قىز بالاسى قانشا جاسىندا تۇرمىسقا شىعۋعا دايىن بولادى؟
مامانداردىڭ ايتۋىنشا، كۇيەۋگە شىعۋعا ەڭ ىڭعايلى ۋاقىت 23-25 جاس ارالىعى. قولىندا ديپلومى بار، جۇمىسى دايىن بويجەتكەن وتباسىنىڭ شارۋاسىنا دا، قارجىلىق جاعدايىنا دا توتەپ بەرۋگە دايىن بولادى. سونىمەن قاتار پسيحولوگيالىق، فيزيكالىق جاعدايى دا ءدال كەلەدى. وسى ۋاقىتتا قىزدار انا بولۋدىڭ نە ەكەنىن جاقسى ءتۇسىنىپ، سەزىنەدى. انالىق ينستينكتەرى ويانىپ، كىشكەنە بالاعا دەگەن جاۋاپكەرشىلىكتەرى ارتا تۇسەدى.
ستاتيستيكانىڭ كورسەتكىشى بويىنشا 23-25 جاستا تۇرمىس قۇرعان قىزداردىڭ وتباسىندا باقىتتى ەكەنى، ءارى ءوز تاڭداۋلارىنا وكىنبەيتىنى دالەلدەنىپتى. وسى ءبىر ىڭعايلى جاستى كۇتۋ كەرەك پە، الدە تۇرمىسقا ەرتە شىققان دۇرىس پا؟
ءدىن شەڭبەرىندە پايعامبارىمىز س. ا. ۋ «ۇيلەنىڭدەر، كوبەيىڭدەر. مەن سەندەردىڭ ۇممەتتەرىڭمەن ماقتانايىن» دەگەن. جاسى ۇلكەن بە، كىشى مە، باي ما، كەدەي مە ءبارىبىر، ەر مەن ايەلگە ۇيلەنىپ، ءۇي بولۋ پارىز. ماسەلە جاستا ەمەس، باستا. وتباسىنىڭ بۇتىندىگىن ساقتاۋ ءۇشىن، يمان، سانا، اقىل، پاراسات كەرەك. بۇگىندە ەرتە ۇيلەنسەڭ ەرتە اجىراسىپ كەتەسىڭ نەمەسە 18 جاسىڭدا تۇرمىسقا شىقساڭ سول ءۇيدىڭ وتىمەن كىرىپ، كۇلىمەن شىعاتىنداي ۇيرەنىسىپ كەتەسىڭ دەپ ەكى ءتۇرلى پىكىردى ايتىپ جاتادى. شىن مانىسىندە، ول ادامنىڭ جاسىنا بايلانىستى ەمەس. ول ادامنىڭ اقىل- ويى، سانا سەزىمىنە بايلانىستى.