يران ەۋرو وداقتان تىم بولماعاندا بالالار ءدارىسىن ساتۋدى سۇرادى

نۇر-سۇلتان. قازاقپارات - يراننىڭ سىرتقى ىستەر ءمينيسترى موحامماد دجاۆاد زاريف ەۋرو وداققا وكپەسىن ايتتى. ديپلومات وداقتى ەۋروپالىق كومپانيالارعا يرانعا ءومىر ءۇشىن ماڭىزدى ءدارى- دارمەكتى ساتۋعا رۇقسات بەرۋگە ۇندەدى.

«وتىرىپ الىپ، ۇركىتىپ قورقىتا بەرگەنشە ەۋرو وداق قاراپايىم نارسەدەن باستاعانى ءجون بولار ەدى. تىم بولماعاندا Mölnlycke Health Care  (شۆەتسيالىق ءدارى- دارمەك ءوندىرۋشى كومپانيا. - رەد.) ءدارى ساتۋدى باستاسىن، سوندا بۋلليەزدى ەپيدەرموليزبەن اۋىراتىن بالالار سول ءدارىنى جارالارىنا جاعىپ، ەمدەلەر ەدى»، - دەپ جازدى Twitter پاراقشاسىندا موحامماد دجاۆاد زاريف.

زاريف ەۋروپالىقتار ءۇشىن بۇل «بولماشى عانا ادامي مىندەت» ەكەنىن اتاپ ءوتتى. ال قازان ايىنىڭ سوڭىندا زاريف ۆاشينگتوننىڭ يراندى «ەكونوميكالىق تەرروريزمگە» ۇشىراتىپ وتىرعانىن مالىمدەدى. سەبەبى ا ق ش تەگەرانمەن ساۋدا جۇرگىزۋدىڭ ەلدەن ەرەك ەرەجەلەرىن ەنگىزگەن سوڭ يرانداعى قاراپايىم حالىقتىڭ جاعدايى ناشارلاي تۇسپەك. ويتكەنى تۇرعىندار ءۇشىن بۇل ارەكەت قاجەتتى ازىق- تۇلىك پەن ءدارى- دارمەكتى قولجەتىمسىز ەتتى.

 ايتا كەتۋ كەرەك، بۋلليەزدى ەپيدەرموليز تۇقىممەن بايلانىستى تەرى اۋرۋى. بۇل دەرتكە شالدىققان بالالاردىڭ تەرىسى كوپىرشىكتەنىپ، سۋلانىپ، قاباتىنان ايىرىلىپ، سالبىراپ تۇسەدى. جالپى ءۇش ءتۇرى بولاتىن بۇل اۋرۋدى ەمدەمەسە اقىرى قيىنعا سوقتىرۋى مۇمكىن.

www.24.kz