ورتالىق ازيا ەلدەرى اراسىندا قازاقستاننىڭ ۋرباندالۋ دەڭگەيى جوعارى
بۇل تۋرالى بۇگىن ۇكىمەت وتىرىسىندا وڭىرلەردى دامىتۋدىڭ 2020-2025 -جىلدارعا ارنالعان مەملەكەتتىك باعدارلاماسىنىڭ جوباسىن تانىستىرعان ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«بۇگىندە 17 وڭىردە 87 قالا مەن 6,5 مىڭ اۋىل بار. 2015 -جىلدان باستاپ ۋرباندالۋ دەڭگەيى 58,2 پروتسەنتكە دەيىن ءوستى. ميلليون تۇرعىنى بار قالالار سانى 3-كە جەتتى. نەگىزگى كاپيتالعا سالىنعان ينۆەستيتسيالار 18 ءىرى قالادا 1,5 ەسە ارتتى. «قازاقستان-2050» ستراتەگياسى جانە قازاقستان رەسپۋبليكاسىن 2025 -جىلعا دەيىن دامىتۋدىڭ ستراتەگيالىق جوسپارى اياسىندا وڭىرلىك ساياسات باسىمدىعى باسقارىلاتىن ۋرباندالۋدى قامتاماسىز ەتۋ بولىپ سانالادى» ، - دەدى مينيستر.
ونىڭ اتاپ وتۋىنشە، جاڭا باعدارلامادا ەلدىڭ دامۋى ءۇشىن ماڭىزدى ينستيتۋتسيونالدىق جاعدايلار ايقىندالعان. بۇل - ەكونوميكالىق ءوسۋ «ورتالىقتارىن» قالىپتاستىرۋ، وڭىرلەردىڭ باسەكەگە قابىلەتتىلىگىن ارتتىرۋ، بارلىق وڭىرلەردە بازالىق ءومىر ءسۇرۋ دەڭگەيىن قامتاماسىز ەتۋ.
«باعدارلامانى ازىرلەۋدىڭ نەگىزى وڭىرلەردىڭ ەكونوميكالىق باسەكەگە قابىلەتتىلىگىن ارتتىرۋ جانە حالىقتىڭ ءومىر ءسۇرۋ ساپاسىن جاقسارتۋ بويىنشا ەلباسى جانە مەملەكەت باسشىسىنىڭ تاپسىرمالارى بولىپ سانالادى. بۇگىندە الەمدىك جالپى ىشكى ءونىمنىڭ 70 پايىزى ءىرى قالالاردا قۇرىلادى. بۇل - جاھاندىق ترەند. رەسۋرستار مەن ينفراقۇرىلىمدى شوعىرلاندىرۋ ارقىلى عانا جوعارى ەكونوميكالىق وسىمگە قول جەتكىزۋگە بولادى»، - دەدى ر. دالەنوۆ.
ءمينيستردىڭ ايتۋىنشا، ەلدەردىڭ باسەكەگە قابىلەتتىلىگى زاماناۋي ءىرى قالالاردىڭ بولۋىمەن ايقىندالادى. ۋرباندالۋ شيكىزاتتىق ەمەس جالپى ىشكى ءونىمدى ارتتىرادى.
«ورتالىق ازيا ەلدەرى اراسىندا قازاقستاننىڭ ۋرباندالۋ دەڭگەيى ەڭ جوعارى - 58,2 پايىز. الايدا ول ەكونوميكالىق ىنتىماقتاستىق جانە دامۋ ۇيىمى ەلدەرىنە قاراعاندا تومەن. ول ەلدەردە بۇل كورسەتكىش 77 پايىزى قۇرايدى. ۋرباندالۋ دەڭگەيىن 1 پايىزعا ارتتىرعاندا جالپى ىشكى ءونىمنىڭ ءوسىمى 0,12 پايىزعا جەتەدى. سايكەسىنشە، ۋرباندالۋ دەڭگەيى جوعارى بولعان سايىن حالىقتىڭ تابىسى دا جوعارى بولادى»، - دەدى ول.
اۆتور: مارلان جيەمباي