پاۆلوداردا ۇلى اباي مەن اقىن ەستايعا ەسكەرتكىش ورناتىلادى
دەپ جازادى قازاقپارات Saryarqa samaly گازەتىنە سىلتەمە جاساپ.
بىلتىر ەلىمىز اتاقتى ەستاي بەركىمباي ۇلىنىڭ 150 جىلدىعىن كەڭ كولەمدە اتاپ ءوتتى. بۇل ءۇردىس بيىل دا جالعاسىن تابۋدا. سوڭعى 9 جىلدان بەرى كوتەرىلىپ كەلە جاتقان، كورنەكتى ءانشى، اقىن- سازگەر، قاز س س ر- عا ەڭبەك سىڭىرگەن ونەر قايراتكەرى ەستاي اقىنعا ارنالعان ەسكەرتكىش ماسەلەسى وڭ شەشىمىن تاپتى.
- ەستاي بەركىمباي ۇلىنا ارنالعان ەسكەرتكىش كوپتەن بەرى اشىق تاقىرىپ كۇيىندە قالىپ كەلگەن ەدى. وبلىس باسشىسى بولات جۇمابەك ۇلىنىڭ قولداۋىمەن، ءوڭىردىڭ زيالى قاۋىمدارىنىڭ مۇرىندىق بولۋىمەن بۇل ماسەلە قايتا كوتەرىلىپ، وڭ شەشىمىن تاۋىپ وتىر. ءساتىن سالسا، 2020 -جىلى پاۆلودار قالاسىنىڭ كورىكتى جەرىنىڭ بىرىنەن ەستاي اتامىزعا ارنالعان ەسكەرتكىش بوي كوتەرەتىن بولادى، - دەدى پاۆلودار قالاسى مادەنيەت جانە تىلدەردى دامىتۋ ءبولىمىنىڭ باسشىسى سامال بەگالينوۆا.
ە. بەركىمباي ۇلىنىڭ ەسكەرتكىشىنىڭ نوبايىنا ارنالعان بايقاۋعا نۇر- سۇلتان، الماتى جانە قاراعاندى قالالارىنان 6 اۆتوردان 9 جۇمىس كەلىپ تۇسكەن.
- بۇگىنگى تاڭدا وبلىستىق كوميسسيانىڭ قاراۋىندا بولىپ، ۇسىنىلعان 9 جۇمىستىڭ 3- ۋى ىرىكتەلىپ، رەسپۋبليكاعا جىبەرىلدى. تاڭدالعان ءۇش جۇمىستىڭ بىرەۋى ەلوردالىق ازات بايارلينگە تيەسىلى بولسا، ەكى جۇمىس الماتىلىق دانيار سارباسوۆتىكى. ايتا كەتەرلىگى، دانيار - باياناۋىل ءوڭىرىنىڭ تۋماسى، ءوزىمىزدىڭ جەرلەسىمىز. ەندىگى شەشىم - رەسپۋبليكالىق كوميسسيانىڭ قۇزىرىندا، - دەدى پاۆلودار قالاسى مادەنيەت جانە تىلدەردى دامىتۋ ءبولىمىنىڭ سەكتور مەڭگەرۋشىسى مەيرام نۇعىمان.
ەستاي بەركىمباي ۇلىنا ارنالعان ەسكەرتكىشتى قالالىق ساياباقتىڭ ەستاي - اكادەميك بەكتۇروۆ كوشەلەرىنىڭ قيىلىساتىن تۇسىندا ورناتۋ ۇسىنىلعان ەكەن.
الايدا، ءوڭىر باسشىسى ەستايدىڭ ەسكەرتكىشىن قالانىڭ كورىكتى ءارى كوزگە بىردەن تۇسەتىن جەرىنە قويۋدى ۇسىنعان. الداعى ۋاقىتتا ەسكەرتكىش بوي كوتەرەتىن ورىننىڭ اۋىسۋى مۇمكىن. ال ونى ورناتۋعا بيۋدجەتتەن 50 ميلليون تەڭگە بولىنگەن.
مامىر ايىندا حاكىم اباي قۇنانبايەۆتىڭ 175 جىلدىعىن جوعارى دەڭگەيدە مەرەكەلەۋ تۋرالى جارلىققا ەل پرەزيدەنتى قاسىم- جومارت توقايەۆ قول قويىپ، ۇكىمەتكە ءبىرقاتار تاپسىرما بەرگەنى ەسىمىزدە. ول قاتاردا ابايدىڭ ەسكەرتكىشى جوق وڭىرلەرگە اقىننىڭ ءمۇسىنىن ورناتۋ دا بار ەدى.
- الداعى ۋاقىتتا اباي اتامىزدىڭ 175 جىلدىعىن مەرەكەلەۋ بويىنشا اتقارىلاتىن ىستەر از ەمەس. ولاردىڭ ىشىندە ەسكەرتكىش قويۋ ماسەلەسى باستى نازاردا. جۋىردا جاريالانعان بايقاۋعا نۇر- سۇلتان، الماتى، اقتوبە قالالارىنان جانە رەسەي استاناسى ماسكەۋدەن 9 اۆتوردان 11 جۇمىس كەلىپ ءتۇستى. ايماقتىق كوميسسيا مۇشەلەرى ولاردىڭ ىشىنەن 3 جۇمىستى تاڭداپ الىپ، رەسپۋبليكالىق كوميسسيانىڭ قاراۋىنا جىبەردى. مۇنداعى تاڭداپ الىنعان اۆتورلاردىڭ بارلىعى - باس قالانىڭ مۇسىنشىلەرى. ولار - اسقار نارتوۆ، توقتار ەرمەكوۆ جانە باقىتبەك مۇحامەدجانوۆ، - دەيدى م. نۇعىمان. سونىمەن، اباي قۇنانباي ۇلىنا ارنالعان ەسكەرتكىش وبلىس ورتالىعىنداعى اباي - كريۆەنكو كوشەلەرىنىڭ قيىلىسىندا ورناتىلادى دەپ كۇتىلۋدە. ەسكەرتكىش ورناتۋعا 70 ميلليون تەڭگە بولىنگەن.
بۇدان بولەك، پاۆلودارلىقتار نۇر- سۇلتان قالاسىنا اكادەميك قانىش ساتبايەۆتىڭ ەسكەرتكىشىن سىيعا تارتپاق. قانىش ەسكەرتكىشى بويىنشا دا وبلىستىق كوميسسيانىڭ وتىرىسى ءوتتى. وعان 7 اۆتوردان 7 نوباي ۇسىنىلعان. ولاردىڭ ىشىنەن نۇرسۇلتاندىق اسقار نارتوۆ پەن الماتىلىق ايدوس بۇركىتوۆتىڭ جۇمىستارى تاڭدالىپ الىنعان. ول دا رەسپۋبليكالىق كومياسىنىڭ قاراۋىنا جىبەرىلمەك.
اتالعان جۇمىستار بويىنشا پاۆلودار قالالىق اكىمدىگى Facebook پاراقشاسىندا بىلاي دەپ حابارلاما قالدىرعان:
- جۇمىس اۆتورلارىنا قانىش ساتبايەۆتىڭ وتانىنا شەكسىز سۇيىسپەنشىلىك، اباي قۇنانبايەۆتىڭ فيلوسوفيالىق ويىنىڭ تەرەڭدىگى جانە ەستاي بەركىمبايەۆتىڭ جانىنىڭ ليريكاسىن كورسەتۋ مىندەتتەلگەن. كەزدەسۋ قورىتىندىسى بويىنشا بولاشاق مونۋمەنتتەر جوبالارىنىڭ ۇزدىك نۇسقالارى ىرىكتەلدى، - دەلىنگەن جازبادا.
مامانداردىڭ ايتۋىنشا، رەسپۋبليكالىق كوميسسياسىنىڭ قورىتىندىسى الداعى اپتادا شىعۋى ءتيىس.
«بايقاۋ تۋرالى عالامتوردان وقىپ ءبىلدىم. تۋعان جەرىمدە قولعا الىنىپ جاتقان اۋقىمدى ىسكە ءوز ۇلەسىمدى قوسۋدى ماقسات ەتىپ، بىردەن 3 الىپتىڭ ەسكەرتكىشىنىڭ نوبايىن جاساۋعا كىرىستىم. قانىش ساتبايەۆتىڭ ەسكەرتكىشىنە 1، اباي قۇنانبايەۆقا 2، ەستاي بەركىمبايەۆقا 3 جۇمىسىمدى جىبەرگەن ەدىم. قازىر ەستاي اتامىزعا ارناپ سالعان 3 نوبايدىڭ ەكەۋى وبلىستىق كەزەڭنەن وتكەن ەكەن. ەگەر رەسپۋبليكالىق كوميسسيا مەنىڭ ەڭبەگىمدى باعالاپ، تۋعان قالامنىڭ تورىنەن مەنىڭ جۇمىسىمدى، ياعني ەستاي اتامىزدىڭ ەسكەرتكىشىن ورناتىپ جاتسا، بۇدان اسقان باقىت جوق!»، - دەيدى ءمۇسىنشى دانيار سارباسوۆ.
اۆتورى قارلىعاش حاشىم قىزى
فوتو: saryarka-samaly.kz