ەلورداداعى سۋپەرماركەتتەردىڭ بىرىندە ساتۋشىسى جوق كاسسا اشىلدى
بۇل تۋرالى قالالىق سىبايلاس جەمقورلىققا قارسى ءىس- قيمىل دەپارتامەنتىنەن ءمالىم ەتتى، دەپ حابارلايدى قازاقپارات.
ەلوردالىق كاسىپكەرلەر «ادالدىق الاڭى» جوباسىنىڭ باستاماسىنا قولداۋ ءبىلدىرىپ، «Мagnum» سۋپەرماركەتتەر جەلىسىنىڭ بىرىندە ساتۋشىسىز كاسسا اشىلدى.
جوبانىڭ ماقساتى - حالىق اراسىندا سەنىم مەن ادەپتىلىك اتموسفەراسىن نىعايتۋ جانە كليەنتتەرمەن جۇمىس كەزىندە كەدەرگىسىز جاعدايلار جاساۋ.
ۇيىمداستىرۋشىلاردىڭ ايتۋىنشا، كليەنت تولەمدى ساتۋشىنىڭ نەمەسە كەڭەسشىنىڭ كومەگىنسىز تەرمينال ارقىلى ءوز بەتىمەن جاسايدى.
«الەمدىك تاجىريبەدە، ءىرى ساۋدا سۋپەرماركەتتەرى وزىنە- ءوزى قىزمەت كورسەتۋ قاعيداسى بويىنشا سەلف- چەكاۋت (Self-Checkout) تەحنولوگياسىن قولدانادى. بۇل باستاما قوعامدا جەمقورلىققا قارسى مادەنيەتتى قالىپتاستىرۋعا جانە سىبايلاس جەمقورلىققا قارسى ءىس- قيمىل ۆەدومستۆوسىنىڭ نەگىزگى باعىتى بولىپ تابىلاتىن پاراساتتىلىق، ادالدىق جانە ادىلدىك قۇندىلىقتارىن ناسيحاتتاۋعا مۇمكىندىك بەرەدى»، - دەلىنگەن تاراتىلعان حابارلامادا.
ەستەرىڭىزگە سالا كەتەيىك، وسىنداي كاسسا بۇعان دەيىن الماتى قالاسىندا دا اشىلعان بولاتىن. الداعى ۋاقىتتا كاسسالار سانىن ۇلعايتۋ جوسپارلانۋدا.