ءسۇت - سۇيەكتى نىعايتادى

نۇر-سۇلتان. قازاقپارات - دەنساۋلىقتىڭ جاقسى بولۋىن جاس كەزدەن باستاپ-اق قولعا العان دۇرىس.

سۇيەك - ادامنىڭ قيمىل- قوزعالىسىنا ەڭ قاجەتتى اعزانىڭ ءبىرى. ونىڭ قۇرامىندا %50 سۋ، %12,5 وسسەين (جۇمساق، سەرپىندى ورگانيكالىق زات)، %21,8 مينەرالدى زاتتار (كالتسي فوسفاتى)، ال %15,7 ماي بولادى. وسسەين زاتى سۇيەككە سەرپىندى، يىلگىشتىك قاسيەت بەرەدى. جاس بالالاردىڭ سۇيەگىندە ورگانيكالىق زاتتاردىڭ مولشەرى كوپ بولسا، ادام جاسى ۇلعايعان سايىن سۇيەكتەگى ورگانيكالىق زاتتار ازايىپ، مينەرالدى زاتتار كوبەيەدى. ال مۇنىڭ سالدارى سۇيەكتىڭ يىلگىشتىك قاسيەتىنەن ايىرىلىپ، مورت سىنعىش بولۋىنا الىپ كەلەدى. نازارلارىڭىزعا سۇيەكتى نىعايتاتىن امال-تاسىلدەردى ۇسىنامىز.

سۇيەكتەر تىعىز جانە بورپىلداق دانەكەر ۇلپالاردان تۇزىلەدى. سىرتى تىعىز ۇلپا، ىشكى ءبولىمى بورپىلداق ۇلپادان قۇرالادى، سىرتىندا سۇيەك زاتىمەن تۇتاسىپ كەتكەن سۇيەك قابى بولادى. 

سۇيەك سىنعاندا بىرتىندەپ ءبىتىپ، قايتا قالپىنا كەلۋى دە سۇيەك قابىنا تىكەلەي بايلانىستى. وسى قابىندا قانتامىرلارى مەن جۇيكەلەر بولاتىندىقتان، سۇيەككە ۇدايى قورەكتىك زاتتار جەتكىزىلەدى. ەكى شەتىندەگى شەمىرشەكتى قاباتتاعى جاسۋشالاردىڭ بولىنۋىنەن سۇيەك ۇزارىپ وسەدى. 

قاڭقانىڭ تولىق سۇيەكتەنۋى 20-25 جاسقا دەيىن جالعاسادى. ەرەسەك ادام سۇيەگىنىڭ 2/3 بولىگىن بەيورگانيكالىق، ال قالعانىن ورگانيكالىق زاتتار قۇرايدى.

سۇيەكتى نىعايتۋدا، ونى قورەكتەندىرۋدە كالتسي قاجەت. دەگەنمەن دە بۇل ەلەمەنتتەن دايىندالعان پرەپاراتتار ءتۇرلى جولمەن دايىندالادى. ماسەلەن، ەڭ قولجەتىمدى كالتسي كورباناتى بارىنە بەلگىلى. الايدا ونىڭ زياندى تۇستارى دا بارشىلىق. پرەپارات بۇيرەككە تاس جينالۋدى ارتتىرادى، ارتريت پايدا بولادى. وسى ورايدا مۇنداي دارمەكتەردى پايدالانعاندا دارىگەرمەن كەڭەسىپ بارىپ قابىلداعان ءجون.

• 10-20 جاس ارالىعىندا ادامدارعا سۇيەكتى نىعايتۋدا تاعاممەن بىرگە 300 م گ كالتسي قاجەت. كەرەكتى ميكورەلەمەنتتەر قورىن اعارعان مەن كوكونىستەردىڭ قۇرامىنان الادى. ول ءۇشىن كۇنىنە 3 ستاقان ءسۇت ىشۋگە بولادى.

• 20-30 جاس ارالىعىنداعى جاندارعا كەرەكتى كالتسي كۇن سايىن 1000 م گ قۇراۋى ءتيىس. سونىمەن قاتار، قوسىمشا جاياۋ ءجۇرۋ مەن جۇگىرۋدى قولعا العان پايدالى.

• 35-50 جاس ارالىعىنداعى ادامدارعا دا كۇن سايىن 1000 م گ كالتسيدى تۇتىنۋعا كەڭەس بەرەدى. بۇل جاستا سۇيەك قۇرامىنداعى پايدالى زاتتاردان ايىرىلادى. ونى تولىقتىرۋدا مامانمەن كەڭەسىپ، ەم الۋدىڭ ارتىقتىعى جوق.

• 50 جاستان اسقاندا 1000 م گ كالتسي كۇن سايىن اس قۇرامىمەن اعزاعا تۇسكەنى دۇرىس. اپتاسىنا 3 رەت 20 مينۋتتىق سپورتپەن اينالىسۋ ارتىقتىق ەتپەيدى.

سۇيەكتى نىعايتۋدا مىناداي تاعام تۇرلەرىن تۇتىنۋعا بولادى.

1. كەمىندە ءبىر كۇندە 1 ليتر ءسۇت ءىشۋ ارقىلى سۇيەكتى نىعايتا الاسىز.

2. قىرىققابات جاپىراقتارىن ءجيى تۇتىنۋ جادىڭىزدا ءجۇرسىن.

3. ورىك نەمەسە كەپتىرىلگەن ورىك تە پايدالى. ونىڭ قۇرامىندا ماگني، فوسفور، مىرىش پەن كالي بار. تۇندە كەپتىرىلگەن ورىكتى تەرموسقا سالىپ، ۇستىنە سۋ قۇيىپ، جىبىتەدى. تاڭەرتەڭ جىبىتىلگەن ورىكتى جەڭىز. پايداسى كەرەمەت.

4. اسقاباق ءدانى مەن مايى دا شيپاسىن تيگىزەدى.

5. جۇمىرتقانىڭ قابىعى كالتسي قورىنا وتە باي. الدىمەن جۇمىرتقانى سۋعا قايناتىپ، قابىعىن ارشيدى. جاقسىلاپ كەپتىرىپ (پەشكە كەپتىرۋگە دە بولادى) ، مايدالاپ ۇگىتىپ، ۇنتاق دايىندايدى. ونى 8-10 كۇن توڭازىتقىشتا ساقتاۋعا بولادى. 1 اس قاسىقتان كۇنىنە 1 رەت ۇستىنە بىرنەشە ليمون ءسولىن تامىزىپ جەيدى. ەمدەلۋ ۋاقىتى 20-30 كۇن.

دەرەككوز: Reactor