اتىراۋدا تۇرمەدە وتىرعان قىز تۇرمىسقا شىقتى

نۇر-سۇلتان. قازاقپارات - جازاسىن وتەپ جاتقان قالىڭدىق بوستاندىقتاعى ءسوز بايلاسقان جىگىتىنە تۇرمىسقا شىقتى.

اتىراۋدا تۇرمەدە ۇيلەنۋ تويى ءوتتى. جازاسىن وتەپ جاتقان قالىندىق بوستاندىقتاعى ءسوز بايلاسقان جىگىتىنە تۇرمىسقا شىقتى. قوس عاشىقتىڭ تويىنا تۇزەتۋ مەكەمەسىندەگى قىزمەتكەرلەر عانا كۋاگەر بولدى. دەگەنمەن، ولاردىڭ ۇيلەنۋىنە اتا-انا، باۋىرلارى سىرتتاي قولداۋ بىلدىرگەن ەكەن، دەپ حابارلايدى Azattyq R‎hy « استانا» ارناسىنا سىلتەمە جاساپ.

مونشاقتارمەن كومكەرىلگەن اق كويلەك، ادەمى فاتا، ءساندى شاش ۇلگىسى. قالىڭدىق تا، كۇيەۋ جىگىت تە ساندەنىپ العان. ازاماتتىق حال اكتىلەرىن تىركەۋ مامانى نەكە كۋالىگىن تابىستاپ، جاس جۇبايلار نەكە ساقيناسىمەن الماستى. تەمىر توردىڭ ار جاعىندا دەمەسەڭ، بارلىعى ادەتتەگىدەي.

«مەن ەشقاشان تۇزەتۋ مەكەمەسىندە تۇرمىسقا شىعامىن دەپ ويلاعان جوقپىن. سوعان قاراماستان باقىتتىمىن. ونى سۇيەمىن جانە بولاشاعىمىز جارقىن بولادى دەپ ويلايمىن»، -  دەيدى جازاسىن وتەۋشى تاتيانا كيسەلەۆا.

كۇيەۋ جىگىت تە بۇرىن شالىس باسىپ، جازاسىن وتەپ شىققان. ول سۇيگەنىنە جاقىن بولۋى ءۇشىن اقتوبەدەن اتىراۋعا قونىس اۋدارىپ، وسىندا جۇمىسقا ورنالاسقان ەكەن. كەزدەسۋگە كەلىپ ءجۇرىپ، ناقتى شەشىمدى بيىل كوكتەمدە عانا قابىلداپتى. جاستاردىڭ جوسپارىنا اتا-انالارى قارسى بولماعان.

«انام قازىر سانك-پەتەربۋرگتە، اعام دا سوندا. ولار بىلەدى. ۋايىمداپ ءجۇر. قۋانىپ جاتىر. ءبىز تاتيانامەن ءبىر اۋداندا، ءبىر كوشەدە تۇردىق. مەن كوشەنىڭ باسىندا، ول اياعىندا تۇردى. ورتاق تانىستار، دوستار بولعاندىقتان كەزدەسىپ قالىپ جۇردىك. ءبىراق باسىندا ءبىر- بىرىمىزگە نازار دا اۋدارماپپىز. كەيىن جۇرەگىمىز بىرگە سوقتى. تاتيانانى ۇنەمى ويلاپ، ۋايىمدايمىن»، -  دەيدى اتىراۋ قالاسىنىڭ تۇرعىنى ۆاديم كۋجباەۆ.

تاتيانا ايەلدەر كوللونياسىنىڭ تىگىن سەحىندا جۇمىس ىستەيدى. تىگىنشىلىكتى تۇرمەدە ۇيرەنىپتى. ونىڭ ۇستىندەگى كوز تارتار قالىڭدىق كويلەگى، ءتىپتى فاتاسى، قولعابى مەن گۇلى دە وزىمەن بىرگە جازاسىن وتەپ جاتقان تاعدىرلاستارىنىڭ ەڭبەگى. ەكى كۇننىڭ ىشىندە تىگىپ بەردى دەدى. بولاشاعىنا سەنىمدى جاس-جۇبايلار تاتيانا بوستاندىققا شىققاندا دۇركىرەتىپ توي جاسايمىز، - دەيدى.

«مەنىڭ ەكى جىلىم قالدى. ءبىراق راقىمشىلىقتان ءۇمىتتىمىن. پرەزيدەنتكە راقىمشىلىق سۇراپ جازدىم»، - دەيدى تاتيانا.

ۋگ 157-دە 11 مەكەمەسى باسشىلىعىنىڭ ايتۋىنشا، تاتيانا تىگىن سەحى قىزمەتىنەن بولەك، مەكەمەدەگى بارلىق تاربيەلىك-مەرەكەلىك شارالارعا بەلسەنە قاتىسادى. وسىعان دەيىن 7 العىس حات الىپ ۇلگەرگەن.

«بۇل كىسى بۇرىن ايەل ازاماتشانى ولتىرگەن. ءوزىنىڭ بىرگە جۇرگەن تانىسى بولعان، ءارتۇرلى سەبەپتەرمەن وسىنداي جاعداي ورىن العان. بۇل كىسىگە 13 جىل مەرزىم بەرىلگەن. 13 جىلدىڭ جارتىسىن وتىردى. بۇل كىسىنىڭ 2 جىلدان كەيىن، 2022 -جىلى ۋاقىتىنان بۇرىن بوساتۋ مۇمكىندىگى بار. ول ۇسىنىستى جانە مىنەزدەمەسىن ءبىز سۋديالارعا جولدايمىز. سۋديالار بۇل كىسىنىڭ ومىربايانىمەن تانىسىپ، ءتارتىبى دۇرىس دەپ تاپسا، بوستاندىققا شىعۋى مۇمكىن»، -  دەدى ۋگ157/11 مەكەمە باستىعىنىڭ ورىنباسارى رۋسلان سۇلتانوۆ.

نەكە قيۋ راسىمىنەن سوڭ ۆاديم ۇيىنە قايتتى. ال تاتيانا وتريادىنا ورالدى. ەندى ولار ەكى اي سايىن ەكى كۇنگە كەزدەسىپ تۇرا الادى. قازىر مۇندا 100 دەن استام ايەل جازاسىن وتەۋدە. سوڭعى ەكى جىلدا 10 سوتتالۋشى ءوز قالاۋىمەن تۇرمىسقا شىققان.

ايتا كەتەيىك، سوتتالۋشىلاردىڭ 60 پايىزى 30 جاسقا دەيىنگى قىز-كەلىنشەكتەر.