داۋرەن ابايەۆ: ەرجان ماكسيمدى قولداۋدا بىزگە بىرلىك جەتپەي قالدى

نۇر-سۇلتان. قازاقپارات - ەرجان ماكسيم - ناعىز ءانشى دەگەن اتقا لايىق.

ول ونەرىنىڭ قانشالىقتى بيىك ەكەنىن دالەلدەپ قويماي، ەڭبەگىنىڭ ەرەن ەكەنىن دالەلدەپ وتىر.

ق ر اقپارات جانە قوعامدىق دامۋ ءمينيسترى داۋرەن ابايەۆ جاس ءانشىنىڭ پولشاداعى جەڭىسى جايلى ويىمەن ءبولىستى، دەپ حابارلايدى قازاقپارات ءتىلشىسى.

«ول ءوزىن كوپشىلىك اراسىندا ۇستاي بىلەدى. كاسىبي ءارى قۇزىرەتتى حالىقارالىق تورەشىلەر ءبىراۋىزدان جەڭىستى ەرجانعا بەردى. بايقاۋدىڭ قالعان قاتىسۋشىلارىنان ەرجاننىڭ بيىك تۇرعانى - ەشقانداي كۇمان تۋعىزبايدى. سول سەبەپتى، ول مەن ءۇشىن جەڭىمپاز»، - دەدى مينيستر «اشىق ديالوگ» باعدارلاماسىندا.

داۋرەن ابايەۆ ەرجاننىڭ جەڭىسىن - قوعام ءۇشىن تولاعاي ءىس تىندىرىپ جاتقان «حابار» اگەنتتىگىنىڭ بۇكىل كومانداسىنىڭ جەڭىسى دەپ باعالادى.

«البەتتە، ءاربىر مەملەكەت ءوز ۇلانىنا داۋىس بەرەدى. داۋىس بەرۋدە شىنايىلىق تۋرالى ءسوز قوزعاماي-اق قويۋعا بولادى. ونى جاقسى تۇسىنەمىز. وسى ءساتتى پايدالانا وتىرىپ، ەرجانعا داۋىس بەرگەن ازاماتتاردىڭ بارلىعىنا العىسىمدى ايتقىم كەلەدى. وكىنىشكە قاراي، ءبىزدىڭ ازاماتتاردىڭ داۋىس بەرۋدەگى بەلسەندىلىگى باسقا ەلدەرگە قاراعاندا باسەڭدەۋ بولدى. سايىپ كەلگەندە، ەرجان ەمەس - جەڭىلگەن ءبىزدىڭ كورەرمەن. جاس دارىندى قولداۋدا بىزگە بىرلىك جەتپەي قالدى. احمەت بايتۇرسىن ۇلى «ەرىم دەيتىن ەل بولماسا، ەلىم دەيتىن ەر قايدان شىعادى» دەگەن. ءسوزدى وسىمەن اياقتاۋعا بولادى»، - دەدى ول.

ەسكە سالا كەتسەك، پولشادا وتكەن «Junior Eurovision-2019» ءان بايقاۋىندا باق سىناعان قازاقستاندىق ەرجان ماكسيم ەكىنشى ورىن العان بولاتىن.

پرەزيدەنتى قاسىم-جومارت توقايەۆ ەرجان ماكسيمدى ءان بايقاۋىنداعى جۇلدەسىمەن قۇتتىقتادى.

اۆتور: ايان بەكەن ۇلى