يراكتان قايتارىلعان بالانىڭ اجەسى: ءتورت جاستاعى جيەنىمنىڭ كوزىنەن ەر جىگىتتىڭ قايعىسىن كوردىم

نۇر-سۇلتان. قازاقپارات - يراكتان قايتارىلعان بۇلدىرشىندەردىڭ ءبىرىنىڭ ناعاشى اجەسى تىلشىلەرگە سۇحبات بەرىپ، جيەنىنىڭ بوتەن ەلگە قالاي تاپ بولعانىن ايتىپ بەردى، دەپ حابارلايدى قازاقپارات ءتىلشىسى.

ايتا كەتسەك، ەلوردادا وتكەن باسپا ءسوز ءماسليحاتىندا سىرتقى ىستەر ءمينيسترىنىڭ ورىنباسارى ەرجان اشىقبايەۆ تىلشىلەرگە بالا مەن اجەسىنىڭ ەسىمىن اتاماي- اق قويۋدى ءوتىندى. «بالانىڭ ءومىرى الدا. زيانىن تيگىزىپ المايىق» دەپ ءتۇسىندىردى ول بۇل ءوتىنىشىن.

ال جيەنى جات جەردەن ورالعان اجە سىرتقى ىستەر مينيسترلىگى مەنى تۇراقتى حاباردا ۇستاعان كونسۋلعا العىسىن جاۋدىرۋمەن بولدى.

«2014 -جىلدىڭ سوڭىندا مەنىڭ قىزىم تۇركياعا جۇمىسقا كەتتى. اراب ءتىلىن جەتىك بىلەتىن. تۇڭعىش جيەنىم ول كەزدە ەكىدە ەدى. ەكىنشىسى التى ايلىق نارەستە بولاتىن. جاعدايدىڭ بۇلاي بولارىن بىلگەندە ولاردى ەشقاشان ەشقايدا جىبەرمەس ەدىم. ءاردايىم بايلانىس ۇستاپ، سكايپ ارقىلى سويلەسىپ وتىردىق. كۇندەردىڭ ءبىر كۇنىندە قىزىم حابارلاسپاي قويدى. ءبىراز ۋاقىت وتكەننەن كەيىن بايلانىسقا شىعىپ «ماما، مەن سيريادامىن» دەدى»، - دەيدى ول.

قىزى اناسىنا كەشكە قاراي ءبىر توپ ادام كەلىپ، وزدەرىن بالالارىمەن بىرگە كولىككە وتىرعىزىپ، سيرياعا الىپ كەتكەنىن ايتىپتى.

«قىزىما قاشىپ كەتۋدىڭ امالىن قاراستىر دەگەنىمدە، ول مۇندا تۇزاققا ءتۇسىپ قالعانىن ايتتى. بايلانىستا بولدىق. بالالارىنىڭ فوتوسۋرەتتەرىن جىبەرەتىن. ءبىر كۇنى حابارلاسىپ، بۇل كۇنى قازاقستانعا ورالعان بالاسىنىڭ تۋعانىن ايتتى. 6 -اقپاندا ول تورتكە تولادى. فوتوسۋرەتتەردى قاراپ وتىرىپ، مەن جيەنىمدى تانىپ قويدىم (...) يراك جاقتان ەشقانداي بايلانىس بولماعاننان كەيىن بالانى الىپ كەتە الماپ ەدىك. قازىر بالا ەلگە جەتكىزىلدى»، - دەيدى ول.

قازىرگى ۋاقىتتا زارلى انا قىزى مەن ەكى جيەنىن ىزدەپ جاتقانىن ايتادى. ولاردىڭ قايدا ەكەنىن بىلمەيدى. سوڭعى رەت 2017 -جىلدىڭ 5 -اقپانىندا سويلەسكەن.

«جيەنىمدى كورگەن كەزدە قاتتى ۋايىمدادىم. بالانىڭ جاسى تورتكە جاقىنداپ قالعان. مەنى تانىماسا دا جابىسا كەتتى. وسىدان سوڭ كۇلىپ، كوزىنەن جاس تامىپ تۇردى. قاراسام، جيەنىم باقىرمايدى، شاقىرمايدى دا. جان-جاعىمداعى بالالاردىڭ ءبارى باقىرىپ، ۋ دا شۋ بولىپ كەتكەن. ال جيەنىمنىڭ كوزىنەن ەر ادامنىڭ كوز جاسىن كوردىم. سوزبەن جەتكىزە المايمىن. ءتورت جاستاعى جيەنىمنىڭ كوزىنەن ەر جىگىتتىڭ قايعىسىن كوردىم»، - دەپ كوز جاسىنا ەرىك بەردى نەمەرەسىن تاپقان اجە.

ەسكە سالا كەتسەك، ق ر پرەزيدەنتى قاسىم-جومارت توقايەۆتىڭ تاپسىرماسى بويىنشا جۇزەگە اسىرىلعان گۋمانيتارلىق اكسيا ناتيجەسىندە يراك تۇرمەسىندە ءوز انالارىنىڭ جانىندا جاتقان 14 قازاقستاندىق بالا قايتارىلعان بولاتىن.

اۆتور: ايان بەكەن ۇلى