بەردىبەك ساپاربايەۆ شەتەلدەگى قالتالى قانداستارعا ۇندەۋ تاستادى

None
None
نۇر-سۇلتان. قازاقپارات - پرەمەر-ءمينيستردىڭ ورىنباسارى بەردىبەك ساپاربايەۆ ەلىمىزدە قانداستاردى قولداۋ ماقساتىندا قانداي شارالار قابىلدانىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

««نۇرلى كوش» باعدارلاماسىنىڭ ارقاسىندا ەلىمىزدە سىرتتان كەلگەن قانداستارىمىزعا ارنالعان ەلدى مەكەندەر پايدا بولدى. مىسالى، ش ق و- دا 700 وتباسىلىق «شىعىس»، س ق و- دا 400 ۇيلىك «بايتەرەك»، اقمولادا «كراسنىي يار» اۋىلدارى پايدا بولدى. ەڭ ۇلكەنى - شىمكەنتتە وزبەكستاننان كوشىپ كەلگەن قانداستاردىڭ «اسار» اۋىلى. ول جەرگە ءاۋ باستا 5 مىڭ ادام كوشىپ كەلگەن ەدى. جاقىندا عانا ءبىز بارىپ كوردىك - 27 مىڭ قانداس تۇرىپ جاتىر ەكەن»، - دەدى بەردىبەك ساپاربايەۆ ەلوردادا ءوتىپ جاتقان «وتانداستار. بولاشاققا باعدار» اتتى حالىقارالىق دوڭگەلەك ۇستەلىندە.

ۇكىمەت باسشىسىنىڭ ورىنباسارى ەلگە كەلگەن قانداستاردى باسپانامەن، مەكتەپپەن، بالاباقشامەن، مەديتسينالىق كومەكپەن تولىعىمەن قامتاماسىز ەتىلىپ جاتقانىن ايتىپ بەردى.

«شەتەلدەگى قانداستارىمىزدىڭ ىشىندە مىقتى قالتالى ازاماتتارىمىز، عالىمدار مەن ونەرپازدار بار. ولار وزدەرىنىڭ وتاندارىنا كومەكتەسۋ كەرەك. سىزدەر باسپا سوزدەن جاقسى بىلەسىزدەر: ارمياندار مەن ەۆرەيلەردىڭ ارمەنياعا، يزرايلگە قالاي كومەكتەسىپ جاتقانى بەلگىلى. بىزدە دە سولاي بولۋ كەرەك. قانشا دەگەنمەن وتانىمىز ءبىر - قازاقستان. امەريكادا تۇراسىڭ با، قىتايدا تۇراسىڭ با - جۇرەگىڭ قازاقستان دەپ سوعۋ كەرەك. سوندىقتان ءبىزدىڭ ءوتىنىشىمىز - وسى جاعىنا دا كوڭىل بولسەڭىزدەر»، - دەدى ول.

اۆتور: ايان بەكەن ۇلى

سوڭعى جاڭالىقتار