تانىمال ونەر جۇلدىزدارى مەن سپورت شەبەرلەرى تۇركىستاننىڭ بارلىق ءوڭىرىن ارالادى
شارانى ق ر تۇڭعىش پرەزيدەنتى، ەلباسى ن. نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا تۇركىستان وبلىستىق قوعامدىق دامۋ باسقارماسى مەن ق م د ب تۇركىستان وبلىستىق فيليالى ۇيىمداستىردى.
تۇركىستان وبلىستىق وڭىرلىك كوممۋنيكاتسيا قىزمەتىنىڭ مالىمەتىنشە، كەزدەسۋدىڭ باستى ماقساتى - وڭىرىمىزدەن شىققان ەلىمىزگە تانىمال ونەر جۇلدىزدارىن، سپورت شەبەرلەرى مەن ءدىن وكىلدەرىن حالىقپەن جۇزدەستىرىپ، جاستاردىڭ پاتريوتتىق سەزىمدەرىن وياتۋ، ولاردىڭ سپورتقا دەگەن قىزىعۋشىلىعىن ارتتىرۋ، وزگە ءدىني اعىمداردان اۋلاق بولا وتىرا قازاقي سالت- ءداستۇرىمىزدى قاتاڭ ساقتاۋدى ناسيحاتتاۋ.
«تۇركىستاننىڭ رۋحاني كەرۋەنى» دەگەن اتپەن كەزدەسۋ تۇركىستان وبلىسىنىڭ بارلىق دەرلىك اۋدان، قالالارىندا ۇيىمداستىرىلدى. اتاپ ايتساق، قازاقستاننىڭ ەڭبەك سىڭىرگەن سپورت شەبەرى، ەركىن كۇرەستەن قازاقستاننىڭ 4 دۇركىن چەمپيونى اقجۇرەك تاڭاتاروۆ، ق ر ەڭبەك سىڭىرگەن قايراتكەرى، تانىمال ءانشى سايات مەدەۋوۆ جانە جەتىساي اۋدانىنىڭ باس يمامى بەكزات سىزدىقوۆ بەكزات سارىاعاش پەن كەلەس اۋدانى تۇرعىندارىمەن كەزدەسۋ وتكىزدى.
ەسترادا جۇلدىزى ەركىن نۇرجانوۆ، ارمرەستلينگ سپورتىنان الەمنىڭ بىرنەشە دۇركىن چەمپيونى قىدىرعالي وڭعاربايەۆ جانە تولە بي اۋدانىنىڭ باس يمامى سامات اناربايەۆ سايرام مەن تۇلكىباس اۋداندارىن ارالادى.
بايدىبەك پەن سوزاق اۋداندارىنا ساپار شەككەن قازاق كۇرەسىنەن قر چەمپيوناتىنىڭ قولا، كۇمىس جۇلدەگەرى جۇمانازار ەرسۇلتانوۆ، سايرام اۋدانى بايدىبەك اتا مەشىتىنىڭ يمامى ارىستان وسپانوۆ جەرگىلىكتى تۇرعىندارمەن كەزدەسىپ، تاعىلىمى مول اڭگىمەلەر ايتىلدى.
ارمرەستلينگ سپورتىنان الەمنىڭ بىرنەشە دۇركىن چەمپيونى ماعجان شاميەۆ مەن تۇركىستان وبلىسىنىڭ باس يمامى اقتامبەردى مۇسابەك ماقتاارال مەن جەتىساي تۇرعىندارىمەن جۇزدەستى.
بوكسشى، قازاقستاننىڭ ەڭبەك سىڭىرگەن سپورت شەبەرى مۇحتارحان دىلدابەكوۆ، ق م د ب تۇركىستان وبلىسى بويىنشا وكىلدىگىنىڭ جاستار ءىسى سەكتورىنىڭ جەتەكشىسى قايرات دارىبايەۆ ورداباسى مەن وتىرار اۋدانى تۇرعىندارىمەن جۇزدەستى.
بوكسشى، ميانمادا وتكەن الەم چەمپيوناتىنىڭ قولا جۇلدەگەرى ءبىرجان جاقىپوۆ جانە سايرام اۋدانىنىڭ باس يمامى سەيداحمەت تەمىربەك تولە بي مەن قازىعۇرت جۇرشىلىعىمەن كەزدەسىپ، اشىق اڭگىمە جۇرگىزدى.
قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، سامبودان ءۇش دۇركىن الەم چەمپيونى ارمان وسپانوۆ مەن تۇلكىباس اۋدانىنىڭ باس يمامى سەرىك ماعاز ارىس پەن شاردارا اۋداندارىنا تابان تىرەسە، كاراتە-دودان قازاقستاننىڭ حالىقارالىق دارەجەدەگى سپورت شەبەرى نۇرجان اقپانبەت جانە بايدىبەك اۋدانىنىڭ باس يمامى ۇلىقبەك الياكبار ۇلى كەنتاۋ قالاسى جۇرتشىلىعىمەن باس قوسىپ، كەلەلى كەڭەس وتكىزدى.
ەلىمىزگە تانىمال ونەر جۇلدىزدارى مەن سپورت شەبەرلەرى وسىلايشا تۇركىستاننىڭ رۋحاني كەرۋەنىنىڭ كوشىن باستاپ وبلىسىمىزدىڭ بارلىق اۋدان، قالالارىن ارالاپ شىقتى. كەزدەسۋ بارىسىندا جەرگىلىكتى جاستار ءوز ويلارىنداعى سۇراقتارىن قويىپ، ەركىن فورماتتاعى سۇحبات ءوربىدى.
ايتا كەتەيىك، «تۇركىستاننىڭ رۋحاني كەرۋەنى» كەزدەسۋى 28 -قاراشا كۇنى تۇركىستان قالاسى حالىقارالىق قازاق-تۇرىك ۋنيۆەرسيتەتىنىڭ مادەنيەت سارايىندا وتەتىن بولادى.