باتىرحان سارسەنحان ت م د ەلدەرىنىڭ ەڭ ۇزدىك اقىنى اتاندى

نۇر-سۇلتان. قازاقپارات – ماسكەۋدە وتكەن بايقاۋدا قازاق اقىنى باتىرحان سارسەنحان ت م د ەلدەرىنىڭ ەڭ ۇزدىك اقىنى دەپ تانىلدى.

بۇل تۋرالى ايتىسكەر اقىن ايبەك ەرەجەپ ءوزىنىڭ Facebook پاراقشاسىندا جازدى، دەپ حابارلايدى OINET. KZ.

«رەسەي استاناسى ماسكەۋدە ت م د ەلدەرىنىڭ ەڭ مىقتى جيىرما بەس جاسقا دەيىنگى جاس اقىندارى اراسىندا وتكەن «دەلفيلىك بايقاۋدا» اقىن باتىرحان سارسەنحان مەن رەسەيلىك اقىن ارينا كونداكوۆا ۇزدىك دەپ تانىلدى. قازاق پوەزياسىنىڭ بەدەلىن اسقاقتاتىپ كەلە جاتقان باتىرحان ىنىمە شىعارماشىلىق تابىستار تىلەيمىن. حافيزدەن، فيرداۋسيدەن، ناۋاييدەن، ابايدان كەيىنگى شىعىس پوەزياسىنىڭ ءالى دە ادامزات بالاسىنا ايتارى مول ەكەنىن ۇعىندىرعانداي كەش بولدى.

قازاق ادەبيەتى الەم جۇرتشىلىعىن ءوز شەبەرلىگىمەن، ويىمەن تاڭ قالدىرۋ قولدان كەلمەيتىن ءىس ەمەس ەكەنىن باتىرحان دالەلدەدى. سەبەبى، ءبىز دارىنسىز، تالانتسىز ەل ەمەسپىز. ادەبيەتىمىزدىڭ الار اسۋى، شىعار بيىگى كوپ بولعاي.

باتىردىڭ ولەڭدەرى اتاقتى «موسكۆا» جۋرنالىنا جاريالاۋعا لايىق دەپ تابىلدى! پۋشكيننىڭ، فەتتىڭ، پاستەرناكتىڭ ءىزباسارلارىن باس شايقاتقان- قازاق ولەڭى جاساي بەرسىن!»، - دەپ جازعان باتىرحاننىڭ دوسى ايبەك.