قازاقستاندىقتار مادەني شارالارعا كوبىرەك بارا باستادى
بۇل تۋرالى قازاقپارات finprom.kz سايتىنا سىلتەمە جاساپ حابارلايدى.
«سەكتورداعى قاراجاتتىڭ تورتتەن ءبىرى ەلورداعا تيەسىلى. ونەر، ويىن-ساۋىق جانە دەمالىس سالاسىنداعى نەگىزگى كاپيتالعا بولىنگەن ينۆەستيتسيا 2019-جىلدىڭ قاڭتار-قازان ايلارىندا رەكوردتىق 118,9 ميلليارد تەڭگەگە جەتتى. ول وتكەن جىلدىڭ وسى كەزەڭىمەن سالىستىرعاندا 53,5 پايىزعا ارتىق (ن ك ي - 147,9 پايىز). نەگىزگى كاپيتالداعى بارلىق ينۆەستيتسيادان سەكتور ينۆەستيتسياسىنىڭ ۇلەسى ءبىر جىل ىشىندە 0,9 پايىزدان 1,2 پايىزعا ءوستى»، - دەلىنگەن حابارلامادا.
جالپى 2018-جىلى دەمالىس پەن ويىن-ساۋىققا بولىنگەن ينۆەستيتسيا كولەمى 104,2 ميلليارد تەڭگەنى قۇرادى، ول 2017 -جىلمەن سالىستىرعاندا 38,7 پايىزعا كوپ.
ايماقتار اراسىندا سەكتورداعى نەگىزگى كاپيتالعا بولىنگەن ينۆەستيتسيانىڭ ەڭ كوپ بولىگى نۇر-سۇلتان قالاسىنا تيەسىلى، ياعني 29,3 ميلليارد تەڭگە ول وتكەن جىلدىڭ وسى كەزەڭىمەن سالىستىرعاندا ءبىر جارىم ەسەگە كوپ.
ەكىنشى ورىندا شىعىس قازاقستان وبلىسى: 21,7 ميلليارد تەڭگە - 2018-جىلدىڭ قاڭتار-قازان ايلارىمەن سالىستىرعاندا 27 پايىزعا ارتىق. ۇزدىك ۇشتىكتى الماتى وبلىسى تۇيىندەيدى- 19 ميلليارد تەڭگە، جىلدىق ءوسىم - 27,2 پايىز.