قازاقستاندا بەنزين قانشالىقتى قىمباتتايدى – ەكونوميكا مينيسترلىگىنىڭ جاۋابى

نۇر-سۇلتان. قازاقپارات - ۇلتتىق ەكونوميكا مينيسترلىگىنىڭ سالىق جانە كەدەن ساياساتى دەپارتامەنتىنىڭ ديرەكتورى ازامات ءامرين اكسيزدىڭ(قوسىمشا سالىقتىڭ – رەد.) كوتەرىلۋىنە بايلانىستى قازاقستاندا بەنزين قانشالىقتى قىمباتتايتىنىن ايتىپ بەردى، دەپ حابارلايدى قازاقپارات ءتىلشىسى.

«قازىرگى تاڭدا بەنزين باعاسىنىڭ اكسيزى 8 تەڭگە، بەنزينىڭ ليترى 150 تەڭگە بولىپ تۇر. ءبىز اكسيز ستاۆكاسىن 10 500 تەڭگەدەن 24435 تەڭگەگە ارتتىردىق. وسىدان بارىپ، بەنزين ءليترى 10 تەڭگەگە كوتەرىلەدى. ياعني، اكسيز 8-دەن 18 تەڭگەگە كوتەرىلدى. وسىلايشا، باعا شامامەن 8 پايىزعا - 150-تەڭگەدەن 160 تەڭگەگە كوتەرىلەدى. ءبىراق، بۇل رەتتە اكسيزدىڭ باعانى رەتتەۋشى جالعىز فاكتور ەمەس ەكەنىن ەسكەرۋ كەرەك»، - دەدى ازامات ءامرين ۇكىمەت وتىرىسىندا.

ول نارىقتىق ەكونوميكا جاعدايىندا سۇرانىس پەن ۇسىنىستىڭ بار ەكەنىن ءتۇسىندىردى.

«مەنىڭ ويىمشا، باعا تىكەلەي 10 تەڭگەگە كوتەرىلمەيدى. ماسەلەن، 2015 -جىلى ءبىز باعانى 4,5 مىڭ تەڭگەدەن بۇگىنگى 10,5 مىڭ تەڭگەگە كوتەرگەن بولاتىنبىز. ال 2015 -جىلى بەنزين باعاسى كوتەرىلمەدى»، - دەدى سپيكەر.

الايدا بۇل وزگەرىستەردىڭ ينفلياتسياعا اسەر ەتەرى انىق.

«ءبىز ينفلياتسياعا ىقپال ەتەتىن اسەردى تالداپ كوردىك. تۇتىنۋ باعالارىنىڭ يندەكسى تاۋارلاردىڭ 500 تۇرىمەن ەسەپتەلەتىنىن بىلەسىزدەر. ولاردىڭ ۇشەۋى ا ي-93، ا ي-95، ا ي-98 بەنزيندەرى. ولاردىڭ ۇلەسى - 0,6 پايىزدى قۇرايدى. وسىعان بايلانىستى ينفلياتسياعا سايىپ كەلگەندە 0,35 پايىزدىق اسەر بولادى. ياعني، ءدال ۇلتتىق بانك بولجاعان 4-6 پايىزدىق دەڭگەيدەن اسپايدى. قاۋلى جوباسى مەملەكەتتىك ورگانداردىڭ ماقۇلداۋىنا جولداندى. سالالىق مەملەكەتتىك ورگاندارمەن كەلىسكەننەن كەيىن شەشىم ۇكىمەت وتىرىسىنا جىبەرىلەدى. وندا ناقتى شەشىم قابىلدانادى»، - دەدى مينيسترلىك وكىلى.