دۇنيەجۇزىلىك بانك ساراپشىلارى قازاقستاننىڭ دامۋ جوباسىنا وڭ باعا بەردى

نۇر-سۇلتان. قازاقپارات - حالىقارالىق قايتا قۇرۋ جانە دامۋ بانكىنىڭ (دۇنيەجۇزىلىك بانك) نۇر- سۇلتانداعى ميسسياسى اياسىندا قارجى ۇيىمى ساراپشىلارى مەن ق ر ەڭبەك جانە حالىقتى الەۋمەتتىك قورعاۋ مينيسترلىگى وكىلدەرىنىڭ اراسىندا كوپجاقتى ءبىرقاتار كەزدەسۋ ءوتتى، دەپ حابارلايدى اتالعان ۆەدومستۆونىڭ باسپا ءسوز قىزمەتى.

شەتەلدەن كەلگەن قوناقتار 550 كاسىبي ستاندارتتاردىڭ نەگىزىندە جاڭارتىلاتىن قازاقستانداعى ءبىلىم بەرۋ باعدارلامالارىنىڭ ازىرلەنۋى مەن جاڭارتىلۋى اياقتالۋىن جوعارى باعالادى.

2016 -جىلدان باستاپ ەڭبەك مينيسترلىگى دۇنيەجۇزىلىك بانكتىڭ قارجىلىق جانە تەحنيكالىق قولداۋىمەن جۇمىسپەن قامتۋدى جاقسارتۋعا جانە كادرلاردى وقىتۋدىڭ تيىمدىلىگىن ارتتىرۋعا باعىتتالعان «ەڭبەك داعدىلارىن دامىتۋ جانە جۇمىسقا ىنتالاندىرۋ» جوباسىن جۇزەگە اسىرىپ كەلە جاتقانى بەلگىلى. اياقتالۋعا تاياعان جوبانى ىسكە اسىرۋدىڭ مارتەبەسىن جانە بەلگىلەنگەن كورسەتكىشتەرگە قول جەتكىزۋىن باعالاۋ ءۇشىن، قازاقستاننىڭ استاناسىنا ح ق د ب- نىڭ ءبىلىم بەرۋ پراكتيكاسى بويىنشا باسقارۋشى گارري پاترينوس جانە ءبىلىم بەرۋ بويىنشا جەتەكشى مامانى الەكساندر ۆالەريو كەلدى.

«جوبانىڭ مىندەتتەرىنىڭ ءبىرى - نارىقتىق تالاپتارعا سايكەس كەلتىرىلگەن ءبىرىڭعاي كاسىبي، ءبىلىم بەرۋ جانە بىلىكتىلىك ستاندارتتارىنىڭ قول جەتىمدىلىگى مەن قولدانىلۋىن قامتاماسىز ەتەتىن، ەڭبەك نارىعىن وڭتايلاندىراتىن جانە قالىپتاستىراتىن ۇلتتىق بىلىكتىلىك جۇيەسىن دامىتۋ ءۇشىن نەگىز قۇرۋ بولىپ تابىلادى. وسى ماقساتتا جوبا اياسىندا ەكونوميكانىڭ سۇرانىسقا يە 12 سالاسى ءۇشىن 550 كاسىبي ستاندارت ازىرلەندى، ولاردىڭ 70 ى بەكىتىلدى، ال تاعى 480 ى جىلدىڭ سوڭىنا دەيىن بەكىتمەك. ءبىز بۇل جۇمىستىڭ بەلگىلەنگەن مەرزىمدە جانە ساپالى جۇرگىزىلىپ جاتقانىنا ريزاشىلىعىمىزدى بىلدىرەمىز»، - دەدى گارري پاترينوس.

ميسسيا قاتىسۋشىلارى ەڭبەك مينيسترلىگىنىڭ وكىلدەرىمەن بەكىتىلگەن كاسىبي ستاندارتتارمەن، ياعني ەڭبەك نارىعىنىڭ تالاپتارىنا سايكەستەندىرىلەتىن ءبىلىم بەرۋ باعدارلامالارىن الداعى ۋاقىتتا جانداندىرۋ ماسەلەلەرىن تالقىلادى.

دۇنيەجۇزىلىك بانك ماماندارىنىڭ نۇر- سۇلتانعا ساپارى اياسىندا جۇمىسپەن قامتۋ ورتالىقتارىنىڭ (ج ق و) جۇمىسىمەن، ونىڭ قىزمەتكەرلەرىنە ارنالعان وقۋ باعدارلامالارىن جانە تالاپكەرلەرگە ۇسىنىلاتىن بىلىكتىلىكتى ارتتىرۋ كۋرستارىمەن تانىستى. جوبا شەڭبەرىندە ج ق و-نىڭ ماتەريالدىق- تەحنيكالىق جابدىقتالۋى بۇعان دەيىن جاقسارتىلعان بولاتىن، اتاپ ايتقاندا ولار زاماناۋي IT جابدىقتارمەن قامتاماسىز ەتىلگەن، ال 2020 -جىلى ودان ءارى جاڭعىرتۋ جوسپارلانۋدا.

ميسسيا ودان ءارى ءوزارا ارەكەتتەسۋدىڭ ماڭىزدى اسپەكتىلەرىن ناقتىلاۋعا مۇمكىندىك تۋعىزىپ وتىر. ۇلتتىق بىلىكتىلىك جۇيەسىن دامىتۋ بويىنشا ەڭبەك مينيسترلىگى ۇسىنعان شارالار ەڭ ءتيىمدى ءبىلىم بەرۋ باعدارلامالارىن ازىرلەۋ بارىسىندا ىقپال ەتەتىن بولادى. قازىردىڭ وزىندە ق ر ءبىلىم جانە عىلىم مينيسترلىگىمەن ىنتىماقتاستىق تەتىگى پىسىقتالىپ جاتىر. 2020 -جىلدىڭ ورتاسىنا قاراي قازاقستاندىق ءبىلىم بەرۋ ۇيىمدارىندا جاڭارتىلعان ءبىلىم بەرۋ ستاندارتتارى ەنگىزىلەدى دەپ كۇتىلۋدە، بۇل جۇمىس بەرۋشىلەردىڭ تالاپتارىنا سايكەس كەلەتىن جاڭا كادرلاردى ەڭبەك نارىعىنا شىعارۋعا مۇمكىندىك بەرەدى.

ميسسيا قورىتىندىسى بويىنشا دۇنيەجۇزىلىك بانك وكىلدەرى جوبانى ىسكە اسىرۋ تيىمدىلىگىنىڭ بەرىلگەن ارالىق كورسەتكىشتەرىنە قول جەتكىزگەنىن اتاپ ءوتىپ، جۇمىستىڭ ناتيجەلى قارقىنىن ودان ءارى قولداۋعا ءۇمىت ءبىلدىردى.