الماتى اكىمدىگى الەۋمەتتىك جەلىدە راديكالدى ۇيىمنىڭ ىقپالىنان ساق بولۋدى ەسكەرتتى

الماتى. قازاقپارات - الماتى اكىمدىگى الەۋمەتتىك جەلىدە راديكالدى ۇيىمداردىڭ ىقپالىنا تۇسۋدەن ساق بولۋدى ەسكەرتتى، دەپ حابارلايدى قازاقپارات ءتىلشىسى.

وسى ماقساتتا قالالىق قوعامدىق دامۋ باسقارماسى اۆتوماتتاندىرىلعان جۇيەنى قولدانا وتىرىپ، دەسترۋكتيۆتى ءدىني يدەولوگيانى ناسيحاتتاۋى مۇمكىن دەگەن توپتاردى انىقتاۋ ءۇشىن ينتەرنەت كەڭىستىككە مونيتورينگ جۇرگىزىپ كەلەدى.

ءدىني ەكسترەميزم مەن تەرروريزمنىڭ الدىن الۋ بويىنشا كەشەندى ءىس- شارالار جوسپارىن جۇزەگە اسىرۋ ماقساتىندا بيىل وسى تەكتەس توپتاردا بولعان 5 مىڭنان استام ادامعا ءتۇسىندىرۋ جۇمىستارى جۇرگىزىلدى.

اڭگىمە بارىسىندا ايقىن بولعانداي، ولاردىڭ كوپشىلىگى وسىنداي توپتاردا ءدىني راديكالدى يدەولوگيا ناسيحاتتالاتىنىن بىلمەگەن.

جۇرگىزىلگەن ءتۇسىندىرۋ جۇمىستارىنىڭ ارقاسىندا بارلىق قولدانۋشىلار كۇماندى توپتاردان شىعىپ كەتتى.

قوعامدىق دامۋ باسقارماسى ءدىني سيپاتتاعى اقپاراتتى ىزدەگەن ادامدارعا تەك قانا رەسمي تىركەلگەن ءدىني بىرلەستىكتەرگە جۇگىنۋدى ۇسىنادى.

«ەگەر ءسىز راديكالدى يدەولوگيانى ۇگىتتەۋ جانە تاراتۋ فاكتىسىنە تاپ بولساڭىز، بۇل جاعداي تۋرالى الماتى قالاسىنىڭ قوعامدىق دامۋ باسقارماسىنا نەمەسە قالالىق پوليتسيا دەپارتامەنتىنە حابارلاي الاسىز»، - دەدى قالالىق قوعامدىق دامۋ باسقارماسىنان.

اۆتور گۇلميرا عوسمانالي