قار شاڭعى سپورتى مەكتەپتەرگە ءپان رەتىندە ەنگىزىلدى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا شەتەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

«كۇلتەگىن» قازاقستاندىق مۋلتفيلمى تۇركيادا كورسەتىلدى

قازاقستاندىق رەجيسسەر اداي ءابىلدينوۆتىڭ  II شىعىس كوكتۇرىك قاعاناتىنىڭ نەگىزىن قالاۋشىلاردىڭ ءبىرى كۇلتەگىننىڭ ءومىرى تۋرالى انيماتسيالىق فيلمى 9- مالاتيا حالىقارالىق كينوفەستيۆالىنىڭ ارنايى باعدارلاماسىنا قاتىستى، دەپ حابارلايدى تۇركيا راديو تەلەۆيزيا پورتالى.

«فيلم تۇرىك تاريحىنىڭ ۇلى قولباسشىلارىنىڭ ءبىرى كۇلتەگىن تۋرالى باياندايدى. اكەسى قايتىس بولعاننان كەيىن تۇرىك ۇلتىن قۇتقارۋ ءۇشىن كۇرەستە وعان ءۇش وعىز مىرزالارى مەن ءىنىسى بىلگە جانە كوكبورى كومەكتەسەدى. «قازاق فيلم» كينوستۋدياسى تولىقمەتراجدى انيماتسيالىق فيلمنىڭ 9- مالاتيا حالىقارالىق كينوفەستيۆالىنە قاتىسقانىنا قۋانىشتى ەكەنىن ءبىلدىردى»، - دەپ جازادى تۇركيا راديو تەليەۆيزيا پورتالى.

تۇركيالىق ب ا ق «كۇلتەگىن» مۋلتيپليكاتسيالىق فيلمىنىڭ فەستيۆالگە قاتىسۋىنا TRT-نىڭ نۇر- سۇلتانداعى وكىلدىگى دە ۇلكەن ۇلەس قوسقانىن ايتادى.

مۋلتفيلم قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن شاكەن ايمانوۆ اتىنداعى قازاق فيلم كينوستۋدياسىندا تۇسىرىلگەن.

قار شاڭعى تەبۋ مەكتەپتەرگە دەنە شىنىقتىرۋ ءپانى رەتىندە ەنگىزىلدى

قىتاي حالىق رەسپۋبليكاسىنىڭ التاي قالاسىندا ورتا- باستاۋىش مەكتەپتەرىنە قار شاڭعى سپورتى دەنە شىنىقتىرۋ ءپانى رەتىندە ەنگىزىلدى. ياعني وقۋشىلار جىلقىنىڭ تەرىسىنەن جاسالاتىن بايىرعى قار شاڭعىنى تەبۋدى ساباق رەتىندە ۇيرەنە باستايدى. بۇل حابار الەۋمەتتىك جەلىدە كەڭىنەن تارالىپ، جەلى قولدانۋشىلارىنىڭ قىزىعۋشىلىعىن تۋدىرۋدا، دەپ حابارلايدى kazakh.altxw.com اقپاراتتىق پورتالى.

اتالعان اقپارات كوزىنىڭ مالىمەتىنە سۇيەنسەك، مۇنداعى ماقسات - بالالاردىڭ بويىندا كونە دالالىق سپورتقا بەيىمدىلىگىن جەتىلدىرۋ.

التاي قالاسىنداعى مەكتەپ جاتتىقتىرۋشىسى ما جۋننىڭ ايتۋىنشا، قار شاڭعى سپورتىن ەرەسەكتەرگە قاراعاندا جاس جەتكىنشەكتەر تەز يگەرىپ الادى ەكەن.

«قار شاڭعى سپورتىن وقۋشىلار، اسىرەسە، باستاۋىش مەكتەپتەگى وقۋشىلار وتە جاقسى يگەرۋدە. دۇيسەنبىدەن جۇماعا دەيىن ءار كۇنى تۇستەن كەيىن 2 ساعات ساباق قويدىق. ءقازىر ەلىمىز قار- مۇز سپورتىمەن شۇعىلدانۋدى جاقسى قولداۋدا. سوندىقتان بۇدان كەيىن وقۋشىلار ارنايى قار شاڭعى الاڭىنا بارماي- اق، مەكتەپ اۋلاسىندا دا ۇيرەنە الاتىن بولادى»، - دەيدى جاتتىقتىرۋشى.

ۇلانباتىر الەمدەگى اۋاسى ەڭ لاس 10 قالانىڭ تىزىمىنەن شىعارىلدى

ۇلانباتىر الەمدەگى اۋاسى ەڭ لاس 10 قالانىڭ تىزىمىنەن شىعارىلدى. بۇل تۋرالى دۇنيەجۇزى بويىنشا اۋانىڭ ساپالىق مالىمەتتەرىن جينايتىن AirVisual حالىقارالىق ۇيىمىنىڭ مالىمەتىنە سۇيەنىپ موڭعوليالىق kaznews اقپاراتتىق پورتالى حابارلادى.

پورتالدىڭ مالىمەتىنە سايكەس، موڭعوليا استاناسى ۇزاق ۋاقىتتان بەرى الەمنىڭ ەكولوگيالىق لاس قالالارىنىڭ العاشقى وندىعىندا تۇرعان. ءتۇتىن ۇلانباتىر حالقى ءۇشىن قىس تۇسسە وزەكتى تاقىرىپقا اينالعان. ەلدەگى ەڭ ءىرى ءوندىرىس وشاقتارىنىڭ جارتىسىنان كوبى وسىندا ورنالاسقان. وعان كولىكتەردىڭ شامادان تىس كوپتىگى مەن تۇرعىندار سانىنىڭ ارتۋى دا اسەر ەتەتىن. تۇرعىنداردىڭ %60 كيىز ۇيلەردە تۇرعاندىقتان، ولاردى جىلىتۋ ءۇشىن 2 ميلليون توننا كومىر كەتەتىن. ال، ۇلانباتىر قالاسىنداعى 4 ەلەكتر ستانتسياسى جىلىنا 6 ميلليون توننا كومىر جاعادى. وسىنىڭ سالدارىنان قالاداعى ەكولوگيالىق احۋال قاۋىپسىزدىك دەڭگەيىنەن 17 ەسەگە ارتىپ كەتكەن.

«ۇكىمەتتىڭ وكىمىمەن بيىلعى مامىر ايىنان باستاپ شيكى كومىردى استاناعا جەتكىزۋگە شەكتەۋ قويىلىپ، قىركۇيەك ايىنان بريكەتتەلگەن (ۇنتاقتالعان) كومىر وتىنىن پايدالانۋ ءتۇتىننىڭ ازايۋىنا سەپتىگىن تيگىزگەن»، - دەپ تۇيىندەيدى موڭعوليالىق ب ا ق.

300 جىلدىق تاريحى بار مونشا

شەيح مونشاسى - اردەبيل قالاسىنداعى ەڭ ەسكى مونشالاردىڭ ءبىرى. ونىڭ كىرەبەرىس ەسىگى قاراپايىم، ءبىراق كىرپىشتەن وتە ادەمى قالانعان، دەپ جازادى parstoday اقپارات اگەنتتىگى. مونشانىڭ كيىم شەشۋ ورنى 4 پورتيك پەن 4 باعانالى 8 قىرلى بولمەدەن تۇرادى. باعانداردىڭ ۇستىنە بيىك جانە قىسقا قاناتتى جارتىلاي كۇمبەزدى اركالار قويىلعان. مونشانىڭ سالىنۋ تاريحى بەلگىلى ەمەس، ءبىراق رەستاۆراتورلار ونىڭ تاريحى شامامەن 300 -جىلدان اساتىنىن ايتادى، دەپ جازادى يراندىق ب ا ق.

تۇركيادان شەتەلدىكتەردىڭ ءۇي ساتىپ الۋ سانى ارتۋدا

تۇركيادا شەتەلدىكتەرگە تۇرعىن ءۇي ساتۋ سوڭعى 10-ايدىڭ ىشىندە ەڭ جوعارعى كورسەتكىشكە جەتتى. اتاپ ايتار بولساق، تەك قازان ايىندا شەتەلدىكتەرگە 4272 ءۇي ساتىلعان. بۇل تۋرالى وسى اپتادا تۇركيا راديو تەليەۆيزيا پورتالى حابارلادى.

اتالعان اقپارات كوزىنىڭ مالىمەتىنە سۇيەنسەك، بيىلعى قاڭتار- قازان ايلارىندا شەتەلدىكتەر بارلىعى 36 مىڭ 197 باسپانا ساتىلعان. وتكەن جىلدىڭ العاشقى ون ايىندا ساتىلعان جىلجىمايتىن مۇلىك سانى 30 مىڭ 431 بولعان ەدى. ياعني، وتكەن جىلمەن سالىستىرعاندا ساتۋ- ساتىپ الۋ كەلىسىمشارتتارى 19 پايىزعا ارتقان. جىلجىمايتىن مۇلىك سەكتورىنىڭ وكىلدەرى بىلتىر وزگە ەلدەر ازاماتتارىنىڭ يەلىگىنە 39 مىڭ 663 تۇرعىن ءۇي وتكەنىن ايتتى. بيىل بۇل كورسەتكىش 40 مىڭنىڭ كولەمىندە بولۋى مۇمكىن دەپ بولجانۋدا.

TRT- نىڭ حابارلاۋىنشا، شەتەل ازاماتتارى كوبىنە ىستانبۇلدان ءۇي ساتىپ الادى ەكەن.

«The Hu» ونەر توبى موڭعوليانىڭ ەڭ جوعارعى وردەنىمەن ماراپاتتالادى

رەسپۋبليكا كۇنى جانە كۇنتىزبە بويىنشا شىڭعىس حاننىڭ دۇنيەگە كەلگەن قىس ايىنىڭ ءبىرىنشى جۇلدىزى بيىل 27 -قاراشاعا ساي كەلىپ وتىر. وسىعان بايلانىستى اتالمىش داتالار بىرگە تويلانباق.

شىڭعىس حاننىڭ دۇنيەگە كەلگەن كۇنىن «موڭعول ماقتانىش كۇنى» دەپ اتاپ ءوتۋ داستۇرگە اينالعان. بۇل كۇنگە وراي مەملەكەت جانە قوعامعا زور ەڭبەگى سىڭگەن، ۇلتتىق بەرەكە- بىرلىكتى نىعايتقان، ۇلتتىق قۇندىلىقتاردى الەمگە تانىتۋعا ۇلەس قوسقان موڭعوليا ازاماتتارى جىل سايىن ەلدىڭ ەڭ جوعارعى ماراپاتى - «شىڭعىس حان» وردەنىمەن ماراپاتتالادى. بۇل تۋرالى وسى اپتادا موڭعوليالىق kaznews.mn اقپاراتتىق پورتالى حابارلادى.

موڭعوليا پرەزيدەنتى ح. باتتۋلگانىڭ جارلىعىنا سايكەس بيىلعى جىلى وردەن «The Hu» توبىنا تابىس ەتىلەدى. بۇل تۋرالى ارنايى وتكەن باسپا ءسوز ءماسليحاتىندا پرەزيدەنت اكىمشىلىگىنىڭ اپپارات باسشىسى ز. ەنحبولد ايتتى.

اقپارات كوزىنىڭ مالىمەتىنشە، «The Hu» توبىنىڭ «Yuve Yuve Yu, The Gereg» البومى امەريكالىق Billboard تىزىمىندە كوش باستاعان. ال «Yuve Yuve Yu» ءانىنىڭ Youtube جەلىسىندەگى قارالىمى 30 ميلليونعا جۋىقتادى.

«1924 -جىلعى 26 -قاراشادا موڭعوليا تاۋەلسىز جانە ەگەمەن مەملەكەت رەتىندە موڭعول حالىق رەسپۋبليكاسى اتاۋىمەن قۇرىلدى جانە كونستيتۋتسياسى قابىلداندى» ، دەپ جازادى kaznews.

وزبەكستان بيىل 4 ميلليارد دوللارعا التىن ساتقان

وزبەكستاندا بيىل التىن ەكسپورتى 2018 -جىلعا قاراعاندا ءبىرشاما وسكەنى بايقالادى، دەپ حابارلايدى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

وزبەكستاندىق ب ا ق-تىڭ كەلتىرگەن دايەگىنە سۇيەنسەك، مەملەكەتتىك ستاتيستيكا كوميتەتىنىڭ مالىمەتىنشە وتكەن جىلمەن سالىستىرعاندا بيىل التىن ەكسپورتى 2,6 ەسە ارتقان. بۇل كورسەتكىش 2019 -جىلدىڭ قاڭتار مەن قازان ايلارىندا وزبەكستان ەكسپورتتاعان التىن مولشەرىنەن ۇلتتىق قورعا 4,04 ميلليارد دوللار قارجى تۇسكەن. وزبەكستاندا سوڭعى جىلدارى التىن ەكسپورتىنىڭ كۇرت وسكەنى مىنا كورسەتكشتەردەن-اق بەلگىلى: 2015 -جىلى 823,9 ميلليون، 2016 -جىلى 738,2 ميلليون، 2017 -جىلى 1,6 ميلليارد جانە 2018 -جىلى 2,91 ميلليارد دوللار بولعان.

اۆتور: بەيسەن سۇلتان