گونكونگتەگى قازاقستاندىق ستۋدەنتتەرگە ەلگە قايتۋدى ۇسىنامىز - باس كونسۋلدىق

نۇر- سۇلتان. قازاقپارات - باس كونسۋلدىق گونكونگتاعى جاعدايعا بايلانىستى قازاقستاندىق ستۋدەنتتەرگە قالا اۋماعىنان كەتۋدى ۇسىندى. بۇل تۋرالى قازاقپارات س ءى م  رەسمي وكىلى ايبەك سمادياروۆقا سىلتەمە جاساپ حابارلايدى.

«بۇگىنگى تاڭدا گونكونگتان 208 ستۋدەنت كەتىپ قالدى. جاقىن ارادا تاعى 14 ستۋدەنت قالا اۋماعىنان شىعادى دەپ جوسپارلانۋدا. ءبىزدىڭ كەيبىر ستۋدەنتتەرىمىز گونكونگتان قازاقستاندىق ديپلوماتتاردى حاباردار ەتپەي كەتۋدە. دەگەنمەن، گونكونگتە توتەنشە جاعداي ەنگىزىلمەگەنىن اتاپ وتەمىز. ءبىز تەك ءبىزدىڭ ستۋدەنتتەرگە عانا قازاقستانعا قايتىپ كەلۋدى ۇسىنامىز، ويتكەنى ۋنيۆەرسيتەتتەر كەلەسى سەمەستر باستالعانعا دەيىن - ياعني 2020 -جىلدىڭ قاڭتارىنا دەيىن ساباقتاردى توقتاتتى. بۇل تەك ۇسىنىس، ەشكىمدى قالادان كەتۋگە ماجبۇرلەي المايمىز. قالادا قالعان بارلىق ستۋدەنتتەرمەن ديپلوماتتار بايلانىس ورناتىپ، ولارعا ءاردايىم قاجەتتى كومەك كورسەتۋگە دايىن»، - دەدى ايبەك سمادياروۆ.

بۇگىندە كونسۋلدىق ەسەپتە 195 ستۋدەنت تۇر، ءبىراق بىزبەن بايلانىسقا 250-گە جۋىق ستۋدەنت شىقتى. ءبىز ولاردىڭ بارلىعىنا كومەكتەسۋدەمىز، كونسۋلتاتسيالىق كومەك كورسەتەمىز، قاجەت بولعان جاعدايدا اۋەجايعا دەيىن جەتكىزۋدەمىز. ستۋدەنتتەردىڭ ءبىر بولىگى وزدەرىن قاۋىپسىز سەزىنۋىنە بايلانىستى گونكونگتا قالۋعا نيەت ءبىلدىردى.

«گونكونگ اۋماعىنان كەتۋ ۇسىنىستارى تەك ءبىزدىڭ ستۋدەنتتەرىمىزگە عانا قاتىستى ەكەنىن تاعى ءبىر مارتە اتاپ وتكىم كەلەدى. ق ر ازاماتتارىن قاۋىپسىزدىك جاعدايى تۇراقتانعانشا گونكونگقا اسا قاجەتتىلىكسىز بارماۋعا شاقىرامىز. گونكونگتا بولۋعا ءماجبۇر بولعان ازاماتتاردى بارلىق قاجەتتى ساقتىق شارالارىن قابىلداۋدى سۇرايمىز. جاعدايدىڭ ءمان- جايىن ب ا ق- تا جانە گونكونگتاعى قازاقستاننىڭ باس كونسۋلدىعىنىڭ رەسمي سايتىندا باقىلاپ وتىرۋعا بولادى»، - دەدى ا. سمادياروۆ.