الاكول جاعاسىندا شيپاجاي سالىنادى

نۇر- سۇلتان. قازاقپارات - شىعىس قازاقستاننىڭ تۋريزم سالاسىنداعى بۇل جاڭالىقپەن وبلىس باسشىسى دانيال احمەتوۆ ءبولىستى، دەپ حابارلايدى قازاقپارات ءتىلشىسى.

«الاكول جاعالاۋى بۇگىنگى تاڭدا قازاقستاننىڭ باسىمدىققا يە تۋريستىك ورىندارىنىڭ وندىعىنا كىردى. سوڭعى 3 جىلدا ينفراقۇرىلىمدى دامىتۋعا جانە اباتتاندىرۋعا 6,2 ميلليارد تەڭگە ءبولىندى. الداعى 4 جىلدا 28 ميلليارد تەڭگەگە تاعى 7 ءىرى ينفراقۇرىلىمدىق جوبانى جۇزەگە اسىرۋ جوسپارلانىپ وتىر. سول سەكىلدى رەسەي فەدەراتسياسىنىڭ كۋرورتولوگيا جانە فيزيوتەراپيا عىلىمي- زەرتتەۋ ينستيتۋتى جىل بويى ساۋىقتىرۋ تۋريزمىن دامىتۋ ءۇشىن كولدىڭ ەمدىك قاسيەتتەرى بويىنشا زەرتتەۋ جۇمىستارىن جۇرگىزگەن بولاتىن. زەرتتەۋ ناتيجەلەرىنىڭ ءوزى كولدە ساناتوريي سالۋعا بولاتىنىن كورسەتىپ وتىر»، - دەدى دانيال احمەتوۆ و ك ق- دا وتكەن باسپا ءسوز ءماسليحاتىندا.

ايماق باسشىسى سونىمەن بىرگە الاكول جاعالاۋىنىڭ دامۋى بيۋدجەتكە سالىق تولەمدەرىنىڭ تۇسىمىنە ىقپال ەتەتىنىن جەتكىزدى.

«بىلتىرعىمەن سالىستىرعاندا بيىل الاكولدىڭ تابىس مولشەرى 1,6 ەسە ءوستى. سونىمەن قاتار وبلىستا مەديتسينالىق تۋريزمدى دامىتۋدىڭ بارلىق العىشارتتارى جاسالدى. قازىرگى ۋاقىتتا قازاقستاندا بەس مەديتسينالىق قىزمەت - مەديتسينالىق تۋريزمدى دامىتۋدا ارتىقشىلىققا يە بولۋى مۇمكىن. ولاردىڭ ۇشەۋى - كارديوحيرۋرگيا، نەيروحيرۋرگيا، بىرلەسكەن پروتەزدەۋ - شىعىس قازاقستان وبلىسىنىڭ كلينيكالارىندا بار»، - دەدى ول.

اۆتور ايان بەكەن ۇلى