قازاقستان مەن شۆەيتساريا پرەزيدەنتتەرى كەڭەيتىلگەن قۇرامدا كەلىسسوز جۇرگىزدى
كەڭەيتىلگەن قۇرامدا وتكەن كەلىسسوز بارىسىندا مەملەكەت باسشىسى قازاقستان مەن شۆەيتساريانىڭ ەكىجاقتى بايلانىستارىنىڭ ءمانى زور ەكەنىن ايتتى.
«ءسىزدىڭ ساپارىڭىز مەملەكەتتەرىمىز اراسىنداعى ىنتىماقتاستىقتى دامىتۋدا زور ماڭىزعا يە بولاتىنىنا سەنىمدىمىن. بۇل ىنتىماقتاستىق كەڭ قانات جايىپ، وركەندەپ كەلەدى، سونداي- اق، ەكونوميكالىق جانە ساياسي سالالارداعى ءوزارا ءتيىمدى بايلانىستاردىڭ قارقىنىن ارتتىرۋ ءۇشىن بارلىق كۇش- جىگەرىمىزدى جۇمسايمىز» ، - دەدى قاسىم- جومارت توقايەۆ.
مەملەكەت باسشىسى ەكى ەل اراسىنداعى قاتىناستاردى نىعايتۋعا تۇڭعىش پرەزيدەنت - ەلباسى نۇرسۇلتان نازاربايەۆتىڭ قوسقان ماڭىزدى ۇلەسىنە توقتالىپ، سەرىكتەستىكتىڭ ءداستۇرلى نەگىزى جالعاسا بەرەتىنىن اتاپ ءوتتى.
«ءبىز بۇگىن حالىقارالىق ىقپالداستىقتىڭ ماڭىزدى ماسەلەلەرىن تالقىلادىق، حالىقارالىق كۇن تارتىبىندەگى نەگىزگى پروبلەمالار جونىندەگى مەملەكەتتەرىمىزدىڭ ۇستانىمى ورتاق ەكەنىنە كوز جەتكىزدىك. شۆەيتساريانى ماڭىزدى سەرىكتەس رەتىندە قاراستىرامىز. سوندىقتان وسى ىنتىماقتاستىعىمىزدىڭ دامۋ قارقىنىن ساقتاۋىمىز قاجەت»، - دەدى قازاقستان پرەزيدەنتى.
ۋلي ماۋرەر وڭىردەگى ەكونوميكالىق جانە ساياسي بايلانىستاردى دامىتۋ ىسىندەگى قازاقستاننىڭ نەگىزگى رولىنە نازار اۋداردى.
«قازاقستان ءبىز ءۇشىن ساياسي ءارى ەكونوميكالىق تۇرعىدان ازيا مەن ەۋروپا اراسىن جالعاستىرۋشى كوپىر سانالادى. سىزدەردىڭ ەلدەرىڭىزدىڭ الەمدەگى جانە حالىقارالىق قوعامداستىقتاعى ءرولى ارتىپ كەلەدى. ءبىز ازيا مەن ەۋروپا اراسىنداعى قارىم- قاتىناستاردى شىنايى، اشىق جانە تىكەلەي تالقىلاي الاتىن، سونداي- اق، قۇرلىقتار اراسىنداعى ءوزارا ىقپالداستىقتى قامتاماسىز ەتۋگە، ەكونوميكالىق قاتىناستاردى نىعايتۋعا بىرلەسە ۇلەس قوساتىن قازاقستان سياقتى سەرىكتەسىمىزدىڭ بار ەكەنىنە قۋانىشتىمىز» ، - دەدى شۆەيتساريا پرەزيدەنتى.
كەلىسسوزدەر بارىسىندا ساۋدا- ەكونوميكالىق جانە ينۆەستيتسيالىق ىنتىماقتاستىقتى جانداندىرۋ، ءتۇرلى سالالارداعى بىرلەسكەن جوبالاردى جۇزەگە اسىرۋ، قارجىلىق قىزمەت كورسەتۋ سەكتورىنداعى ءوزارا ىقپالداستىق ماسەلەلەرى قاراستىرىلدى.
كەزدەسۋ سوڭىندا قاسىم- جومارت توقايەۆ سەرىكتەستىك قاتىناستاردى ودان ءارى دامىتۋ جانە ەكى ەل اراسىنداعى ءوزارا ءىس- قيمىلداردىڭ مۇمكىندىگىن ارتتىرۋ ءۇشىن ۋلي ماۋرەر ساپارىنىڭ ءمانى زور ەكەنىن ايتتى.