قاسىم-جومارت توقايەۆ: شۆەيتساريا - قازاقستاننىڭ نەگىزگى ساۋدا سەرىكتەستەرىنىڭ ءبىرى
ەكىجاقتى كەلىسسوزدەردىڭ الدىندا «اقوردا» رەزيدەنتسياسىندا شۆەيتساريا پرەزيدەنتىن سالتاناتتى تۇردە قارسى الۋ ءراسىمى ءوتتى. ەكى ەلدىڭ مەملەكەتتىك ءانۇراندارى شىرقالعاننان كەيىن قۇرمەتتى قاراۋىل روتاسىنىڭ باستىعى راپورت بەردى.
مەملەكەتتەر باسشىلارى قۇرمەتتى قاراۋىلدى ارالاپ ءوتىپ، شاعىن قۇرامدا كەلىسسوز جۇرگىزۋ ءۇشىن رەزيدەنتسيانىڭ «شىعىس زالىنا» باردى.
قاسىم-جومارت توقايەۆ شۆەيتساريانى قازاقستاننىڭ ەۋروپاداعى ەڭ ماڭىزدى ارىپتەستەرىنىڭ ءبىرى سانايتىنىن ايتتى.
«مەملەكەتتەرىمىز اراسىندا بارلىق سالا بويىنشا، اسىرەسە ەكونوميكا باعىتىندا تاتۋ ىنتىماقتاستىق ورناعان. شۆەيتساريا قازاقستان ەكونوميكاسىنداعى ماڭىزدى ينۆەستورلاردىڭ جانە نەگىزگى ساۋدا سەرىكتەستەرىنىڭ ءبىرى»، - دەدى قازاقستان پرەزيدەنتى.
مەملەكەت باسشىسى شۆەيتساريا پرەزيدەنتىمەن بىرگە بيزنەس-دەلەگاتسيا وكىلدىگىنىڭ دە كەلۋى وسى ساپاردىڭ ماڭىزىن ارتتىرا تۇسەتىنىن اتاپ ايتتى.
ۋلي ماۋرەر قاسىم-جومارت توقايەۆقا قوناقجايلىق كورسەتكەنى ءۇشىن ريزاشىلىق ءبىلدىرىپ، قازاقستاندى ءوز ەلىنىڭ اسا ماڭىزدى سەرىكتەسى رەتىندە قاراستىراتىنىن جەتكىزدى.
«ءبىز ساياسي قولداۋ كورسەتكەندەرىڭىز ءۇشىن شىن جۇرەكتەن ريزاشىلىق بىلدىرەمىز. ءبىزدىڭ ماقسات- مۇراتتارىمىز ورتاق. ال ەكونوميكالىق بايلانىستارىمىزعا كەلەر بولساق، سوڭعى جىلدارى بۇل سالانىڭ دامۋ قارقىنى ارتىپ كەلەدى. ءبىزدىڭ ءوزارا ساپار الماسۋىمىز قارىم-قاتىناستارىمىزدى ودان ءارى نىعايتۋعا سەپتىگىن تيگىزەدى دەپ ويلايمىن»، - دەدى شۆەيتساريا پرەزيدەنتى.