قازاقستاندىق رەجيسسەر ازيا «وسكارىن» جەڭىپ الدى
ازيالىق «وسكار» قازاقستاندىق رەجيسسەرگە نۋار ستيلىندەگى «قارا، قارا ادام» فيلمى ءۇشىن بەرىلدى. فيلم اۋىلدا بالا ءمايىتىنىڭ تابىلۋىمەن باستالادى. تەرگەۋشى ءىستى تەزىرەك جاۋىپ تاستاعىسى كەلگەنىمەن، قالادان كەلگەن جۋرناليست قىلمىس بويىنشا تەرگەۋ جۇرگىزۋدى تالاپ ەتەدى.
ماراپاتتاۋ ءراسىمى 21 -قاراشادا اۋستراليانىڭ بريسبەرن قالاسىندا ءوتتى. ءادىلحان ەرجانوۆ Asia Pacific Screen Awards كينوجۇلدەسىنىڭ «ۇزدىك رەجيسسەر» اتالىمىندا جەڭىمپاز بولدى. بۇل اتالىمدا قازاقستاندىق رەجيسسەر فيليپپيندىك لاۆ دياستى، قىتايلىق ۆان سياوشۋايدى، پالەستينالىق ەليا سۋلەيماندى جانە تايلاندتىق انوچ سۋۆيچاكورنپونگتى باسىپ وزدى.
ودان بولەك، وڭتۇستىككورەيالىق رەجيسسەر بونگ دجۋن حۋدىڭ «پارازيت» كينوسى «ۇزدىك كوركەم فيلم» اتالىمىندا ۇزدىك دەپ تانىلدى.
APSA بايقاۋىنا ازيا-تىنىق مۇحيتى ايماعىنداعى مەملەكەتتەردەن 289 فيلم ۇسىنىلعان. ونىڭ ىشىندە 22 مەملەكەتتەن كەلگەن 37 فيلم بەدەلدى جۇلدەلەرگە يە بولدى.
ايتا كەتەيىك، 2013 -جىلى ءا. ەرجانوۆ «قۇرىلىسشىلار» تۋىندىسى ءۇشىن APSA NETPAC جۇلدەسىن(Young Cinema Award) جەڭىپ العان ەدى.
اۆتور: ايجان سەرىكجان قىزى