+7 (701) 759 90 19
16 °С : نۇر-سۇلتان
13 °С : الماتى
USD 405.69 EUR 455.51
RUB 5.72 CNY 57.42
جاڭالىقتار

ءبىر ايدا قۇراستىرعان: ەلوردا وقۋشىلارى اراسىندا روبوتوتەحنيكادان جارىس باستالدى

22 قاراشا 14:12
:ءبولىسۋ
ءبىر ايدا قۇراستىرعان: ەلوردا وقۋشىلارى اراسىندا روبوتوتەحنيكادان جارىس باستالدى

نۇر-سۇلتان. قازاقپارات - ەلوردادا مەكتەپ وقۋشىلارى اراسىندا «ROBOFEST - 2019» قالالىق جارىسى باستالدى، دەپ حابارلايدى قازاقپارات ءتىلشىسى.

«سايىس ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ« باعدارلاماسى اياسىندا قر تۇڭعىش پرەزيدەنتى كۇنىنە وراي وتكىزىلىپ وتىر. ماقسات - سپورتتىڭ عىلىمي- تەحنيكالىق باعىتىن دامىتۋ جانە وزدەرىن وسى باعىتتا دامىتىپ جۇرگەن بالالاردىڭ ءبىر-بىرىمەن تانىسىپ، ويعا العان ىستەرىن جۇزەگە اسىرۋعا مۇمكىندىك جاساۋ»، - دەيدى نۇر-سۇلتان قالالىق تەحنيكالىق شىعارماشىلىق ورتالىعىنىڭ ديرەكتورى قانات ءابدىراشيتوۆ.

ول روبوتوتەحنيكامەن اينالىسقان بالانىڭ لوگيكالىق ويلاۋ قابىلەتى جاقسى داميتىنىن ايتادى. «روبوتوتەحنيكامەن اينالىسقان بالا باعدارلاما جاساۋدى، روبوتتاردىڭ ماتەريالدىق- تەحنيكالىق جاعىن زەرتتەۋدى، ولاردى قۇراۋدى ۇيرەنەدى»، - دەيدى ول.

ورتالىق ديرەكتورىنىڭ اتاپ وتۋىنشە، 1970 -جىلدارى دا وسىنداي ۇيىرمەلەر بولعان. ءبىراق قولداناتىن قۇرالداردىڭ كولەمى وتە ۇلكەن، ىڭعايسىز بولىپ كەلەتىن.

«قازىر تەحنولوگيا وتە دامىپ كەتكەن. سول سەبەپتى، بالالاردىڭ ۆيزۋالدى ويلاۋ جۇيەسى جاقسى دامىعان. مىسالى، بۇل جارىسقا قاتىسىپ جاتقان 2-، 3-سىنىپ وقۋشىلارى دا بار. كەيدە ولار ۇلكەندەردىڭ باسىنا كەلمەيتىن يدەيا ايتادى. قابىلەتى بولسا - نەگە قاتىستىرماسقا؟ جارىسقا ەلورداداعى 86 مەكتەپ قاتىسۋدا، بۇل - قالاداعى مەكتەپتەردىڭ %95 دەپ ايتۋعا بولادى. مەكتەپتەردەگى ماتەريالدىق جاعدايدى جاقسارتا تۇسسە - جارىسقا ءبىر مەكتەپتەن بىرنەشە كوماندا قاتىسۋشى ەدى»، - دەيدى ديرەكتور.

ەلوردادا ءۇشىنشى جىل قاتارىنان ءوتىپ جاتقان روبوتوتەحنيكا بايقاۋىنا 86 مەكتەپتەن 86 كوماندا، بارلىعى 172 بالا قاتىسىپ جاتىر.

قازىلار القاسىنىڭ ءتوراعاسى تالانت تولەۋبەكوۆتىڭ ايتۋىنشا، وقۋشىلار مەن ۇستازدارعا تاپسىرما ءبىر اي بۇرىن بەرىلگەن.

«ءبىر اي ىشىندە ولار روبوت قۇراپ شىعارادى. وسىدان ءۇش جىل بۇرىن قاتىسۋشىلار سانى ەكى ەسە از بولعان جانە جارىس وسىنداي كەڭ كولەمدە ەمەس، تەحنيكالىق شىعارماشىلىق ورتالىقتىڭ وزىندە وتكەن»، - دەيدى ول.

ال عافۋ قايىربەكوۆ اتىنداعى №2-مەكتەپ- گيمنازياسىنىڭ 9-سىنىپ وقۋشىسى نيازبەك بازاربايەۆتىڭ روبوتوتەحنيكاعا دەگەن قىزىعۋشىلىعى 5-سىنىپتان باستاپ ويانعان.

«مەن اتا-اناما ءوتىنىش ايتىپ، 5-سىنىپتان باستاپ روبوتوتەحنيكا ۇيىرمەلەرىنە قاتىستىم. 5-سىنىپ وقىپ جۇرگەن كەزىمدە اقمولا وبلىسى بويىنشا روبوتوتەحنيكادان وتكەن جارىسقا قاتىسىپ، ەكىنشى ورىن الدىم. بۇگىنگى جارىستا قاجەتتى قۇرالدار بەرەدى، ءبىز ودان بيىكتىگى 30 س م، ۇزىندىعى 30 س م جانە سالماعى 2 ك گ بولاتىن روبوت قۇراۋىمىز قاجەت. روبوتوتەحنيكاعا قىزىعۋشىلىعى بار بالالار الگەبرا، گەومەتريا، فيزيكا، ماتەماتيكا پاندەرىن جاقسى وقيدى. سەبەبى مۇندا ەسەپتەۋ دە، ولشەۋ دە، ساناۋ دا بار. ءبىزدىڭ قولىمىز - شەبەر، فانتازيامىز - مىقتى»، - دەيدى ول.

اۆتور: زارينا قاھارمان


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049

مۇراعات