اسقار مامين شۆەيتساريا پرەزيدەنتىمەن كەلىسسوزدەر وتكىزدى
«شۆەيتساريامەن ءبىزدى تۇراقتى ارىپتەستىك قارىم-قاتىناستار بايلانىستىرادى. مۇنداي ءوزارا قارىم-قاتىناستاردىڭ نەگىزىن قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ قالادى. مەملەكەت باسشىسى قاسىم-جومارت توقايەۆ كوپۆەكتورلى سىرتقى ساياساتتىڭ ساباقتاستىعىن ساقتايدى جانە ەكىجاقتى ىنتىماقتاستىقتى نىعايتۋعا ەرەكشە ءمان بەرەدى»، — دەدى ا. مامين.
شۆەيتساريا قازاقستاننىڭ اسا ءىرى ساۋدا سەرىكتەستەرىنىڭ وندىعىنا جانە نەگىزگى ينۆەستورلارىنىڭ ۇشتىگىنە كىرەدى. 2018-جىلى تاۋار اينالىمى 3,1 ميلليارد دوللاردى، ال بيىلعى توعىز ايدا 1,9 ميلليارد دوللاردى قۇرادى. وسى جىلدىڭ ءبىرىنشى جارتىجىلدىعىندا كورسەتىلەتىن قىزمەتتەر ساۋداسى وتكەن جىلدىڭ وسىنداي كەزەڭىمەن سالىستىرعاندا %40 ارتتى.
2005-جىلدان بەرى شۆەيتساريا قازاقستان ەكونوميكاسىنا 24 ميلليارد دوللاردان استام قارجى ينۆەستيتسيالادى. ق ر- دا شۆەيتساريالىق كاپيتالدىڭ قاتىسۋىمەن 324 كومپانيا تىركەلگەن، ونىڭ ىشىندە «Glencore International AG», «Philip Morris», «Nestle», «Ammann Asphalt GmbH» جانە تاعى باسقالارى بار. شۆەيتساريا بيزنەسى اۋىل شارۋاشىلىعىندا، كولىك جانە قارجى سەكتورلارىندا، تاۋ-كەن ءوندىرىسى جانە وڭدەۋ ونەركاسىبىندە، كوتەرمە-بولشەك ساۋدادا جانە تاعى باسقاسىندا قامتىلعان.
ەكونوميكالىق سەرىكتەستىكتى نىعايتۋعا قازاقستان - شۆەيتساريا ىسكەرلىك كەڭەسى جانە ساۋدا-ەكونوميكالىق ىنتىماقتاستىعى جونىندەگى ۇكىمەتارالىق كوميسسيانىڭ جۇمىسى ىقپالىن تيگىزەدى.
«قازاقستان - شۆەيتساريانىڭ ورتالىق ازياداعى ماڭىزدى سەرىكتەسى. ءبىزدىڭ ءوزارا ءىس-قيمىلىمىز ەكىجاقتى فورماتتا دا، دۇنيەجۇزىلىك بانك پەن حالىقارالىق ۆاليۋتا قورى اياسىندا دا دامىپ جاتىر. ءبىز ەكونوميكالىق ىنتىماقتاستىقتى كەڭەيتۋگە جانە بىرلەسكەن ينۆەستيتسيالىق جوبالاردى ىسكە اسىرۋعا مۇددەلىمىز»، — دەدى ۋ. ماۋرەر.
شۆەيتساريالىق تاراپ قازاقستاندا قولايلى ينۆەستيتسيالىق احۋالدىڭ جانە بيزنەستى دامىتۋ ءۇشىن جاعدايلاردىڭ بار ەكەنىن اتاپ ءوتتى، بۇعان دۇنيەجۇزىلىك بانكتىڭ «Doing Business» رەيتينگىندەگى ق ر- دىڭ پوزيتسيالارى دالەل بولا الادى.
تاراپتار اۋقىمدى باعىتتار — ساۋدا-ەكونوميكالىق، ينۆەستيتسيالىق، ترانزيتتىك-كولىك، اۋىل شارۋاشىلىعى، اقپاراتتىق-كوممۋنيكاتسيالىق، سيفرلىق، تۋريستىك، زەرگەرلىك سالالاردا، فارماتسيەۆتيكادا، دەنساۋلىق ساقتاۋ جانە ءبىلىم بەرۋدە، جاسىل ەكونوميكا مەن سۋ شارۋاشىلىعى سالاسىندا، سونداي-اق ا ح ق و، دۇنيەجۇزىلىك بانك، ح ۆ ق، د س ۇ بويىنشا ىنتىماقتاستىق پەرسپەكتيۆالارىن تالقىلادى.
شۆەيتساريانىڭ فەدەرالدى پرەزيدەنتى ۋ. ماۋرەردىڭ قازاقستانعا رەسمي ساپارىنىڭ اياسىندا قازاقستاننىڭ تۇڭعىش پرەزيدەنتى - ەلباسى ن. نازاربايەۆپەن كەلىسسوزدەر سونداي-اق، ەكى ەلدىڭ ىسكەرلىك ورتالارىنىڭ وكىلدەرىنىڭ قاتىسۋىمەن دوڭگەلەك ۇستەل وتىرىسىن وتكىزۋ جوسپارلانعان.
بۇعان دەيىن حابارلاعانىمىزدا، وسى ۋاقىتتا نۇر-سۇلتان قالاسىندا مەملەكەت باسشىسى ق. توقايەۆ پەن ۋ. ماۋرەردىڭ كەزدەسۋى ءوتىپ جاتىر.