اقوردادا قازاقستان مەن شۆەيتساريا پرەزيدەنتتەرىنىڭ كەزدەسۋى باستالدى
ايتا كەتەرلىگى، اقورداعا كەلگەن ۋلي ماۋرەردى مەملەكەت باسشىسى قاسىم-جومارت توقايەۆ قارسى الدى. وسىدان كەيىن پرەزيدەنتتەر ءبىر-بىرىنە دەلەگاتسيا مۇشەلەرىن تانىستىردى. شۆەيتساريا باسشىسىنىڭ رەسمي ساپارىنا وراي قۇرمەت قاراۋىلى ساپ تۇزەپ، قازاقستان پرەزيدەنتىنىڭ وركەسترى ەكى ەلدىڭ مەملەكەتتىك ءانۇرانىن ورىندادى.
ءدال قازىرگى ۋاقىتتا قازاقستان مەن شۆەيتساريا پرەزيدەنتتەرىنىڭ شاعىن قۇرامداعى كەلىسسوزدەرى ءوتىپ جاتىر. ودان كەيىن ەكى ەل دەلەگاتسيالارىنىڭ قاتىسۋىمەن كەڭەيتىلگەن قۇرامداعى كەلىسسوزدەر بولماق. اتالعان كەلىسسوزدەر بارىسىندا بارلىق سالانى قامتيتىن ماسەلەلەردىڭ كەڭ اۋقىمى جان-جاقتى تالقىعا تۇسەدى. قورىتىندىسىندا مەملەكەت باسشىلارى بۇقارالىق اقپارات قۇرالدارىنا بىرلەسكەن مالىمدەمە جاسايدى دەپ كۇتىلەدى.
جالپى، شۆەيتساريا پرەزيدەنتى ۋلي ماۋرەردىڭ رەسمي ساپارى اياسىندا قازاقستان ۇكىمەتىنىڭ باسشىسىمەن كەزدەسۋى، ەكى ەلدىڭ ىسكەر توپتارىنىڭ قاتىسۋىمەن وتەتىن «دوڭگەلەك ۇستەلدە» ءسوز سويلەۋى جوسپارلانعان.