بەلگىلى ءانشى مارات وماروۆتىڭ ەسىمى كىسى ءولتىرۋ ىسىندە اتالدى
قىزىقتىسى، ءىس تاريحىندا بەلگىلى قازاقستاندىق كومپوزيتور جانە ءانشى مارات وماروۆ تۋرالى ايتىلادى دەپ حابارلايدى Otyrar.kz.
مۋزىكانتتىڭ ءوزى الدىن-الا تەرگەۋ كەزەڭىندە ىسكە قاتىسى بار ەكەنىن ەستىپ ەسەڭگىرەپ قالعان. سوتتالۋشى ايەلدىڭ ءوزىن وماروۆتىڭ سۇيىكتىسىمىن دەپ تانىستىرعانى بەلگىلى بولدى.
ءوزىنىڭ سوزدەرى شىندىققا جاناسۋى ءۇشىن ول كونسەرتتەردىڭ بىرىندە ماەسترومەن بىرگە تۇسكەن فوتوسىن تەرگەۋگە كورسەتكەن.
ءانشى ب ا ق وكىلدەرىنە سوتتالعان ايەلمەن تانىس ەمەستىگىن، ونى بۇرىن ەشقاشان كورمەگەنىن ايتتى. ول تانىمالدىلىقتىڭ ءوزىن جالا مەن كۇماندى ىستەردىڭ الدىندا دارمەنسىز ەتەتىنىنە قىنجىلعان.
وماروۆتىڭ سوزىنشە، مۇنداي كەلەڭسىز جاعدايلاردان ءتىپتى فيليپپ كيركوروۆ جانە يگور نيكولايەۆ سىندى رەسەيلىك جۇلدىزدار دا ساقتاندىرىلماعان.
ول وزىنە نازار اۋدارتۋ ءۇشىن مۇنداي ىستەرمەن ارام پيعىلدى ادامدار اينالىساتىنىنا سەنىمدى. الايدا وماروۆ ماسەلەنى جىلى جاۋىپ قويا سالماق ەمەس. ەگەردە وسىلاي جالعاسا بەرسە، ول ىسكە ءوزىنىڭ قورعاۋشىلارىن تارتپاق.
بىرنەشە ۋاقىتتان كەيىن سوتتالۋشى ايەل ءوزىنىڭ جالعان سويلەگەنىن مويىنداپ، ماەسترومەن تانىستىق تۋرالى ماس كۇيدە تۇسىنىك بەردىم دەپ اقتالعان.
مۇنى سۋديا تالعات قاحاروۆتا راستادى. ونىڭ ايتۋىنشا، تۇتقىنداۋ كەزىندە ايەل ماس بولعان، ال سوت مارات وماروۆتىڭ ىسكە قاتىسى بار-جوعىن انىقتاي باستاعاندا، ايەل ءوزىن ونىڭ شىعارماشىلىعىنىڭ تابىنۋشىسىمىن دەپ اتاعان. كەيىنىرەك ول سوتتا شىن مانىسىندە ءانشىنى مۇلدەم تانىمايتىنىن ايتقان.
كىسى ءولىمى شىمكەنتتەگى جالدامالى پاتەردىڭ بىرىندە بولعان. تەرگەۋدىڭ ايتۋىنشا، سوتتالۋشى مەن ونىڭ قۇربانى كەزدەيسوق تانىستىقتارىن اتاپ وتپەك بولىپ، پاتەر جالداعان جانە سپيرتتىك ىشىمدىك ىشكەن.
ءسويتىپ ەكەۋدىڭ اراسىندا جانجال بولىپ، سوتتالۋشى قۇربىسىن يتەرىپ جىبەرەدى. سودان كەيىن ول تۇك بولماعانداي ۇيىقتاپ قالادى. تاڭەرتەڭ ويانعان ايەل تانىسىنىڭ ءولىپ قالعانىن بىلەدى.
ءال-فارابي اۋداندىق سوتى كىسى ءولىمى ابايسىزدا بولعان دەپ ەسەپتەپ، ءۇش بالانىڭ اناسىنا ەكى جىل تۇرمەدە وتىرۋ جازاسى كەسىلگەن. قايتىس بولعان ايەلدىڭ ەرعالي ەسىمدى اعاسى جازانى تىم جۇمساق دەپ ەسەپتەپ وتىر.
ونىڭ ايتۋىنشا، سوت ءىس ماتەريالىن تەرەڭ زەرتتەمەگەن جانە بارلىق كۋاگەرلەردەن جاۋاپ الماعان. وعان قوسىمشا، ەرعالي سوتتالۋشىدان ىستەگەن ءىسى ءۇشىن وكىنەتىنىن ءبىر رەت تە ەستىمەگەن.
ەرعالي باپتى قايتادان كۆاليفيكاتسيالاۋ ءۇشىن اپپەلياتسيالىق شاعىم ءتۇسىرىپ قويىپتى.