تاڭەرتەڭ قالاي ەرتە تۇرۋعا بولادى؟

نۇر-سۇلتان. قازاقپارات - قىلىشىن سۇيرەتىپ قىس مەزگىلى دە كەلە جاتىر. اۋا-رايىنىڭ وزگەرۋىنە بايلانىستى ادام اعزاسى السىرەپ، ۇيقى قىسادى.

قىستىڭ ءتۇنى ۇزاق بولعانمەن، دارمەنسىزدىك سالدارىنان تاڭەرتەڭ ەرتە تۇرۋ قيىنعا سوعۋى مۇمكىن. وسىعان وراي كادەڭىزگە جاراپ قالار كەلەسى كەڭەستەردى ۇسىنامىز.

1. جاتار الدىندا ەرتەڭگە قويىپ وتىرعان باستى جوسپارىڭىزدى ويلاڭىز. ماڭىزدى ەكەنىن ەستە ساقتاڭىز. ەرتەرەك تۇرىپ تىرلىگىڭىزدى تىندىرعان سوڭ بوس ۋاقىت قالاتىنىن ەسكەرىڭىز.

2. ەرتە تۇرۋ ءۇشىن ەرتە ۇيىقتاعانىڭىز دۇرىس. كۇندە الدىڭعى كۇننەن 15-30 مينۋت ەرتەرەك ويانىپ ۇيرەنىڭىز. وسىلايشا بىرتىندەپ قاجەتتى ۋاقىتىڭىزعا دەيىن اپاراسىز.

3. ۇيىقتار الدىندا عالامتورعا كىرىپ، تەلەديدار قاراماڭىز. سەبەبى بۇلار ادامنىڭ جۇيكە جۇيەسىن قوزدىرادى دا، ۇيقىنى بۇزادى. قويۋ شاي مەن كوفەنى دە ۇيىقتار الدىندا ىشۋگە بولمايدى. تۇندەگى ءتاتتى ۇيقى - كۇنىڭىزدىڭ ءساتتى ءوتۋىنىڭ كەپىلى ەكەنىن ۇمىتپاعايسىز.

4. ەرتە تۇرۋ ءۇشىن ءوز-وزىڭىزگە كومەكتەسىڭىز. ۇيقىدان تۇرا سالا جارىقتى جاعىڭىز نەمەسە مۋزىكا قوسىڭىز. تەرەزەلەردى ايقارا اشىپ، جاتتىعۋ جاساڭىز. قيمىل- قوزعالىس بار جەردەن ۇيقى اۋلاق جۇرەدى.

5. «ەرتە ويانىپ قويىپپىن، ءالى جارتى ساعات جاتا تۇرۋعا بولادى...» سىندى ويلارعا جول بەرمەڭىز. تۇرا سالا جۋىنۋعا اسىعىڭىز.

6. تاڭەرتەڭ ويانبايتىنىڭىزعا سەنىمدى بولساڭىز، وياتقىشتى (بۋديلنيك) پايدالانىڭىز. ول ءۇشىن ونى جانىڭىزعا ەمەس، وزىڭىزدەن الىس جەرگە قويىڭىز. تاڭەرتەڭ شىرىلداعاندا ونى وشىرۋگە جەتكەنشە ۇيقىڭىز اشىلۋى مۇمكىن.

7. تاڭەرتەڭ ەرتە تۇرۋ - كۇنى بويى سەرگەك ءجۇرۋدىڭ كەپىلى! وسىنى جادىڭىزدان شىعارماڭىز.

8. ۇيقىمدى اشامىن دەپ توسەكتە جاتىپ تەلەديدار قاراپ نەمەسە تەلەفونىڭىزدى اقتارماڭىز. جاڭالىق تىڭداۋعا اسىقپاڭىز. ويتكەنى، توسەك جينالماي، ۇيقى دا سىزدەن الىس كەتپەيدى.

9. ۇيقىڭىزدى اشۋ ءۇشىن، سەرگەكتىكتى سەزىنۋ ءۇشىن كوفە نەمەسە ءبىر كەسە سۋ، بولماسا الما جەڭىز. بۇل ۇيقىڭىزدىڭ اشىلۋىنا كومەكتەسەدى.

10. تاڭەرتەڭگى استان باس تارتپاڭىز. ۇيقىدان كەيىن تاماققا تابەتىڭىز تارتپاۋى مۇمكىن. ءبىراق، تاڭعى اس - كۇنى بويعى اعزاڭىزعا قۋات بەرەر كۇشكە يە ەكەنىن ۇمىتپاعايسىز.