10:29, 22 - قاراشا 2019 | GMT +6
باس پروكۋراتۋرا پرەمەر-مينيسترگە جەمقورلىق بويىنشا ايىپ تاقتى
نۇر-سۇلتان. قازاقپارات - ءيزرايلدىڭ باس پروكۋراتۋراسى پرەمەر-مينيستر بينيامين نەتانياحۋعا «جەمقورلىق» بابى بويىنشا ايىپ تاقتى. ۇكىمەت جەتەكشىسى جاقىن ارادا مالىمدەمە جاسايدى.
پرەمەر-مينيسترگە ءۇش ءىس بويىنشا ايىپ تاعىلاتىنى اقپان ايىندا بەلگىلى بولعان. ول كەزدە پروكۋرورلار نەتانياحۋدىڭ كاسىپكەرلەردەن شامامەن 300 مىڭ دوللار كولەمىندە سىيلىق قابىلداعانىن ايتقان. سونىمەن بىرگە باسپا سوزدە ءوزى تۋرالى جاعىمدى جاڭالىق كوپ بولۋى ءۇشىن مەديابيزنەس وكىلدەرىنىڭ ۇسىنىسىن ورىنداعانىن ايتقان. ال نەتانياحۋ تاعىلعان ايىپتى جوققا شىعارعان.
نەتانياحۋدىڭ ايىپتالعانى جايلى حابار يزرايلدەگى ساياسي داعدارىسپەن تۇسپا-تۇس كەلىپ تۇر. قىركۇيەك ايىندا قايتا پارلامەنت سايلاۋى وتكەنمەن جاڭا ۇكىمەت جاساقتالمادى. كواليتسيا قۇرۋعا تىرىسقان نەتانياحۋدىڭ ءساتسىز تالپىنىسىنان كەيىن بەني گانتس جەتەكشىلىك ەتەتىن وپپوزيتسيا وزگە پارتيالارمەن كەلىسسوز جۇرگىزە باستادى. ەگەر ول كەلىسىم جاساي الماسا، يزرايلدە ءۇشىنشى رەت قايتا سايلاۋ وتپەك.
«ازاتتىق»