داۋرەن ابايەۆ بالا اسىراپ الۋ اگەنتتىگى تۋرالى پىكىر ءبىلدىردى
«بۇل تاقىرىپتا پىكىرتالاس كوپ. ءتىپتى، ەموتسيا كوبىرەك دەر ەدىم. ەڭ قيىنى، بۇل تاقىرىپتا تاجىريبەسى جوق ادامدار بەلسەندى بوپ شىعا كەلدى. ءبىر جاعىنان قىلمىسقا قامقورلىق جاسايدى دەپ دەپۋتاتتاردى ايىپتاپ، ەكىنشى جاعىنان اگەنتتىكتى شەتەلدىكتەرگە بالا ساتۋداعى الىپساتار كۇدىگىنە ءىلدى»، - دەدى مينيستر «حابار» ارناسىنداعى «وتكرىتىي ديالوگ» باعدارلاماسىندا.
ونىڭ ايتۋىنشا، بۇل پىكىرلەردىڭ ەش نەگىزى جوق.
«ەڭ الدىمەن، جەتىم بالالارمەن مەملەكەت اينالىسۋى ءتيىس. ەكىنشىدەن، مەملەكەت بۇل مىندەتتى ازاماتتىق قوعامعا تابىستاۋى ءتيىس. مۇندا ەكى تاراپتىڭ دا بالالار تاعدىرىنا بەي- جاي قارامايتىنىن تۇسىنگەن ءجون. بارلىعى بالالاردىڭ جاعدايى جاقسى بولعانىن قالايدى»، - دەدى ول.
سونىمەن بىرگە، ۆەدومستۆو باسشىسى ەلىمىزدە 5 مىڭ بالانىڭ قاراۋسىز قالعانىن، ازاماتتىق قوعامنىڭ اسىراپ الۋ پروتسەسىن ۇيىمداستىرۋعا كومەك كورسەتكىسى كەلەتىنىن جەتكىزدى.
«ەڭ باستىسى، بارلىعى اشىق، تازا، بالالار ءۇشىن ءتيىمدى بولۋى قاجەت. مەنىڭ بىلۋىمشە، اگەنتتىك ءقازىر پيلوتتىق رەجىمدە جۇمىس ىستەپ تۇر. ۇكىمەت پەن جەرگىلىكتى بيلىك تاراپىنان ولارعا بارلىق كومەك كورسەتىلگەن جانە اگەنتتىك كوپتەگەن ازاماتتاردىڭ بالا اسىراپ الۋىنا كومەكتەستى»، - دەدى د. ابايەۆ.
اۆتور: ايجان سەرىكجان قىزى