داۋرەن ابايەۆ شىمكەنتتەگى اتىشۋلى وقيعا تۋرالى پىكىر ءبىلدىردى

نۇر-سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ شىمكەنتتىك دارىگەردىڭ قامالۋى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

شىمكەنت قالاسىنىڭ №1-كلينيكالىق اۋرۋحاناسىنىڭ باس دارىگەرى ابىلاي دونبايەۆتى ادام اعزاسىن زاڭسىز الۋ ايىبىمەن پوليتسيا ۇستاعان ەدى.

«ءىستىڭ انىق- قانىعىنا جەتپەگەندىكتەن، ازىرگە پىكىر ءبىلدىرۋ قيىن. مۇنداي وقيعا وكىنىشكە قاراي، اسا قاجەت بولىپ وتىرعان دونورلىق پەن ترانسپلانتولوگيا ينستيتۋتىن قارالايدى. ارينە، بۇل سالادا الەمدە دە، ەلىمىزدە دە ءبىرلى-جارىم وقيعالار بولادى. ءبىراق، قازاقستاندا مۇنداي زاڭسىز ارەكەت تامىر جايعان دەپ ايتۋعا بولمايدى، ويتكەنى مۇنداي قىلمىس وتە سيرەك كەزدەسەدى»، - دەدى مينيستر «حابار» ارناسىنداعى «وتكرىتىي ديالوگ» باعدارلاماسىندا.

مينيستر سوڭعى جىلدارى قازاقستان مەديتسيناسىنىڭ ورگان الماستىرۋدا ۇلكەن جەتىستىككە جەتكەنىن اتاپ ءوتتى. ءبىزدىڭ دارىگەرلەر ەڭ كۇردەلى وتالاردى جاساپ، شەتەلدىك كلينيكالاردا تاجىريبە جيناقتاپ ءجۇر.

«مەنىڭ بىلۋىمشە، قازاقستاندا ءبىر جىلدا وسىنداي ءۇش جۇزگە جۋىق وتا جاسالادى. مۇنىڭ قانداي قيىن ەكەنىن، زەرگەرلىك جۇمىسپەن تەڭ ەكەنىن بىلەسىزدەر. ەگەر ولىمنەن كەيىنگى ەرىكتى دونورلىقتى دامىتساق، كوبىرەك ادامنىڭ ءومىرىن قۇتقارىپ قالار ەدىك. ا ق ش-تا جۇرگىزۋشى كۋالىگىندە كوپتەگەن ادامداردىڭ قازا تاپقان جاعدايدا دونورلىققا كەلىسىم بەرەتىندىگى كورسەتىلگەن. قازاقستاندا بۇل ءالى جولعا قويىلماعان»، - دەدى ول.

ءمينيستردىڭ ايتۋىنشا، قازاقستاندىقتار ورگانداردىڭ زاڭسىز نارىقتا ساتىلىپ كەتۋىنەن قورقادى نەمەسە ءدىني سەبەپتەرگە بايلانىستى كەلىسىم بەرمەيدى.

«الايدا، مەن دىنباسىلارمەن سويلەسكەنىمدە، بىردە-ءبىر ءداستۇرلى ءدىننىڭ دونورلىققا تىيىم سالمايتىنىن ايتتى. بۇل تۇرعىدا اۋقىمدى ءتۇسىندىرۋ جۇمىستارىن جۇرگىزۋ قاجەت. مەن بۇل تۋرالى ويلانىپ ءجۇردىم جانە جاقىن ارادا ولىمنەن كەيىنگى دونورلىققا كەلىسىم بەرەتىنىم تۋرالى قۇجاتقا قول قويامىن»، - دەدى د. ابايەۆ.

اۆتور: ايجان سەرىكجان قىزى