قايرات دوسايەۆ تاراز قالاسىنىڭ اكىمى لاۋازىمىنان بوساتىلدى
«قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ تاپسىرماسىنا سايكەس تاراز قالاسىنداعى مەكتەپتە ورىن العان وقىس وقيعاعا بايلانىستى جانە وزىنە جۇكتەلگەن مىندەتتەردى تيىسىنشە ورىنداماعانى ءۇشىن تاراز قالاسىنىڭ اكىمى قايرات اسكەربەك ۇلى دوسايەۆ 2019 -جىلعى 21 - قاراشادان اتقارىپ وتىرعان لاۋازىمىنان بوساتىلدى»، دەولىنگەن حابارلامادا.
ايتا كەتەرلىگى، تاراز قالاسى اكىمىنىڭ مىندەتىن ۋاقىتشا اتقارۋ تاراز قالاسى اكىمىنىڭ ورىنباسارى بەيسەنبەك كەرىمبەك ۇلى جانبوسىنوۆقا جۇكتەلدى.
ەسكە سالا كەتسەك، بۇگىن مەملەكەت باسشىسى قاسىم- جومارت توقايەۆ جامبىل وبلىسىنىڭ اكىمىنە تارازداعى 12 جاستاعى مەكتەپ وقۋشىسى زارداپ شەككەن وقىس وقيعاعا بايلانىستى جانە جۇمىسىندا جۇيەلى كەمشىلىكتەر جىبەرگەنى ءۇشىن قالا اكىمىن قىزمەتىنەن بوساتۋدى تاپسىردى. پرەزيدەنت وبلىس اكىمى اسقار مىرزاحمەتوۆكە ەسكەرتۋ جاسادى.
جامبىلدىق پوليتسەيلەر 15 - قاراشادا تاراز قالاسىندا كامەلەتكە تولماعان قىزدى زورلاعان 38 جاستاعى كۇدىكتىنى ۇستادى. وقۋشى قىزدى زورلاۋ وقيعاسى مەكتەپ اجەتحاناسىندا بولعان. وسى وقيعادان كەيىن جامبىل وبلىسىنداعى بارلىق ءبىلىم وردالارىنداعى قاۋىپسىزدىك شارالارى كۇشەيتىلدى. ال، زارداپ شەككەن وقۋشى اۋرۋحاناعا جاتقىزىلدى.
ق ر ب ع م وقيعا بولعان مەكتەپ ديرەكتورى، ديرەكتوردىڭ تاربيە ءىسى جونىندەگى ورىنباسارى، فيزيكا ءپانى مۇعالىمى جانە ۆاحتەردىڭ قىزمەتىنەن بوساتىلعانىن جەتكىزدى.
سونىمەن قاتار. جامبىل وبلىسى ءبىلىم باسقارماسىنىڭ باسشىسى راحيا تۇرماعانبەتوۆا ءوز ەركىمەن جۇمىستان كەتىپ، ءبىرقاتار جاۋاپتى پوليتسيا قىزمەتكەرلەرىنە قاتاڭ سوگىس بەرىلىپ، ۋچاسكەلىك ينسپەكتور ىشكى ىستەر ورگاندارىنان شىعارىلدى.